މާފަރު އިންޓަރނޭޝަނަލް އެއަރޕޯޓުގައި ޒަމާނީ ފެންވަރުގެ ފިއުލް ފާމެއް

އައިލެންޑް އޭވިއޭޝަނުން މާފަރު އިންޓަރނޭޝަނަލް އެއަރޕޯޓުގައި ޒަމާނީ ފެންވަރުގެ ފިއުލް ފާމެއް ހުޅުވައިފިއެވެ.

މާފަރު އެއާޕޯޓުގައި ބޭއްވި ރަސްމިއްޔާތެެއްގައި މި ފިއުލް ފާމް ހުޅުވައިދެއްވީ އައިލެންޑް އޭވިއޭޝަންގެ މެނޭޖިން ޑިރެކްޓަރު މުހައްމަދު މިހާދު އާއި މޯލްޑިވްސް އިސްލާމިކް ބޭންކުގެ މެނޭޖިން ޑިރެކްޓަރު އަދި ސީއީއޯ މުފައްދަލް އިދްރީސް ހުމްރީއެެވެ.

މާފަރު އެއަރޕޯޓުގައި ހުޅުވާފައިވާ ފިއުލް ފާމަކީ މޯލްޑިވްސް އިސްލާމިކް ބޭންކުން ފައިނޭންސްކޮށްގެން ހުޅުވާފައިވާ ފިއުލް ފާމެކެވެ.

އައިލެންޑް އޭވިއޭޝަނުން މެނޭޖްކުރާ މާފަރު އިންޓަރނޭޝަނަލް އެއަރޕޯޓުގައި ތަރައްޤީކޮށްފައިވާ ފިއުލް ފާމުގައި 400000 ލީޓަރުގެ ތެޔޮ ރައްކާކުރެވޭނެއެވެ. އަދި މި ފިއުލް ފާމުގައި 35000 ލީޓަރުގެ ތެޔޮ ބައުޒަރަކާއި 20000 ލީޓަރުގެ ތެޔޮ ބައުޒަރެއް އޮވެއެވެ.

މާފަރު އެއަރޕޯޓަކީ ގިނަ އަދަދަކަށް ޕްރައިވެޓު ޖެޓު ޖައްސާ އެއަރޕޯޓަކަށްވުމުން، މި ފިއުލް ފާމްއާއެކު އެ އެއަރޕޯޓުން ޙިދުމަތްހޯދާ ޖެޓްތަކަށް ގިނަ ފަސޭހަތަކެއް ލިބިގެންދާނެ ކަމަށް އައިލެންޑް އޭވިއޭޝަނުން ދެކެއެވެ.

2019 ވަނަ އަހަރުގެ ފަހުކޮޅު ހުޅުވާފައިވާ މާފަރު އެއަރޕޯޓު އިންޓަރނޭޝަނަލް އެއަރޕޯޓެއްގެ ގޮތުގައި ބޭނުންކުރަން ފަށާފައިވަނީ 2020 ވަނަ އަހަރުގެ ޖުލައިމަހުގެ 1 ވަނަ ދުވަހުން ފެށިގެންނެވެ. ސަރުކާރުން މާފަރު އެއަރޕޯޓު ތަރައްޤީކޮށްފައިވަނީ، ބައިނަލްއަޤުވާމީ ވައިގެ ދަތުރުފަތުރުގައި އެންމެ އާއްމުކޮށް ބޭނުންކުރާ އެއަރބަސް އޭ-320 އާއި ބޮއިން 737ގެ ބޯޓުތައްވެސް ޖެއްސޭ ގޮތަށެވެ. އެގޮތުން ވެލާނާ އިންޓަނޭޝަނަލް އެއަރޕޯޓާއި ގަން އިންޓަނޭޝަނަލް އެއަޕޯޓަށްފަހު އެންމެ ބޮޑު ރަންވޭއެއްވެސް ހަދާފައިވަނީ މާފަރު އެއަރޕޯޓުގައެވެ.

ނ. މާފަރު އިންޓަރނޭޝަނަލް އެއަރޕޯޓު ރަންވޭ ބޮޑުކޮށް، އަޕްގްރޭޑްކުރުމުގެ މަސައްކަތްވެސް ސަރުކާރުން އަންނަނީ އެމް.ޓީ.ސީ.ސީއާ ޙަވާލުކޮށްގެން ކުރަމުންނެވެ.