އިތުރު 4000 ގޯއްޗާއި 6000 ފްލެޓަށް ކުރިމަތިލުމަށް ހުޅުވާލަނީ

މާލެ ސަރަހައްދުން އިތުރު 4000 ގޯއްޗާއި 6000 ފްލެޓް ދޫކުރުމަށް މިއަދު ނުވަތަ މާދަމާ ހުޅުވާލައްވާނެކަމަށް ސަރުކާރުން ވިދާޅުވެއްޖެއެވެ.

މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވީ މިފަހަރު ގޯއްޗާއި ފްލެޓަަށް ހުޅުވާލާއިރު، އެންމެފަހުން ކުރިއަށްގެންދިޔަ ގެދޮވެރިޔާ އަދި ބިންވެރިޔާ ސްކީލްގެ ޝަރުތުތަކާއި ގުޅޭގޮތުން އާއްމުން ހުށަހެޅި ޝަކުވާތަކަށް ހައްލުތަކެއް ގެންނަވާނެކަމަށެވެ.

ސަރުކާރުން މިހާރު އިއުލާންކުރެއްވުމަށް ތައްޔާރުވަމުންދާ ބޯހިޔާވަހިކަމުގެ މަޝްރޫޢުގެ މައުލޫމާތު އެންމެ ފުރަތަމަ ހިއްސާކުރެއްވީ މިދިޔަ އަންގާރަދުވަހު ބޭއްވި ކެމްޕެއިން ޖަލްސާއެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުއެވެ.

ގެދޮރުވެރިޔާ ސްކީމާއި ބިންވެރިޔާ ސްކީމަކީ މާލޭގެ ރަށްވެހިންނަށް ހާއްސަކޮށްގެން ކުރިއަށްގެންދިޔަ ސްކީމަކަށްވާއިރު، ރައީސް ސާލިހު ވިދާޅުވީ އަލަށް އިއުލާންކުރައްވާ ބޯހިޔާވަހިކަމުގެ މަޝްރޫޢުއަކީ މާލޭގައި ދިރިއުޅޭތާ 20 އަހަރު ވެފައިވާ އެހެން ރަށްރަށުގެ ރައްޔިތުންނަށްވެސް ކުރިމަތިލެވޭނެ ސްކީމެއްކަމަށެވެ.

މި މަޝްރޫޢުގެ ތަފްސީލް ހާމަކުރައްވަމުން މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، މިފަހަރު ދޫކުރުމަށް ހުޅުވާލާނީ 4000 ގޯއްޗާއި 6000 ފްލެޓްކަމަށެވެ. އަދި މި ފްލެޓާއި ގޯތިތަކަށް ކުރިމަތިލުމުގެ ފުރުސަތު މިއަދު ނޫނީ މާދަމާ ހުޅުވާލައްވާނެކަމަށްވެސް އަކްރަމް ވިދާޅުވިއެވެ.

"ރައީސް ވިދާޅުވެފައިވާ މާލޭގައި 20 އަހަރު އުޅެފައިވާ ރައްޔިތުންނަށް ބޯހިޔާވަހިކަމުގެ މަޝްރޫޢުން ފުރުޞަތު ދިނުމަށް ނިންމާފައިވާކަމަށް. އެއީ މުހިންމު ކަމެއްކަމަށް. މިއަދު ނޫނީ މާދަން އެބަ ހުޅުވާލަން މި ސްކީމަށް ކުރިމަތިލުމަށް." އަކްރަމް ވިދާޅުވިއެވެ.

ސްޓޭޓް މިނިސްޓަރ އަކްރަމް ވިދާޅުވީ ދަފްތަރުގައި ހިމެނޭ މީހުންނާއި މާލޭގައި ދިރިއުޅޭތާ 20 އަހަރު ވެފައިވާކަން ކަށަވަރުކޮށްދޭ މީހުންނަށްވެސް މި ސްކީމްގެ ދަށުން ގޯއްޗާއި ފްލެޓަށް އެދި ހުށަހެޅޭނެކަމަށެވެ.

މާލެ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯއްދައިދެއްވުމަށް ،މި ސަރުކާރުން ފެއްޓެވި ބިންވެރިޔާ އަދި ގެެދެރުވެރިޔާގެ ސްކީލަކީ ފަހުގެ ތާރީހެއްގައި ހިންގި ބޯހިޔާވަހިކަމުގެ އެންމެ ބިޔަ މަޝްރޫޢުއެވެ. މީގެތެރޭގައި ހިމެނޭ ބިންވެރިޔާ ސްކީމްގެ ދަށުން. ޖޮއިންޓް އުސޫލު ހިމެނޭހެން 19639 މީހަކަށް 9001 ގޯތި ދޫކޮށްފައިވެއެވެ. ހުޅުމާލެ، ގުޅީފަޅު އަދި ގިރާވަރު ފަޅުން ދޫކުރި މި ގޯތިތަކަކީ ތިރީހަކަށް އަހަރުތެރޭގައި މާލެ ސަރަހައްދުން ދޫކުރި ފުރަތަމަ ގޯތިތައްކަން ފާހަގަކޮށްލެވެއެވެ.

ގޯތީގެ އިތުުރުން، ސަރުކާރުން ހިންގި ގެދޮރުވެރިޔާ ސްކީމުގެ ދަށުން ފްލެޓަށް ހުށައެޅި 20000 އަށްވުރެ ގިނަ މީހުންގެ ތެރެއިން ޝަރުތު ހަމަވާ 13000 އަށްވުރެ ގިނަ މީހުންނަށް ފްލެޓް ދިނުމަށްވެސް ވަނީ ނިންމަވާފައެވެ.

މި ސްކީމްތަކުގެ ދަށުން ދޫކުރާ ގޯތިތައް ހަވާލުކުރުމުގެ މަސައްކަތް ކުރިއަށްދާއިރު، ގެދޮރުވެރިޔާ ސްކީމްގެ ދަށުން އިމާރާތްކުރާ ފްލެޓްތަކުގެ މަސައްކަތް ބާރަށް ކުރިިއަށްދާކަމަށް ސަރުކާރުން ވިދާޅުވެއެވެ.