އަމީނީ މަގުގެ އިތުރު ދެ ސެގްމަންޓްގައި ތާރުއަޅަން ފަށައިފި

އަމީނީ މަގުގެ 10އަދި 11ވަނަ ސެގްމަންޓްގައި ތާރުއެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން އާރްޑީސީން ފަށައިފިއެވެ.

ސެގްމަންޓް 10އަދި 11އަކީ، ޢިޔާސުއްދީން އިންޓަރނޭޝަނަލް ސްކޫލުން ފެށިގެން، ޕްލޭނިން މިނިސްޓްރީއާއި ހަމައަށް އޮންނަ ސަރަޙައްދެވެ.

އެ ސަރަޙައްދުގައި ތާރުއެޅުމުގެ މަސައްކަތް ފެށީ ރޭގައެވެ. އެގޮތުން މިހާރު ވަނީ އެސަރަޙައްދުން ބޮޑު ބައެއްގައި ތާރު ފަށަލަ އެޅުމުގެ މަސައްކަތް ނިންމާފައެވެ. އާރްޑީސީން ބުނީ މޫސުން ތަންދޭނަމަ ޕްލޭނިން މިނިސްޓްރީއާއި ހަމައަށް އޮތް ސަރަޙައްދުގައި މިއަދު މުޅިން ތާރު އަޅާ ނިންމާނެކަމަށެވެ.

އާރްޑީސީން ބުނީ ތާރު އެޅި ސަރަޙައްދު ހިކުމާއެކު މަގުގައި ޓްރެފިކް ނިޝާންތައް ކުރެހުމުގެ މަސައްކަތް ފަށާނެކަމަށެވެ. އަދި ވީހާވެސް އަވަހަށް މަގު އާއްމުންނަށް ބޭނުންކުރަން ހުޅުވާލާނެކަމަށެވެ. މީގެކުރީގެ ސަރަޙައްދުތައްވެސް، ތާރު އަޅާތާ ގާތްގަނޑަކަށް ހަފްތާއެއްގެ ތެރޭގައި ބޭނުންކުރަން ހުޅުވާލައެވެ.

އަމީނީ މަގުގެ މަސައްކަތުގައި ދެން ހިމެނޭނީ އެންމެ ފަހު ދެ ސެގްމަންޓްގެ މަސައްކަތެވެ. އެއީ ފުޑްކޯޓްތައް އޮންނަ ސަރަޙައްދުން ފެށިގެން، މާފަންނުކޮޅުން މަގު ނިމޭ ހިސާބަށެވެ.

މުޅި މިމަޝްރޫޢުގެ މަސައްކަތް މިއަހަރު ތެރޭގައި ނިންމުމަށް އާރްޑީސީން ދަނީ މަސައްކަތްކުރަމުންނެވެ.

މިމަޝްރޫޢުގެ މަސައްކަތް ކުރިއަށްގެންދަނީ އަމީނީ މަގުގައި އަޅާފައިވާ ޔުޓިލިޓީ ވިއުގަތަކާއި، މުވާސަލާތީ ވިއުގަތައް ތަރުތީބުކުރުމާއި، މަގުތަކުގައި ލައިޓް ޖަހާ އެންމެ ޒަމާނީ ފެންވަރަށެވެ.

އަމީނީ މަގުގެ މަސައްކަތްތައް ލަސްވާން ދިމާވި އެންމެ ބޮޑު ސަބަބަކީ، މިމަސައްކަތަކީ ޔުޓިލިޓީ އެހެން ކުންފުނިތަކާވެސް ގުޅިގެން ކުރާ މަސައްކަތަކަށްވާތީ، ޔުޓިލިޓީ ވިއުގަތައް ތަރުތީބު ކުރުމުގެ މަސައްކަތްވެސް ހިމެނޭތީއެވެ.

ޒަމާނީ ފެންވަރަށް އަމީނީ މަގު ތަރައްޤީކުރުމަށް އާރްޑީސީއާއި ޙަވާލުކުރައްވާފައިވަނީ 84.4 މިލިއަން ރުފިޔާއަށެވެ. މި މަޝްރޫޢުގެ ދަށުން އަމީނީމަގުގެ ހެންވޭރު ކޮޅުން ފެށިގެން މާފަންނާ ހަމައަށް ޖުމްލަ 1.79 ކިލޯމީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށްވަނީ ހަމަޖެހިފައެވެ.