ފިނި މޫސުމުގައި ގިނަ އެއަރލައިންތަކެއްގެ މިސްރާބު ރާއްޖެއަށް

އަހަރުގެ ކުރިއަށް އޮތް ދުވަސްތަކުގައި 3 އެއަރލައިނަކުން ރާއްޖެއަށް އަލަށް ދަތުރުތައް ފެށުމަށް ހަމަޖެހިފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ހާމަކޮށްފިއެވެ.

އެމްއޭސީއެލުން ބުނީ، މިއަހަރުގެ ކުރިއަށް އޮތް ދުވަސްތަކުގައި ރާއްޖެއަށް އަލަށް ދަތުރުތައް ފެށުމަށް ހަމަޖެހިފައިވަނީ ވަރޖިންގ އެޓްލާންޓިކް، ސައިޕްރަސް އެއަރވޭސް އަދި ބިއޯންޑް އެއަރލައިންގެ ދަތުރުތައްކަމަށެވެ. މީގެތެރެއިން ވަރޖިންގ އެޓްލާންޓިކް އަދި ސައިޕްރަސް އެއަރވޭސްއިން ރާއްޖެއަށް ކުރުމަށް ހަމަޖެހިފައިވަނީ ފިނި މޫސުމާއި ދިމާކޮށް ޚާއްސަ ދަތުރުތަކެކެވެ.

ދެން ރާއްޖެއަށް ދަތުރުތައް ފެށުމަށް ހަމަޖެހިފައިވަނީ ސިމްޑީ ގްރޫޕާއި ޔޫއޭއީގެ އަރަބެސްކް ގުޅިގެން ތަޢާރަފްކުރާ މަތީ ފެންވަރުގެ ދަތުރުތަކަށް ޚާއްސަ އެއަރލައިންކަމަށްވާ ބިއޯންޑުގެ ދަތުރުތަކެވެ.

ވަރޖިންގ އެޓްލާންޓިކް އެއަރލައިންގެ ދަތުރުތައް އަންނަ ހޯމަދުވަހު ފެށުމަށް ހަމަޖެހިފައިވާއިރު، މިދަތުރުތައް ކުރުމަށް ހަމަޖެހިފައިވަނީ އިނގިރޭސިވިލާތުގެ ލަންޑަންގެ ހީތުރޯ އެއަރޕޯޓާއި ވެލާނާ އިންޓަރނޭޝަނަލް އެއަރޕޯޓައި ދެމެދުއެވެ. އެ އެއަރލައިންއިން ރާއްޖެއަށް ހަފްތާއަކު 3 ދުވަހު ދަތުރުކުރާނެއެވެ.

ސައިޕްރަސް އެއަރވޭސްގެ ދަތުރުތައް ފެށުމަށް ހަމަޖެހިފައިވަނީ އަންނަ މަހުގެ 26ވަނަ ދުވަހުއެވެ. އެއަރލައިނުން ދަތުރުތައް ކުރާނީ ސައިޕްރަސްއާއި ރާއްޖެއާއި ދެމެދުއެވެ.

ބިއޯންޑްގެ ދަތުރުތައް ފެށުމަށް ހަމަޖެހިފައިވަނީ އަންނަމަހުގެ 9ވަނަ ދުވަހުއެވެ. އެ އެއަރލައިންގެ ފުރަތަމަ ދަތުރުކުރުމަށްހަމަޖެހިފައިވަނީ ސައުދީ އަރަބިއްޔާގެ ރިޔާޟަށެވެ.

މި ދަތުރުތަކުގެ އިތުރުން އެހެން އަހަރުތަކުގެވެސް ފިނި މޫސުމުގައި ރާއްޖެއަށް ދަތުރުތައް ކުރާ ގިނަ އެއަރލައިންތަކަކުން އެދުވަސްވަރުގައި ރާއްޖެއަށް ދަތުރުތައް ކުރުމަށްވަނީ ހަމަޖެހިފައެވެ.

އެމްއޭސީއެލުން ބުނީ އެހެން އަހަރުތަކުގެވެސް ފިނި މޫސުމަށް ހާއްސަކޮށްގެން ރާއްޖެއަށް ދަތުރުތައް ބާއްވާ އެއަރލައިތަކުގެތެރެއިން 6 އެއަރލައިނެއްގެ ދަތުރުތައް މިއަހަރުވެސް ބޭއްވުމަށް ހަމަޖެހިފައިވާ ކަމަށެވެ. އޭގެތެރޭގައި އަޒުރު އެއަރ ރަޝިއާ، އޮސްޓްރިއަން އެއަރލައިންސް، ޔޫރޯވިންގްސް ޑިސްކަވާ އަދި ބެންކޮކް އެއަރވޭސް ހިމެނެއެވެ.

ރާއްޖެއަށް އަލަށް ދަތުރުތައް ފަށާ ތިން އެއަރލައިނާއެކު، މިއަހަރުގެ ފިނި މޫސުމުގެތެރޭގައި ރާއްޖެއަށް ދަތުރުތައް ބާއްވާ އެއަރލައިންތަކުގެ އަދަދު 41އަށް އަރާނެ ކަމަށް ލަފާކުރެއެވެ.

ރާއްޖެއަށް ދަތުރުތައް ކުރާ އެއަރލައިންތަކުގެ އަދަދުތައް އިތުރުވަމުންދާއިރު، ރާއްޖެއަށް އަންނަ ފަތުރުވެރިންގެ އަދަދަށްވެސް ދަނީ ބޮޑެތި ކުރިއެރުންތަކެއް ލިބެމުންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އަހަރުގެ މިހާތަނަށް ރާއްޖެއަށްވަނީ 1.4 މިލިއަން ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު، 13.9 އިންސައްތަ އިތުރު އަދަދެކެވެ.