ފޮއްދޫގައި ފެނާ ނަރުދަމާ ނިޒާމުގެ މަސައްކަތް ނިންމާ ޓެސްޓުކޮށްފި

ނ.ފޮއްދޫގައި ސަރުކާރުން ކުރިއަށްގެންދިޔަ ފެނާ ނަރުދަމާ ނިޒާމު ޤާއިމުކުރުމުގެ މަޝްރޫޢުގެ މަސައްކަތް ނިންމާ، ޓެސްޓުކޮށްފިއެވެ.

ނ.އަތޮޅު ފޮއްދޫއަކީ ގާތްގަނޑަކަށް 500މީހުންގެ އާބާދިގެ ރަށެކެވެ. އާބާދީއަށް ނުބަލާ ރަށްރަށަށް ބޭނުންވާ އަސާސީ ޚިދުމަތްތައް ޤާއިމުކޮށްދިނުމުގެ މަސައްކަތުގެދަށުން، ފޮއްދޫގެ ފެނާއި ނަރުދަމާގެ މަސައްކަތް ސަރުކާރުން ފެއްޓެވީ 2021ވަނަ އަހަރުގެ މެދުތެރޭގައެވެ. މި މަސައްކަތް ކުރިއަށްގެންދިޔައީ މާލޭ ވޯޓަރ އެންޑް ސްވަރޭޖް ކޮމްޕެނީ، އެމްޑަބްލިއުއެސްސީއާއި ހަވާލުކޮށްގެންނެވެ.

އަދި މިހާރު ވަނީ މަޝްރޫޢުގެ ޢަމަލީ މަސައްކަތް ނިންމާ، އެނިޒާމު ޓެސްޓުކޮށް ޚިދުމަތް ފެށުމަށް ތައްޔާރުވެފައެވެ. މި ނިޒާމު ޓެސްޓުކުރުމުގެ މަސައްކަތް ކުރިޔަށްގެންދިޔައީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިންނެވެ. ފޮއްދޫގެ ފެނާ ނަރުދަމާ ނިޒާމު ހިންގުން ހަވާލުކޮށްފައިވަނީ ފެނަކަ ކޯޕަރޭޝަނާއެވެ.

މިމަޝްރޫޢުގެ ދަށުން، ފޮއްދޫގައި ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިންގ ޤާއިމްކޮށް، ފެނާއި ނަރުދަމާ ހޮޅީގެ މައިނެޓްވޯރކް އަޅައި އަދި ގޭގެޔަށް ފެނާއި ނަރުދަމާ ކަނެކްޝަން ވަނީ ގުޅައިދީފައެވެ. މީގެ އިތުރުން، ފެންރައްކާކުރުމަށް ތާންގި ބަހައްޓައި، ބޯހޯލް ތޮރުފައި، ޕަންޕިންގ ސްޓޭޝަނާއި، ސީ އައުޓް ފޯލް އަދި ރިޖެކްޓް ލައިންވެސް ވަނީ އަޅާފައެވެ.

އެރަށުގައި ފެނާއި ނަރުދަމާގެ 3.89 ކިލޯމީޓަރުގެ ވިއުގައެއް ވަނީ އަޅާފައެވެ.

މި މަޝްރޫޢުގެ ދަށުން ފެން ތަޙުލީލު ކުރުމަށް ބޭނުންވާ ސަމާނު ފޯރުކޮށްދޭނެކަމަށްވެސް އެމްޑަބްލިއުއެސްސީއިން ބުނެއެވެ.

ރާއްޖޭގެ އެހެން ބައެއް ރަށްތަކޭ އެއްގޮތަށް، ފެން ފަށަލަ ތަޣައްޔަރުވުމުގެ މައްސަލަ ފޮއްދުއަށްވެސް އޮތީ ކުރިމަތިވެފައެވެ. އެގޮތުން ފެންފަށަލަ ލޮނުވުމާއި، ނުބައި ވަސް ދުވުމާއި، ބިމު އަޑިއަށް ނަޖިސް ފެން ހިންދާ ޖަންކްޝަން ހެދުމުގެ ސަބަބުން މިމައްސަލަ އޮތީ އިތުރަށް ބޮޑުވެފައެވެ.

ފޮއްދުއަކީ ލޯކަލް ޓުއަރިޒަމަށްވެސް ވަންނަމުންދާ ރަށަކަށްވުމާއިއެކު، ރައްކާތެރި ފެނާއި ނަރުދަމާގެ މުހިންމުކަން އެރަށަށް ބޮޑެވެ.

ފޮއްދޫ ފެނާއި ނަރުދަމާ މަޝްރޫޢުއަކީ ސަރުކާރުން 58 މިލިއަން ރުފިޔާ ޚާރަދުކޮށްގެން ކުރިއަށްގެންގޮސްފައިވާ މަޝްރޫޢުއެކެވ.