ޕިކްނިކް އައިލެންޑެއްގެ ގޮތުގައި ބޭނުންކުރުމަށް ކޮލަމާފުއްޓަށް އެއަތޮޅު ހުރެންދޫ

ޕިކްނިކް އައިލެންޑެއްގެ ގޮތުގައި ބޭނުންކުރުމަށް، ގއ.ހުރެންދޫ ކޮލަމާފުށި ކައުންސިލާއި ހަވާލުކުރައްވައިފިއެވެ.

މި ރަށް ބެލެހެއްޓުމަށް ދޫކުރައްވާފައިވަނީ، "ދިވެހިރާއްޖޭގެ ފަޅުރަށްތަކާ ބެހޭ ޤާނޫނު"ގެ ދަށުން ހިމެނޭ ގަވާއިދު "މަސްވެރިކަމާއި ދަނޑުވެރިކަމާއި އިޤުތިޞާދީ ބޭނުންތަކަށް ފިޔަވައި އެނޫން ބޭނުންތަކަށް ފަޅުރަށްރަށް ދޫކުރުމާއި ބެހޭ ގަވާއިދު"ގެ ދަށުންނެވެ.

ކޮލަމާފުށި ކައުންސިލާއި، ހުރެންދޫ ހަވާލުކުރައްވާފައިވަނީ 5 އަހަރުގެ މުއްދަތަކަށެވެ.

ގއ.ހުރެންދޫ ފަޅުރަށް ގއ.ކޮލަމާފުށި ކައުންސިލާ ހަވާލުކުރުމަށް ރައީސުލްޖުމްހޫރިއްޔާ ނިންމެވުމާ ގުޅިގެން، ގއ.ހުރެންދޫ ފަޅުރަށް ބެލެހެއްޓުން ގއ.ކޮލަމާފުށީ ކައުންސިލާ މިއަދު ވަނީ ކޮންޓްރެކްޓުގައި ސޮއިކޮށް ހަވާލުކޮށްފައެވެ. pic.twitter.com/73ny3QQW1J

— Min.of National Planning, Housing & Infrastructure (@MoNPHImv) September 17, 2023

ރަށް ހަވާލުކުރެއްވުމުގެ އެއްބަސްވުމުގައި މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ޕްލޭނިން އަކްރަމް ކަމާލުއްދީންއެވެ. ކޮލަމާފުށި ކައުންސިލްގެ ފަރާތުން ސޮއިކުރެއްވީ ކައުންސިލްގެ ނައިބު ރައީސް ޝަހާމަތު ހަނީފްއެވެ.

ކޮލަމާފުށި ކައުންސިލްގެ ރައީސް އިބްރާޙިމް ވަޙީދު ވިދާޅުވީ، ކޮލަމާފުށްޓަކީ ގާމަތީ ރަށަކަށް ވުމާއެކު، ރަށުގެ ރައްޔިތުން މޫދަށް އެރިލާ ދަތުރުދާނެ ރަނގަޅު ސަރަޙައްދެއް ރަށުގައި ނެތްކަމަށެވެ. އަދި ހުރެންދޫ ބެލެހެއްޓުން ޕްލޭނިންގ މިނިސްޓްރީން ކޮލަމާފުށީ ކައުންސިލާއި ހަވާލުކުރެއްވީ ދަތުރުދާނެ ރަށެއް ހަމަޖައްސަވައިދެއްވުމަށް އެކައުންސިލުން ސަރުކާރުގައި އެދުމުންކަމަށެވެ.

ހުރެންދުއަކީ ކޮލަމާފުށިން 3-5 މިނެޓުގެ ދަތުރެއްކޮށް ދެވޭހާ ކައިރީގައި އޮތް ފަޅުރަށެކެވެ. މިއީ 3 ހެކްޓަރުގެ ރަށެކެވެ.

ކޮލަމާފުއްޓަކީ ހުވަދު އަތޮޅުގައި އެންމެ އުތުރުން، ވަކިން އޮންނަ ރަށެކެވެ. އެރަށު ރައްޔިތުން އަބަދުވެސް ދަތުރުދިއުމަށް ބޭނުންކުރަމުން އައީ މި ފަޅު ރަށެކެވެ. ކައުންސިލްގެ ރައީސް ވިދާޅުވީ، މިހާރު ރަސްމީކޮށް އެ ރަށް ކައުންސިލާއި ހަވާލުކުރެއްވުމުން، ރަށް ޕިކްނިކް އައިލެންޑެއްގެ ގޮތުގައި ކައުންސިލުން ތަރައްޤީކުރާނެކަމަށެވެ. އެގޮތުން ދަތުރުދާ ރަށަކުން ލިބެންވާ ބައެއް މުހިންމު ފެސިލިޓީތައް ހުރެންދޫގައި ތަރައްޤީކުރާނެ ކަމަށް އިބްރާޙިމް ވަޙީދު ވިދާޅުވިއެވެ.

ގއ.ކޮލަމާފުއްޓަކީ އާބާދީގައި 1600އަށްވުރެ ގިނަ މީހުން ދިރިއުޅޭ ރަށެކެވެ.