ވަޒީފާ ނުލިބެނީސް ސްޓޫޑަންޓު ލޯނު ދައްކާކަށް ނުޖެހޭނެ: އިލްޔާސް

ސްޓޫޑަންޓު ލޯނުގެ އެހީގައި ކިޔެވި ކުދިންގެ ތެރެއިން ވަޒީފާ ނުލިބޭ އެއްވެސް ކުއްޖަކު ލޯނު ދައްކަން ނުޖެހޭނެކަމަށް ދަ ޑިމޮކްރެޓްސްގެ ރިޔާސީ ކެންޑޭޓް އިލްޔާސް ލަބީބު ވިދާޅުވެއްޖެއެވެ.

ދަ ޑިމޮކްރެޓްސް ހަރުގޭގައި ރޭ ބޭއްވި ޖަލްސާގައި ވާހަކަފުޅު ދައްކަވަމުން އިލްޔާސް ލަބީބް ވަނީ މަތީ ތައުލީމު ހާސިލްކުރުމަށް ސްޓުޑެންޓް ލޯނުގެ ދަށުން ބޭރުގައުމުތަކުގައި ކިޔަވާނިންމާ ކުދިން މާލީގޮތުން ފުދުންތެރި ނުވަނީސް ލޯނު ދައްކަންޖެހި އެކަން ބުރަޔަކަށް ވެފައިވާކަމަށް ވިދާޅުވެފައެވެ. އެގޮތުން، މަތީ ތައުލީމު ހާސިލްކޮށް ނިމޭތަނުން މައިބަފައިންގެ ޚަރަދުން އެ ލޯނުތައް ދައްކަންފަށަން ޖެހޭކަމަށްވެސް އިލްޔާސް ވިދާޅުވިއެވެ. ނަމަވެސް ދަ ޑިމޮކްރެޓްސްގެ ވެރިކަމެއްގައި މަތީ ތަޢުލީމަށް ކިޔަވައި ނިމި ވަޒީފާ ހަމަނުޖެހެނީސް ލޯނު ދައްކަން ނުޖެހޭނެކަމަށް އިލްޔާސް ވިދާޅުވިއެވެ.

"ވަޒީފާއަކައް ވަދެގެން ލިބެނީ 15000 ނޫނީ 17000 ރުފިޔާ، އޭގެން 13000 ދައްކަން ޖެހެނީ ލޯނައް. ދެން ކިހިނެއްތޯ ދިރިއުޅޭނީ؟ ކޮންކަމެއްތޯ އެ ޒުވާނާ ކުރަނީ؟" އިލްޔާސް ސުވާލުކުރިއެވެ.

ގިނަ ދިވެހި ޒުވާނުންގެ ބޮޑެތި ލޯނުތަކުގެ ޒިންމާ ނަގައިގެން އުޅެން ޖެހިފައިވާކަން ފާހަގަކުރައްވަމުން އިލްޔާސް ވިދާޅުވީ، ލޯނުތަކަށް ފައިސާ ދައްކާ އުސޫލަށް ބަދަލު ގެންނަވާނެކަމަށެވެ. އަދި އެ ލޯނުތަކައް ފަސޭހައިން ފައިސާ ދެއްކޭނެ ނިޒާމެއް ގާއިމް ކޮއްދެއްވުމަށްވެސް އިލްޔާސް ވަޢުދުވެވަޑައިގެންނެވިއެވެ.

މި ޖަލްސާއަށްފަހު ކެމްޕެއިނަށް އިލްޔާސް މިހާރު ވަޑައިގެން އުޅުއްވަނީ ނ.އަތޮޅުގައެވެ.