އިވާ ހުންނެވީ ސަލާމުގައި، ނަޝީދު ވަކިކުރާ ޖަލްސާ ކެންސަލް

ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު މަގާމުން ވަކިކުރުމަށް އެމްޑީޕީން ހުށައެޅި ގަރާރު ކުރިއަށް ގެންދަން މިއަދު ތާވަލުކުރި ޖަލްސާ ނުބޭއްވި ކެންސަލްކޮށްފިއެވެ.

މަޖިލީހުގެ އަމީން ޢާންމު ފާތިމަތު ނިއުޝާ ވިދާޅުވީ ޖަލްސާ ކެންސަލްކުރިކަން އިއުލާންލުރައްވަމުން ވިދާޅުވީ ޖަލްސާ ކެންސަލްކުރީ މަޖިލީހުގެ ނައިބު ރައީސް އީވާ ޢަބްދުﷲ އާލާސްކަންފުޅާ އުއްޅުއްވާތީ ސަލާމުގައި ހުންނެވުންކަމަށެވެ. އަދި އިވާ ސަލާމުގައި ހުނެންވިކަން މަޖިލީހަށް އެންގެވީ މިއަދު ހެނދުނުކަމަށްވެސް ނިއުޝާ ވިދާޅުވިއެވެ.

އިވާ ސަލާމުގައި ހުންނެވިކަން އަންގަވާ ފޮނުއްވި ސިޓީގައި މެޑިކަލް ސެޓްފިކެޓާއި ބްލަޑް ރިޕޯޓްތައްވެސް ވަނީ ހުށައަޅުއްވާފައެވެ. އަދި އެތަކެތި މަޖިލީހުގެ މެޖޯރިޓީ ލިޑަރ ހިތަދޫ އުތުރު ދާއިރާގެ މެމްބަރު މުޙައްމަދު އަސްލަމާއި މައިނޯރިޓީ ލީޑަރ މެދުހެންވޭރު ދާއިރާގެ މެމްބަރު ޢަލީ ޢާޡިމަށް ހިއްސާކޮށްދެއްވުމަށްވެސް އެސީޓީގައި އިވާ ވަނީ އެދިވަޑައިގެންފައެވެ.

މަޖިލީހުގެ ގަވައިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަގައި ރިޔާސަތު ބަލަހައްޓަވަންޖެހޭނީ މަޖިލީހުގެ ނައިބް ރައީސްއެވެ. މަޖިލީހުގެ ނައިބް ރައީސް ނެތް ހާލަތެއްގައި ކަންކުރަންވީ ގޮތެއް މަޖިލީހުގެ ގަވައިދުގައި ހިމަނާފައެއްނުވެއެވެ.

މަޖިލީހުގެ ރައީސް މަގާމުން ވަކިކުރަން ހުށައަޅާފައިވާ މައްސަލަގައި މައްސަލަ ހުށައަޅާތާ 14 ދުވަސް ފަހުން އެންމެ ފުރަތަމަ އަންނަ ރަސްމީ ދުވަހެއްގައި އެ ޖަލްސާ ބާއްވަންޖެހެއެވެ. އެހެންކަމުން މިއަދު ޖަލްސާ ކެންސަލްވުމުން މާދަމާގެ ޖަލްސާއަށްވެސް އެޖެންޑާ ކުރަންޖެހޭނީ އެ މައްސަލައެވެ.

މިއަދުގެ ޖަލްސާ ކެންސަލްކުރަން ނިންމިއިރު މަޖިލީހުގެ ނައިބް ރައީސް ޖަލްސާއަށް ހާޒިރުވެޑައި ނުގެންނެވޭކަން އަންގާފައިވާތީ މަޖިލީހުގެ ގަވައިދުގެ 44 ވަނަ މާއްދާގައި ދަށުން ޖަލްސާ ބާއްވާދިނުމަށް އެމްޑީޕީގެ ޕާލިމެންޓަރީ ގްރޫޕުން ވަނީ އެދިފައެވެ. އެ މާއްދާގައި ބުނެފައިވަނީ މަޖިލީހުގެ ރައީސާއި ނައިބު ރައީސަށް ޖަލްސާގެ ރިޔާސަތު ނުބެލެހެއްޓޭނަމަ މަޖިލީހުގެ ރައީސް ކަނޑައަޅުއްވާ މެމްބަރަކު ރިޔާސަތު ބަލަހަންޓަން ވާނެކަމަށެވެ. އަދި އެ މެމްބަރަކީ މަޖިލީހުގައި މެދުނުކެނޑި އެންމެ ގިނަ ދުވަސްވީ މެމްބަރަށް ވާންޖެހޭނެކަމަށްވެސް އެ މާއްދާގައިވެއެވެ. މި ގޮތުން މިހާތަނަށް މަޖިލީހުގައި ރައީސާއި ނައިބު ރައީސް ރިޔާސަތުގައި ވަޑައިގެން ނެތް ދުވަސްތަކުގައި ރިޔާސަތު ބަލަހައްޓަވަމުން ގެންދެވީ ވިލިފުށީ ދާއިރާގެ މެމްބަރު ޙަސަން ޢަފީފުވެ.