ހަފްތާއެއްގެ ތެރޭގައި "ފަވަރަ"އިން 128 މިލިއަން ރުފިޔާގެ މުޢާމަލާތް

މޯލްޑިވްސް އިންސްޓެންޓް ޕޭމެންޓް ނިޒާމު ނުވަތަ "ފަވަރަ" މެދުވެރިކޮށް ހަފްތާއެއްގެ ތެރޭ 100 މިލިއަނަށް ވުރެ ގިނަ ރުފިޔާގެ މުޢާމާލަތް ކޮށްފައިވާކަމަށް މަރުކަޒީ ބޭންކް އެމްއެމްއޭއިން ވިދާޅުވެއްޖެއެވެ.

'ފަވަރަ'އަކީ ރައްކާތެރި އަދި އަވަސް މާލީ މުއާމަލާތްތަކެއް ހިންގުމަށް މޯލްޑިވްސް މަނިޓަރީ އޮތޯރިޓީން ތައްޔާރުކޮށްފައިވާ ޕޭމަންޓް ސިސްޓަމްއެކެވެ. އިންސްޓަންޓް ޕޭމަންޓް ސިސްޓަމްގެ ފުރަތަމަ ބައިވެރިވެފައިވާ 3 ބެންކަކީ ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް އަދި ސްޓޭޓް ބޭންކް އޮފް އިންޑިއާއެވެ.

އެމްއެމްއޭއިން އާންމުކޮށްފައިވާ ތަފާސްހިސާބަށް ބަލާއިރު ޚިދުމަތް ދޭން ފެށި ފަހުން ހަފްތާއެއްގެ ތެރޭގައި 128.42 މިލިޔަން ރުފިޔާގެ މުޢާމަލާތް "ފަވަރަ" މެދުވެރިކޮށް ކޮށްފައިވެއެވެ.

More than MVR 100 million worth transactions within a week! Thank you for choosing Favara. pic.twitter.com/idsvNSGeWM

— Favara - MIPS (@Favara_MIPS) September 4, 2023

މިވަގުތު 3 ބޭންކަކުން ފަވަރައިގައި ބައިވެރިވެފައިވީނަމަވެސް އިތުރު 4 ބޭންކެއް އެ ސިސްޓަމްގެ ތެރޭގައި ހިމެނުމަށްޓަކައި ޓެސްޓްކުރުމުގެ މަސައްކަތް ކުރަމުން އަންނަކަމަށް އެމްއެމްއޭއިން ވިދާޅުވެއެވެ. އަދި މިއަހަރު ނިމުމުގެ ކުރިން ރާއްޖޭގައި ހުރި ހުރިހާ ބޭންކްތަކެއް އެސިސްޓަމާ ގުޅުވާލުމަށް މަސައްކަތް ކުރަމުން އަންނަކަމަށްވެސް އެމްއެމްއޭއިން ވަނީ ވިދާޅުވެފައެވެ. މީގެ އިތުރުން އެމްއެމްއޭއިން އަންނަނީ 'ފަވަރަ' އެޕްލިކޭޝަން ތައްޔާރު ކުރުމުގެ މަސައްކަތްވެސް ކުރައްވަމުންނެވެ.

މޯލްޑިވްސް އިންސްޓަންޓް ޕޭމަންޓް ސިސްޓަމް 'ފަވަރަ' އަކީ މާލީ ނިޒާމާ ބީރައްޓެހި ފަރާތްތަކަށާއި، ބޭންކް އެކައުންޓެއް ނެތް ފަރާތްތަކާއި ރާއްޖޭގެ ކޮންމެ ބޭންކެއްގައި އެކައުންޓް ހުޅުވާފައިވީނަމަވެސް، މި ސިސްޓަމް މެދުވެރިކޮށް ހިނގާ ކޮންމެ މުއާމަލާތެއްގެ ފަސޭހަތައް އެއްހަމައެއްގައި ލިބިދިނުމަށް މަގު ފަހިވާގޮތަށް ފަރުމާކޮށްފައިިވާ ސިސްޓަމެކެވެ.

ފަވަރައިގެ ފުރަތަމަ މަރުހަލާގައި މިވަގުތު ދެނީ މައިގަނޑު ހަތަރު ޚިދުމަތެކެވެ. އެއީ، 'ފަވަރަ' އައިޑީއެއް ހެދުމާއި، 'ފަވަރަ' ޓްރާންސްފާއާއި، 'ފަވަރަ' ރިކުއެސްޓްގެ އިތުރުން ވެރިފިކޭޝަން ޚިދުމަތެވެ.