ވީއައިއޭގެ ގްރައުންޑް ހޭންޑްލިންގް މަސައްކަތަށް އިތުރު ވެހިކަލްތަކެއް

ވެލާނާ އިންޓަރނޭޝަނަލް އެއަރޕޯޓު، ވީއައިއޭގެ ގްރައުންޑު ހޭންޑްލިންގުގެ މަސައްކަތަށް އިތުރު ވެހިކަލްތަކެއް ގެނެސް ބޭނުން ކުރަން ފަށައިފިއެވެ.

ވެލާނާ އިންޓަރނޭޝަނަލް އެއަރޕޯޓުގެ މަސައްކަތްތަކަށް ގެނެސްފައިވާ އައު ވެހިކަލްތަކާއި، އިކުއިޕްމަންޓުތައް ބޭނުންކުރަން ފެށުން ފާހަގަކުރުމަށް ވަނީ ޙާއްސަ ޙަފްލާއެއް ބާއްވާފައެވެ. މި ޙަފްލާގައި މޯލްޑިވްސް އެއަރޕޯޓްސް ކޮމްޕެނީ ލިމިޑެޓް، އެމް.އޭ.ސީ.އެލްގެ މެނޭޖިންގ ޑިރެކްޓަރ މަހުޖޫބް ޝުޖާއު އަދި އެ ކުންފުނީގެ އިސްވެރިން ވަނީ ބައިވެރިވެފައެވެ.

ވެލާނާ އިންޓަރނޭޝަނަލް އެއަރޕޯޓް ހިންގާ އެމް.އޭ.ސީ.އެލުން ވިދާޅުވީ، ގްރައުންޑު ހޭންޑްލިންގުގެ މަސައްކަތްތަކަށް އިތުރުކޮށްފައިވާ ވެހިކަލްތަކާއި އިކުއިޕްމަންޓުތަކުގެ ތެރޭގައި 4 ފަސިންޖަރ ބަހާއި، 4 އެއަރކްރާފް ސިޑި ބަރިއާއި، 2 ޔުނިވަރސަލް ލޯޑާ، 2 ހައި ލޯޑާ، 10 ބެގޭޖު ޓްރެކްޓާ، 14 ގޮނޑީގެ 1 މިނީވޭން، 32 ގޮނޑީގެ ބަހެއް ހިމެނޭކަމަށެވެ.

ގްރައުންޑު ހޭންޑުލިންގުގެ މަސައްކަތަށް އިތުރު ވެހިކަލްތަކާއި އިކުއިޕްމަންޓު ގެނެސްފައިި މިވަނީ އެ އެއަރޕޯޓުން އެއަރލައިންތަކަށް ދޭ ޙިދުމަތްތައް އަވަސްކޮށް ހަރުދަނާކުރުމަށް ކަމަށް އެމްއޭސީއެލުން ވިދާޅުވިއެވެ.

ކުރިއަށް އޮތް މަސްތަކުގައި އިތުރު އިކުއިޕްމަންޓުތައް ގެނައުމަށް ރާވާފައިވާ ކަމަށްވެސް އެމް.އޭ.ސީ.އެލުން ވިދާޅުވެއެވެ.