އޮކްޓޫބަރުގެ ނިޔަލަށް ގިރާވަރު ފަޅު ހިއްކާ ނިންމާ ގޯތީގެ ރަޖިސްޓްރީ ދޭނެ!

އަންނަ އޮކްޓޯބަރގެ ނިޔަލަށް ގިރާވަރުފަޅު އެއްކޮށް ހިއްކައި ގޯތިތައް ހަވާލުކުރާނެކަމަށް މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ވިދާޅުވެއްޖެއެވެ. މާލޭގެ ރައްޔިތުންނަށް މާލެ ސަރަހައްދުން ގޯތި ދިނުމަށް ސަރުކާރުން ކުރިއަށްގެންދާ "ބިންވެރިޔާ ސްކީމް"ގެ ދަށުން ގޯތި ދެމުން އަންނަނީ ހުޅުމާލޭ ދެވެނަ ފޭސްއާއި، ގުޅިފަޅު އަދި ގިރާވަރު ފަޅު ހިއްކައިގެންނެވެ.

ބިންވެރިޔާ ސްކީމްގެ ދަށުން ޝަރުތު ހަމަވާ 19639 މީހުންނަށް 9000އަށްވުރެ ގިނަ ގޯތި ދޫކުރުމަށް ވަނީ ނިންމާފައެވެ. ގޯތި ލިބޭ މީހުންނަށް ގޯތި ިބޭ ސަރޙައްދު ކަނޑައެޅުމަށް ގުރުއަތު ނެގުން މިހާރު ދަނީ ކުރިއަށެވެ. މި ސްކީމްގެ ދަށުން އެންމެ ގިނަ ގޯތި ދިނުމަށް ނިންމާފައިވަނީ ގިރާވަރު ފަޅުންނެވެ. ގޮތުން އެސަރަޙައްދުން 5000 ގޯތި ދިނުމަށް ކަނޑައަޅާފައިވެއެވެ. މީގެއިތުރުން ގުޅިފަޅުން 2200އަށްވުރެ ގިނަ ގޯތި އަދި ހުޅުމާލެ ދެވަނަ ފިޔަވަހިން 1300އަށްވުރެ ގިނަ ގޯތި ދިނުމަށް ނިންމާފައިވެއެވެ.

ގޯތި ދިނުމަށްޓަކައި ބޭނުންވާ ބިން ކަނޑައެޅުމަށްޓަކައި ގިރާވަރު ފަޅު އަދި ގުޅިފަޅު ހިއްކުމުގެ މަޝްރޫޢު ވަރަށް ބާރަށް ކުރިއަށް އެބަގެންދެއެވެ. އެ ސަރަހައްދުތަކުގެ ބޮޑު ބައެއް މިހާރުވެސް ވަނީ ހިއްކާފައެވެ. ބިން ހިއްކުމުގެ މަސައްކަތް ކުރިއަށްގެންދަނީ ރާއްޖޭގައި އެފަދަ ބޮޑެތި މަޝްރޫއުތައް ކުރިއަށްގެންގޮސްފައިވާ ނެދަލޭންޑްސްގެ ސީއެމްސީ-ބޮސްކާލިސް ޖޮއިންޓު ވެންޗާ ކުންފުނިންނެވެ.

ޕީއެސްއެމް ނިއުސްއަށް މައުލޫމާތުދެއްވަމުން ޕްލޭނިން މިނިސްޓްރީގެ ސްޓޭޓް މިނިސްޓަރ އަދި ގެދޮރުވެރިޔާ ކޮމެޓީގެ ޗެއަރ އަކްރަމް ކަމާލުއްދީން ވިދާޅުވީ، ގިރާވަރުފަޅު ހިއްކުމުގެ މަސައްކަތް މިހާރު ބާރު ސްޕީޑްގައި ކުރިއަށްދާއިރު، އޮކްޓޯބަރު މަހުގެ ނިޔަލަށް އެތަން އެއްކޮށް ހިއްކާ ނިމޭނެކަމަށެވެ. އަދި ހިއްކާ ނިމެމުންދާވަރަށް ގޯތި ކެނޑުމުގެ މަސައްކަތް ކުރިއަށްދާނެކަމަށް އަކްރަމް ވިދާޅުވިއެވެ. އަކްރަމް ވިދާޅުވީ ގިރާވަރު ފަޅު މިހާރު ހިއްކާފައިވާ މިިންވަރަށް ބަލާއިރުވެސް 400އެއްހާ ގޯތި ނެގެން އެބައޮތްކަމަށެވެ. އެހެންކަމުން އެކަން ކުރިއަށް ގެންދަވާނެކަމަށް އަކްރަމް ވިދާޅުވިއެވެ.

"އޮކްޓޯބަރގެ ނިޔަލަށް އެއްކޮށް ހިއްކާ ނިމޭނެ. އެކަމަކު އޭގެ ކުރިންވެސް ހިކެމުންދާ ވަރަކަށް އަޅުގަނޑުމެން ގޯތި ކަނޑަމުންދާނީ. ގުޅިފަޅުވެސް ހަމަ އެގޮތައް ދާނީ. މިހާރުވެސް 400 ގޯތި ނެގެން އެބައޮތް. އަދި ހިއްކަން އެބައޮތް. އެހެންވީމަ ހިއްކެމުންދާ ވަރަކަށް ގޯތި ކަނޑަމުންދާނެ." އަކްރަމް ކަމާލުއްދީން ވިދާޅުވިއެވެ.

އަކްރަމް ކަމާލުއްދީން ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް މި ދައުރު ނިމުމުގެ ކުރިން ހުރިހާ ގޮއްޗެއް އޭގެ ޙައްގުވެރިންނާ ޙަވާލުކުރައްވާނެކަމަށެވެ. އެހެންކަމުން މަސައްކަތްކުރައްވަނީ ނޮވެމްބަރ 5 ގެ ކުރިން ހުރިހާ ފަރާތްތަކަށް ގޯތި އަދި ރަޖިސްޓްރީ ހަވާލުކުރުމަށްކަމަށްވެސް އަކްރަމް ވިދާޅުވިއެވެ.

މާލޭގެ ރައްޔިތުންނަށް ޚާއްޞަކޮށްގެން ގޯތި ދިނުމަށް ޚާއްޞަ ޕްރޮގްރާމެއް ސަރުކާރުން ހިންގަމުންދާއިރު، މާލޭގެ ރައްޔިތުންނަށް ގޯތި ދޫނުކުރަތާ މިހާރު ވަނީ އެތައް އަހަރެއް ވެފައެވެ. އެހެންކަމުން މާލެ ސަރަޙާއްދުން ގޯތި ލިބުމަކީ މާލޭގެ ރައްޔިތުންގެ ވަރަށް ދިގު އިންތިޒާރެއްގެ ނިމުމެވެ.

މާލޭގެ އަބާދީ 60،000އިން މައްޗަށް އަރައެވެ. ނަމަވެސް މި ވޭތުވެދިޔަ ސާޅީހަކަށް އަހަރަށް ބަލާއިރުވެސް، މާލޭގެ ރައްޔިތުންނަށް ޚާއްސަކޮށް ގޯތި ދޫކުރުމުގެ މަސައްކަތެއް ކުރިއަށް ގެންގޮސްފައެއް ނުވެއެވެ. އެހެން ރަށްރަށުގެ ރައްޔިތުންނަށް އެމީހެއްގެ އުފަން ރަށުން އެއްވެސް އަގަކާ ނުލައި ބަންޑާރަ ގޯތި ލިބޭއިރު، މިއީ މާލޭގެ ރައްޔިތުންނަށްވެސް އޮންނަންވާނެ ޙައްގެއްކަމަށް އެމީހުން ޤަބޫލުކުރެއެވެ. އަދި މި މަސައްކަތަކީ، މާލޭގެ ރައްޔިތުން އެތަށް ޒަމާންތަކެއް ވަންދެން އުޅުނު ދަތި ދިރިއުޅުން އަލުން އާރާސްތުކުރުމަށް ލިބުނު ވަރަށް ބޮޑު އުއްމީދެއްކަމަށްވެސް އެފަރާތްތަކުން ބުނެއެވެ.

ގުޅިފަޅު އަދި ގިރާވަރު ފަޅުން ގޯތި ދޫކުރުމަށް ނިންމާފައިވާއިރު، ސަރުކާރުން ވަނީ މާލެއިން ފެށިގެން ގިރާވަރު ފަޅާއިހަމައަށް ބްރިޖަކުން ގުޅާލުމަށް ނިންމަވާފައެވެ.