ޓޫރިޒަމް އެކްސްޕޯ ޖަޕާނުގައި ރާއްޖެއިން ބައިވެރިވެއްޖެ

ފަތުރުވެރިކަން އިޝްތިހާރުކުރުމަށް ޖަޕާނުގައި ބާއްވާ އެންމެ ބޮޑު ފަތުރުވެރިކަމުގެ ފެއަރގައި ރާއްޖެއިން ބައިވެރިވެއްޖެއެވެ.

"ޓޫރިޒަމް އެކްސްޕޯ ޖަޕާން" ކުރިއަށްދިޔައީ މިމަހުގެ 26 އިން 29ގެ ނިޔަލަށް ޖަޕާނުގެ އޮސާކާގައެވެ. މި ފެއަރގައި މޯލްޑިވްސް މަރކެޓީންގ އެންޑު ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއާއެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 10 ކުންފުންޏަކުން ބައިވެރިވެފައިވެއެވެ.

ޖަޕާން އެސޯސިއޭޝަން އޮފް ޓްރެވަލް އޭޖެންޓްސް، ޖާޓާއިން އިންތިޒާމުކުރާ މި ފެއަރއަކީ ދުނިޔޭގެ އެންމެ ބޮޑެތި ޓްރެވަލް ފެއަރތަކުގެތެރޭގައިވެސް ހިމެނޭ ފެއަރއެކެވެ. މިއާއެކު ދުނިޔޭގެ އެކި ހިސާބުތަކުން މި ފެއަރގައި ބައިވެރިވެއެވެ.

އެމްއެމްޕީއާރުސީން ވިދާޅުވީ މި ފެއާގައި ޓްރެވަލް ނެޓްވޯކިންގ އަދި ރާއްޖޭގައި ޓޫރިޒަމްގެ ދާއިރާއިން ހުރި ވިޔަފާރީގެ ފުރުސަތުތައް އިޝްތިހާރުކޮށްފައިވާކަމަށެވެ. އަދި މި ފެއާއަކީ ފަތުރުވެރިކަމުގެ އިންޑަސްޓްރީގެ ބޭފުޅުންނަށް ރާއްޖެ އިޝްތިހާރުކުރުމަށް ލިބުނު ރަނގަޅު ފުރުސަތެއްގެގޮތުގައި އެމްއެމްޕީއާރުސީން ދެކެއެވެ.

މި ފެއަރގެ ތެރެއިން ރާއްޖޭގެ ޑައިވިންގ ސެގްމަންޓުވެސް ޕްރޮމޯޓުކުރުމަށް ހާއްސަ އިސްކަމެއްވަނީ ދީފައެވެ. މި އިވެންޓަކީ ޖާޕާނުގެ ޓްރެވަލް ޓްރޭޑަށް ރާއްޖޭގެ އެންމެ ފަހުގެ ޓްރެވަލް އަޕްޑޭޓްތައް ކިޔައިދިނުމަށް މަގުފަހިކޮށްދޭ މުހިންމު އިވެންޓެއްގެ ގޮތުގައި އެމްއެމްޕީއާރުސީން ދެކެއެވެ.

ޖަޕާނަކީ ރާއްޖޭގެ ފަތުރުވެރިކަމަށް މުހިންމު މާކެޓެކެވެ. މިއަހަރުގެ ސެޕްޓެމްބަރުމަހުގެ ނިޔަލަށް އެޤައުމުން ރާއްޖެއަށް 14218 ފަތުރުވެރިންވަނީ ޒިޔާރަތްކޮށްފައެވެ.