ލަފާކުރި އަދަދަށްވުރެ މިދިޔަ އަހަރު ދައުލަތަށް ލިބުނު އާމްދަނީ %19.7 އިތުރު
-
އަންދާޒާކޮށްފައިވަނީ 24.2 ބިލިއަން ރުފިޔާ ލިބޭނެ ކަމަށް
-
ލިބިފައިވަނީ 29.1 ބިލިއަން ރުފިޔާ
-
މައިގަނޑު ސަބަބަކީ ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވުން
ބަޖެޓުގައި ލަފާކުރި އަދަދަށްވުރެ މިދިޔަ އަހަރު ދައުލަތަށް ލިބުނު އާމްދަނީ 19.7 އިންސައްތަ އިތުރުކަމަށް ފިނޭންސް މިނިސްޓްރީން ހާމަކުރައްވައިފިއެވެ.
ފިނޭންސް މިނިސްޓްރީން މިކަން ހާމަކުރައްވާފައިވަނީ މިދިޔަ އަހަރު ބަޖެޓު ތަންފީޒުކޮށްފައިވާގޮތާއި ހާސިލުކުރެވުނު ނަތީޖާތައް ބަޔާންކުރައްވާ އާއްމުކުރެއްވި މިދިޔަ އަހަރުގެ ބަޖެޓު ނަތީޖާގެ ބަޔާނުގައެވެ.
މިދިޔަ އަހަރަށް ރައްޔިތުންގެ މަޖިލީހުން ފާސްކުރި ބަޖެޓުގައި އާމްދަނީއާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް އަންދާޒާކޮށްފައިވަނީ 24.2 ބިލިއަން ރުފިޔާއެވެ. އެހެންނަމަވެސް މިދިޔަ އަހަރު ނިމުނުއިރު އާމްދަނީއާއި ހިލޭ އެހީގެ ގޮތުގައި ޖުމުލަ 29.1 ބިލިއަން ރުފިޔާ ދައުލަތަށް ވަނީ ލިބިފައެވެ. މިއީ މިދިޔަ އަހަރަށް ފާސްކުރި ބަޖެޓުގައި ހިމަނައިފައިވާ އަންދާޒާއާއި އަޅައިބަލާއިރު 19.7 އިންސައްތަ އިތުރު އަދަދެކެވެ.
2021 ވަނަ އަހަރު ނިމުނުއިރު، ކޯވިޑާއިއެކު ކުރިމަތިވި އިޤްތިޞާދީ ހީނަރުކަމުން އަރައިގަނެވި، އިޤްތިޞާދީ ދުވެލި ކުރިން އަންދާޒާކުރި މިންވަރަށްވުރެ އިތުރުވެފައިވުމާއެކު، ދައުލަތުގެ އާމްދަނީ ކުރީގެ އަންދާޒާތަކަށްވުރެ ވަނީ އިތުރުވެފައެވެ.
މިދިޔަ އަހަރަށް ފާސްކުރި ބަޖެޓުގައި ހިމަނައިފައިވާ އަންދާޒާއަށްވުރެ އެ އަހަރުގެ ތެރޭގައި ދައުލަތަށް ލިބުނު އާމްދަނީ އިތުރުވި މައިގަނޑު އެއް ސަބަބަކީ ރާއްޖެއަށް ޒިޔާރަތްކުރި ފަތުރުވެރިންގެ އަދަދު، ކުރިން ލަފާކުރި މިންވަރަށްވުރެ އިތުރުވުމެވެ.
ކޯވިޑް ކޮންޓްރޯލުކުރުމަށް ސަރުކާރުން އެޅި ހަރުދަނާ ފިޔަވަޅުތަކާއެކު، އެ ބަލިމަޑުކަން 2021 ވަނަ އަހަރުގެ ތެރޭގައި ކޮންޓްރޯލުކުރެވި، އެ އަހަރުގެ ތެރޭގައި ޤައުމުގެ އިޤްތިޞާދީ ޙާލަތު ކުރީގެ އަންދާޒާތަކަށްވުރެ ރަނގަޅުވެފައިވާކަމަށް މި ބަޔާނުގައި ބުނެފައިވެއެވެ. އަދި ޓެކުހުގެ ގޮތުގައި މިދިޔަ އަހަރު ދައުލަތަށް ލިބުނު އާމްދަނީ ކުރިން އަންދާޒާކުރި މިންވަރަށްވުރެ އިތުރެވެ، ރިސޯޓުތަކުގެ ކުލީގެ ގޮތުގައި ލިބޭ އާމްދަނީއާއި ބިންވިއްކުމާއި ބިން ބަދަލުކުރުމުގެ ފީ، އަންދާޒާކުރި ވަރަށްވުރެ އިތުރުވެފައިވާތީ، ޓެކްސް ނޫން އާމްދަނީގެ ގޮތުގައި މިދިޔަ އަހަރުގެ ނިޔަލަށް ދައުލަތަށް ލިބުނު އާމްދަނީވެސް ވަނީ އަންދާޒާކުރި މިންވަރަށްވުރެ އިތުރުވެފައިވުން ކަމަށް ބަޖެޓުގެ ނަތީޖާ ބަޔާނުގައި ބުނެފައިވެއެވެ.
ޓެކްސްގެ ތެެރެއިން ދައުލަތަށް އެންމެ ބޮޑު އެއް އާމްދަނީއެއް ލިބެނީ މުދަލާއި ޚިދުމަތުގެ އަގުން ނެގޭ ޓެކްސް ނުވަތަ ޖީ.އެސް.ޓީގެ ގޮތުގައެވެ.
މިދިޔަ އަހަރު ޖީ.އެސް.ޓީގެ ގޮތުގައި 3.1 ބިލިއަން ރުފިޔާ ދައުލަތަށް ވަނީ ލިބިފައެވެ. މިއީ މިދިޔަ އަހަރަށް ފާސްކުރި ދައުލަތުގެ ބަޖެޓުގައި ހިމަނައިފައިވާ އަންދާޒާއާ އަޅައިބަލާއިރު 10.7 އިންސައްތަ އިތުރު އަދަދެއް ކަމަށް ބަޖެޓު ނަތީޖާ ބަޔާނުގައި ފާހަގަކޮށްފައިވެއެވެ.
ޓެކުހުގެ ގޮތުގައި ލިބޭ އާމްދަނީއާއި ޓެކްސް ނޫން އާމްދަނީ، އަންދާޒާކުރި މިންވަރަށްވުރެ އިތުރުވި ނަމަވެސް، މިދިޔަ އަހަރު ހިލޭ އެހީގެ ގޮތުގައި ދައުލަތަށް ލިބިފައިވާ މިންވަރު، އެ އަހަރަށް ފާސްކުރި ބަޖެޓުގައި ހިމަނައިފައިވާ އަންދާޒާއަށްވުރެ 83.6 އިންސައްތަ ދަށެވެ.
މިދިޔަ އަހަރަށް ފާސްކުރި ދައުލަތުގެ ބަޖެޓުގައި ހިލޭ އެހީގެ ގޮތުގައި 2.9 ބިލިއަން ރުފިޔާ ހޯދުމަށް އަންދާޒާކޮށްފައިވި ނަމަވެސް އެއަހަރު ހިލޭ އެހީގެ ގޮތުގައި ދައުލަތަށް ލިބިފައިވަނީ 1.1 ބިލިއަން ރުފިޔާކަމަށެވެސް ފިނޭންސް މިނިސްޓްރީގެ ބަޖެޓު ނަތީޖާ ބަޔާނުގައި ފާހަގަކޮށްފައިވެއެވެ.