އުކުޅަހަށް ކުރިމަތިވެފައިވާ ބިމުގެ ދަތިކަމަށް ހައްލެއް؛ ބިން ހިއްކާ ނިންމާލައިފި

އަރިއަތޮޅު އުތުރުބުރީ އުކުޅަހު ބިން ހިއްކާ، ހިއްކި ސަރަޙައްދަށް ވެލި އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީން ނިންމާލައިފިއެވެ.

21 ހެކްޓަރުގެ އުކުޅަހުގެ އާބާދީއަކީ 1200އެވެ. އުކުޅަހަކީ ރަށުގެ ބިން ފުރި، ބޯހިޔާވަހިކަމަށް ވަރަށް ބޮޑަށް ބޭނުންވެފައި އޮތް ރަށެކެވެ. ގޯތި ދޫނުކުރާތާ 25 އަށްވުރެ ގިނަ އަހަރުވެފައިވާ އުކުޅަހުގައި މިވަގުތުވެސް އަމިއްލަ ގޯއްޗެއް ބޭނުންވާ 200އަށްވުރެ ގިނަ ޢާއިލާ އެބަތިއްބެވެ. އެރަށުގައި މިވަގުތު 258 ގޭގައި މީހުން ދިރިއުޅެއެވެ. ނަމަވެސް އެއް ގެއެއްގެ ތެރޭގައި އެތައް އާއިލާއެއް ދިރިއުޅެމުން ޖެހުމުގެ ދަތިކަން ވަރަށް ބޮޑަށް ކުރިމަތިވެފައިވާކަމަށާއި އަދި ރަށުން އިތުރަށް ގޯތި ދޫނުކުރެވި ވަނީ ބިން ނެތުމުގެ ސަބަބުންކަމަށް ރަށު ކައުންސިލުންވަނީ ފާހަގަކުރައްވާފައެވެ. އަދި އެންމެފަހުން ރަށުން ގޯތި ދޫކުރި އިރުވެސް 1000 އަކަ ފޫޓުވެސް ނުލިބޭ ކަމަށް ކައުންސިލުން ފާހަގަކުރައްވައެވެ.

އުކުޅަހަށް ދިމާވެފައިވާ ބިމުގެ މައްސަލަ ހައްލުކުރެއްވުމުގެ ގޮތުން ސަރުކާރުން އެމްޓީސީސީއާ ހަވާލުކުރައްވައިގެން 13 ހެކްޓަރުގެ ބިންވަނީ ހިއްކާފައެވެ. ބިން ހިއްކުމުގެ ޢަމަލީ މަސައްކަތް އެކުންފުނިން ފެށީ މިމަހުގެ 7 ވަނަ ދުވަހުއެވެ. އަދި މިހާރު ވަނީ، ހިއްކި ސަރަޙައްދަށް ވެލި އެޅުމުގެ މަސައްކަތްވެސް މުޅިން ނިންމާފައެވެ. ހިއްކި ސަރަޙައްދު ޙިމާޔަތްކުރުމަށް 1054 މީޓަރުގެ ސަރަޙައްދުގައި ބޮޑު ހިލައިގެ ރިވެޓްމަންޓް ޖަހާނެއެވެ.

އުކުޅަހު ކައުންސިލްގެ ވިދާޅުވީ ބިންހިއްކުމުގެ މަސައްކަތަކީ އެރަށުގެ ރައްޔިތުން އެންމެ ބޭނުންވި މަޝްރޫޢުކަމަށެވެ. ކައުންސިލްގެ ވިސްނުމަކީ ބިމުގެ ފައިދާ ވީހާވެސް ގިނަ ރައްޔިތުންނަށް ލިބޭނެގޮތަށް ބިން ބޭނުންކުރުމެވެ. އެގޮތުން ހިއްކި ބިމުން އެންމެ ފުރަތަމަވެސް ބިން ދޫކުރައްވާނީ ގޯތި ނެތް މީހުން ގެދޮރުއެޅުމަށެވެ. ގޯތި ދޫކުރުމުގެ އިތުރުން، ބިމުގައި ފްލެޓާއި ރޯހައުސް ތަރައްޤީކުރުމަށްވެސް ވިސްނާފައިވާ ކަމަށް ކައުންސިލުންވަނީ ވިދާޅުވެފައެވެ. އިގުތިޞާދީ ފުރުޞަތުތައްވެސް ހިމެނޭގޮތަށް، ހިއްކި ބިން ބޭނުންކުރާނެގޮތުގެ ޕްލޭން ކައުންސިލުންވަނީ ހަދާފައެވެ.

އުކުޅަހު ބިން ހިއްކުމުގެ މަޝްރޫއަށް ދައުލަތުގެ ބަޖެޓުން 67.21 މިލިއަން ރުފިޔާ ޚަރަދުކުރައްވާފައިވެއެވެ.