ތިންވަނަ ކުއާޓަރުގައި އެސްޓީއޯއަށް 4.1 ބިލިއަން ރުފިޔާގެ އާމްދަނީއެއް
-
ސާފު ފައިދާގެ ގޮތުގައި 271 މިލިއަން ރުފިޔާ
-
ކުންފުނި ހިނގައިގެން 398 މިލިއަން ރުފިޔާ
-
ޓެކްސްއަށް ކެނޑުމުގެ ކުރިން ސާފު ފައިދާގެ ގޮތުގައި 331 މިލިއަން ރުފިޔާ
ސްޓޭޓް ޓްރޭޑިން އޯގަނައިޒޭޝަން، އެސްޓީއޯގެ 3 ވަނަ ކުއާޓަރގެ އާމްދަނީގެ ގޮތުގައި 4.1 ބިލިއަން ރުފިޔާ ލިބިެއްޖެއެވެ.
އެސްޓީއޯއިން އާއްމުކޮށްފައިވާ އެކުންފުނީގެ މިއަހަރުގެ 3 ވަނަ ކުއާޓަރގެ ރިޕޯޓުގައިވާގޮތުން އެކުންފުންޏަށް ތިންވަނަ ކުއާޓަރގައި ލިބިފައިވާ އާމްދަނީގެ އަދަދަކީ މިއަހަރުގެ 2ވަނަ ކުއާޓަރުގައި އާމްދަނީގެ ގޮތުގައި ލިބުނު 3.7 ބިލިއަން ރުފިޔާއާއި އަޅާ ބަލާއިރު 9.2 އިންސައްތަ އިތުރު ޢަދަދެކެވެ.
އެސްޓީއޯއަށް މިއަހަރުގެ ތިންވަނަ ކުއާޓަރުގައި ސާފު ފައިދާގެ ގޮތުގައި ލިބިފައިވަނީ 271 މިލިއަން ރުފިޔާއެވެ. މިއީ 2 ވަނަ ކުއާޓަރުގައި ސާފު ފައިދާގެގޮތުގައި ލިބުނު އަދަށްވުރެ 10 އިންސައްތަ ދަށް އަދަދެކެވެ. ދެވަނަ ކުއާޓަރުގައި ސާފު ފައިދާގެ ގޮތުގައި 303 މިލިއަން ރުފިޔާ ލިބިފައިވެއެވެ.
ސާފު ފައިދާގެ އަދަދު ދަށްވެފައިވަނީ ތިންވަނަ ކުއާޓަރުގައި ކުންފުނި ހިންގައިގެން ލިބުނު ފައިދާ ދަށްވުމުންނެވެ. ތިންވަނަ ކުއާޓަރުގައި ކުންފުނި ހިނގައިގެން ލިބިފައިވަނީ 398 މިލިއަން ރުފިޔާއެވެ. މިއަހަރުގެ 2ވަނަ ކުއާޓަރުގައި މި އަދަދު ހުރީ 427 މިލިއަން ރުފިޔާގައެވެ. ތިންވަަނަ ކުއާޓަރުގައި ކުންފުނި ހިންގައިގެން ލިބުނު ފައިދާ ދަށްވުމުގެ މައިގަނޑު ސަބަބަކީ ތަކެތި ގަތުމަށް ހިނގި ޚަރަދު އިތުރުވުމާއި ކުންފުނީގެ އިދާރީ ޚަރަދުތައް އެ ކުއާޓަރުގައި އިތުރުވުމެވެ.
ޓެކުހަށް ކެނޑުމުގެ ކުރިން ތިންވަނަ ކުއާޓާރުގެ ސާފު ފައިދާގެގޮތުގައި އެސްޓީއޯއަށް ވަނީ 331 މިލިއަން ރުފިޔާ ލިބިފައެވެ. ދެވަނަ ކުއާޓަރގައި ޓެކުހަށް ކެންޑުމުގެ ކުރިން ސާފު ފައިދާގެ ގޮތުގައި 372 މިލިއަން ރުފިޔާ ލިބިފައިވާ ކަމަށް އެސްޓީއޯގެ މާލީ ރިޕޯޓުގައިވެއެވެ.
އެސްޓީއޯއަކީ ރާއްޖޭގައި އެންމެ ފުޅާ ދާއިރާއެއްގައި ގިނަ ވިޔަފާރިތަކެއް ހިންގާ ކުންފުންޏެކެވެ. އެގޮތުން ތެލާއި ބޭހާއި އަދި ކޮންސްޓްރަކްޝަން ސާމާނުގެ އިތުރުން ކެއިން ބުއިމުގެ ބާވަތްތަކުގެ ވިޔަފާރިވެސް އެކުންފުނިން ކުރެއެވެ.