ވޯޓު ކަރުދާސް ޗާޕްކޮށް ޕެކްކުރަން ފަށައިފި

މިމަހުގެ 30 ވަނަ ދުވަހު ބާއްވާ ރިޔާސީ އިންތިޚާބުގައި ދެވަނަބުރުގައި ވޯޓުލާ، ވޯޓު ކަރުދާސް ޗާޕުކޮށް ނިންމައި ޕެކް ކުރަން ފަށައިފިއެވެ.

ރިޔާސީ އިންތިޚާބުގެ ދެވަނަ ބުރުގައި ވާދަކުރައްވާނީ ފުރަތަމަ ބުރުން ކުރި ހޯއްދެވި، ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒާއި، މިހާރުގެ ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހިމް މުޙައްމަދު ޞާލިޙެވެ.

ރިޔާސީ އިންތިޚާބުގެ ދެވަނަ ބުރުގައި 282803 ފަރާތަކަށް ވޯޓުލުމުގެ ހައްޤު ލިބިގެންވެއެވެ. އިންތިޚާބުގެ ފުރަތަމަ ބުރުގެ ވޯޓަރސް ލިސްޓަށްވުރެ، އިތުރު 408 ފަރާތަކަށް ދެވަނަ ބުރުގައި ވޯޓުލުމުގެ ހައްޤު ވަނީ ލިބިފައެވެ.

ޤާނޫނުގައި އޮންނަގޮތުން ކޮންމެ ފޮއްޓަކަށް ފޮނުވާނީ، އެފޮއްޓަކަށް ވޯޓުލާ މީހުންގެ އަދަދަށްވުރެ 1 އިންސައްތަ ކަރުދާސް އިތުރުކޮށެވެ.

އިލެކްޝަންސް ކޮމިޝަނުން ފޮށިތަކަށް ވޯޓްލާން ރަޖިސްޓްރީވެފައިވާ މީހުންގެ ލިސްޓާއި ވޯޓް ކަރުދާސްތައް މިމަހުގެ 27ވަނަ ދުވަހު ރަށްރަށަށް ފޮނުވަން ފަށާނެ ކަމަށްވެސް އިލެކްޝަންސް ކޮމިޝަނުން ހާމަކުރެއެވެ.

ރިޔާސީ އިންތިހާބުގެ ފުރަތަމަ ބުރުގައި ވޯޓުލުމަށްޓަކައި 574 މަރުކަޒެގައި ވޯޓު ފޮށި ބަހައްޓާފައިވެއެވެ. އެއީ މިހާތަނަށް އެންމެ ގިނަ އަދަދެއްގެ ވޯޓު ފޮށި ބަހެއްޓި އިންތިޚާބެވެ.

އިލެކްޝަންސް ކޮމިޝަނުންވަނީ ވޯޓުލުމަށް ބައެއް މަރުކަޒުތަކުގައި ކިޔުތައް ދިގުވެގެންދިޔަ ދިއުމަށް ހައްލެއް ގެނައުމަށް 2 ވަނަ ބުރުގައި ވޯޓުލާއިރު ވޯޓުލާ މީހުންގެ އަދަދަށް ބަލައި އިތުރު ސެޓަޕްތައް ބެހެއްޓުމަށް ނިންމާފައެވެ. އެގޮތުން 2 ވަނަ ބުރުގައި ވޯޓުލާއިރު 500 އަށްވުރެ ގިނަ މީހުން ވޯޓުލުމަށް ރަޖިސްޓްރީކޮށްފައިވާ ވޯޓުފޮށީގައި 2 ސެޓަޕް ބަހައްޓާނެކަމަށް އިލެކްޝަންސް ކޮމިޝަނުންވަނީ ވިދާޅުވެފައެވެ.