އިންތިޚާބީ ރައީސްއާއި ނައިބު ރައީސް ހުވާކުރައްވާ ރަސްމިއްޔާތަށް 3500 މީހުންނަށް ދަޢުވަތު

އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައީސުލްޖުމްހޫރިއްޔާކަމުގެ ހުވާކުރައްވާ ރަސްމިއްޔާތަށް 3500 އެއްހާ މީހުންނަށް ދަޢުވަތު ދެއްވުމަށް ނިންމާފައިވާކަމަށް ރައްޔިތުންގެ މަޖިލީހުން ވިދާޅުވެއްޖެއެވެ.

އިންތިޚާބީ ރައީސް ޑރ. މުޙައްމަދު މުޢިއްޒު، ރައީސްކަމުގެ ހުވާކުރެއްވުމުގެ ޖަލްސާ އަންނަ މަހުގެ 17 ވަނަ ދުވަހު ބޭއްވުމުގެ ތައްޔާރީތައް ރައްޔިތުންގެ މަޖިލީހުން އަންނަނީ ކުރައްވަމުންނެވެ. ގިނަ ފަރާތްތަކަކަށް މި ރަސްމިއްޔާތުގައި ބައިވެރިވެވޭނެހެން ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ޖުމްހޫރީ މައިދާނުގައެވެ.

ރައީސުލްޖުމްހޫރިއްޔާކަމުގެ ހުވާކުރައްވާ ރަސްމިޔާތަށް ދަޢުވަތު ދެއްވާނެ ބޭފުޅުންނާއި ގުޅޭގޮތުން އިންތިޚާބީ ރައީސްގެ އޮފީހާއި ރައްޔިތުންގެ މަޖިލީހުގެ އިދާރާއިން ވަނީ ބައްދަލުކުރައްވާ މަޝްވަރާކުރައްވާފައެވެ. މިބައްދަލުކުރެއްވުމުގައި ހުވާކުރައްވާ ދުވަހުގެ ރަސްމިއްޔާތުގައި ބައިވެރިވާނެ ޤައުމުތަކުގެ ވެރިންނާއި ޤައުމުތަކުގެ އިސް ފަރާތްތަކާއި ގުޅޭގޮތުން ވަނީ މަޝްވަރާކުރައްވާފައެވެ. އަދި މިރަސްމިއްޔާތަށް 3500 އެއްހާ ފަރާތަށް ދަޢުވަތު ދެއްވުމަށް ތައްޔާރުވަމުންދާކަމަށް ރައްޔިތުންގެ މަޖިލީހުން ވިދާޅުވެއެވެ.

އިންތިޚާބީ ރައީސުލްޖުމްހޫރިއްޔާއާއި އެމަނިކުފާނުގެ ނައިބު ހުވާކުރެއްވުމުގެ ޖަލްސާއަށް ދަޢުވަތުދެވޭ ބޭފުޅުންނާއި ވަޑައިގަންނަވާ ގައުމުތަކުގެ ވެރިންނާ ގުޅޭގޮތުން އިންތިޚާބީ ރައީސުލްޖުމްހޫރިއްޔާގެ އޮފީހުގެ ބޭފުޅުންނާއެކު މަޝްވަރާކުރުން pic.twitter.com/ofUE9dGY01

— People's Majlis (@mvpeoplesmajlis) October 26, 2023

މި ރަސްމިއްޔާތު ޖުމްހޫރީ މައިދާނުގައި ބޭއްވުމަށް ނިންމާފައިވީނަމަވެސް، މޫސުން ގޯސްވުން ފަދަ ކަމެއް ދިމާވެއްޖެނަމަ މިރަސްމިއްޔާތު ރައްޔިތުންގެ މަޖިލީހުގައި ބޭއްވުމަށްވަނީ ނިންމާފައެވެ. އަދި މިރަސްމިއްޔާތު އޮންނާނީ 17 ވާ ހުކުރު ދުވަހުގެ ހަވީރު 16:45 ގައިކަމަށް ރައްޔިތުންގެ މަޖިލީހުންވަނީ ވިދާޅުވެފައެވެ.

ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް ޢައްޔަންކުރައްވާ ބޭފުޅުން ހުވާކުރައްވާ ރަސްމިއްޔާތަށް އަވައްޓެރި ޤައުމުތަކުގެ އިސްވެރިންނަށާއި އަދި އެކި ގޮތްގޮތުން ރާއްޖެއާއި ގާތްގުޅުމެއް އޮންނަ ހުރިހާ ޤައުމެއްގެ ސަރުކާރުގެ އިސްވެރިން ބައިވެވަޑައިގަތުމަކީ ކުރަމުން އަންނަކަމެކެވެ. އަދި ސަރުކާރުގެ އިސްވެރިންނާއި ދިވެހި ދައުލަތަށް ގިނަ ދުވަސްތަކެއް ވަންދެން ޚިދުމަތްކޮށްދެއްވި ބޭފުޅުން މިރަސްމިއްޔާތުގައި އަބަދުވެސް ބައިވެރިވެވަޑައިގަންނަވއެވެ.

ޖުމްހޫރީ މައިދާނުގައި ހުވާކުރެއްވުމުގެ ރަސްމިއްޔާތު ބޭއްވުމަށް ނިންމާފައިވަނީ، ވީހާވެސް ގިނަބަޔަކަށް އެ ރަސްމިއްޔާތުގައި ބައިވެރިވުމުގެ ފުރުޞަތު ދެއްވުމުގެގޮތުން އިންތިޚާބީ ރައީސްގެ އެދިވަޑައިގަތުމާއެކުގައެވެ.