އެމް.ޓީ.ސީ.ސީން ފެރީގެ ޚިދުމަތް މިހާރު ދޭ ޒޯންތަކުގެ އިތުރަށް، އިތުރު ޒޯންތަކުގައި މިއަހަރުގެ ޖޫން ނިމޭހާތާގައި މި ޚިދުމަތް ދިނުމަށް ތައްޔާރުވަމުންދާ ކަމަށް އެކުންފުނިން ބުނެފިއެވެ.
އެމް.ޓީ.ސީ.ސީން މިހާރު ފެރީގެ ޚިދުމަތްދެނީ މާލެ ސަރަޙައްދާއި، ޒޯން ތިނަކާއި، ޒޯން ފަހަކަށެވެ.
އެކުންފުނިން ޚިދުމަތް ފެށުމަށް ތައްޔާރުވަމުންދަނީ، ޒޯނު 1ގަ ހިމެނޭ ހއ، ހދ، ށ.އަތޮޅާއި، ޒޯން 2 ހިމެނޭ ނ، ރ، ބ، ޅ އަތޮޅާއި، ޒޯނު 6 ގައި ހިމެނޭ ގއ، ގދ، އަތޮޅުގައި ފެރީގެ ޚިދުމަތް ދިނުމަށެވެ.
އެ ކުންފުނިން ބުނީ، އެ ޒޯނުތަކުގައި ދަތުރުކުރާނެ ފެރީތަކާއި، އަގުތަކާ ބެހޭ ގޮތުންވެސް ގޮތްތަކެއް ނިންމަމުންދާ ކަމަށާ މި ޚިދުމަތް އަތޮޅުތަކަށް ދޭއިރު އަގުތައް ވީހާވެސް ހެޔޮކޮށް ފޯރުކޮށްދެވޭތޯ އެކުންފުނިން މަސައްކަތްކުރާނެކަަމަށެވެ. އެގޮތުން މިހާރުވެސް އެކުންފުނިންވަނީ، ފަސެންޖަރުން އުފުލާ ފެރީ ޑިޒައިންކުރާނެ ފަރާތްތަކެއް ހޯދުމަށް އިޢުލާނުކޮށްފައެވެ.
މިއަހަރުތެރޭ ދަތުރުފަތުރާ ގުޅޭ ރަނގަޅު ބަދަލުތަކެއް ރައްޔިތުންނަށް ފެނިގެންދާނެ ކަމަށްވެސް އެމް.ޓީ.ސީ.ސީން ބުނެއެވެ.