ރައްޔިތުންނަށް ވެފައިވާ ކޮންމެ ވަޢުދެއް ފުއްދިގެންދާތަން ފެންނާނެ: ޑރ. މުޢިއްޒު

ރިޔާސީ ކެމްޕޭންގެ ތެރެއިން ރައްޔިތުންނަށް ވެފައިވާ ކޮންމެ ވަޢުދެއް ޙާޞިލުވެގެންދާތަން ރައްޔިތުންނަށް ފެނިގެންދާނެކަމަށް އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިންތިޚާބީ ރައީސް މިހެން ވިދާޅުވެފައިވަނީ ވެރިކަމުގެ ފުރަތަމަ 100 ދުވަހުގެ ތެރޭގައި އެންމެ މުހިންމު އިސްކަމެއް ދެއްވައިގެން ކުރައްވާނެ ކަންކަން ހިމެނޭ "ހަފްތާ 14 މަގުޗާޓް" އިފްތިތާޙްކުރުމަށް ބޭއްވި ޙަފްލާގައެވެ.

މި މަގުޗާޓު ލޯންޗްކޮށްދެއްވީ ދަރުބާރުގޭގައި ބޭއްވި ޙާއްސަ ހަފްލާއެއްގައި އިންތިޚާބީ ރައީސް ޑރ. މުޙައްމަދު މުޢިއްޒުއެވެ. ހަފްތާ 14 މަގުޗާޓުގައި މައިގަނޑު 8 ދާއިރާއަކުން 161 ވައުދެއް ވަނީ ހިމަނުއްވާފައެވެ.

ހަފްތާ 14 މަގުޗާޓުގެ މައިގަނޑު ދާއިރާތައް:

• މިނިވަންކަމާއި ސިޔާދަތު
• އިސްލާމްދީނާއި ޤައުމިއްޔަތު
• ގެދޮރުވެރިކަމާއި އުމްރާނީ ތަރައްޤީ
• އިޤްތިޞާދާއި ތިމާވެށި
• އަންހެނުން، ޒުވާނުން، ފަންނިއްޔަތު އަދި ކުޅިވަރު
• ޞިއްޙީ ދުޅަހެޔޮކަމާއި އޯގާތެރި މުޖްތަމަޢު
• ތައުލީމާއި ތަމްރީން
• ސަރުކާރުގެ ސިޔާސަތާއި ޤާނޫނީ އިޞްލާޙް

މި ޙަފްލާގައި ވާހަކަފުޅުދައްކަވަމުން އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވީ، މި މަގުޗާޓަކީ ފުރަތަމަ 14 ހަފްތާގައި ކުރައްވާނެ ކަންކަން ކަމަށެވެ. ނަމަވެސް މިއީ ހަމައެކަނި ކުރައްވާނެ ކަންކަން ނޫންކަމަށެވެ. ބަޖެޓާއި ޢާމްދަނީ ހޯދޭ ގޮތާއި އެކީގައި 14 ހަފްތާގެ ޕްލޭންގައި ހިމެނޭ ކަންކަމުގެ އިތުރަށްވެސް ކަންކަން ކުރެވިގެންދާނެކަމަށް އިންތިޚާބީ ރައީސް ވަނީ ވިދާޅުވެފައެވެ.

ވައުދުތައް ފުއްދެވުމުގެ މަސައްކަތް ފުރަތަމަ ދުވަހުން ފެށިގެން ފަށްޓަވާނެކަމުގެ ޔަޤީންކަންވެސް ޑރ. މުޢިއްޒު ވަނީ ދެއްވާފައެވެ. އަދި ރެއާއި ދުވާލު ކުރައްވާނެ މަސައްކަތަކީ ނަތީޖާ ނެރެދިނުންކަމަށާއި، އެކަންކަން ރައްޔިތުންގެ ލޯމަތިން ފެނިގެންދާނެކަމަށް އިންތިޚާބީ ރައީސް ވިދާޅުވިއެވެ.

"މިރޭ މިތަނުގައި އަޅުގަނޑުމެން މި އިއުލާންކުރީ ފުރަތަމަ 14 ހަފްތާގައި އަޅުގަނޑުމެންގެ މެނިފެސްޓޯގައި ހިމެނިފައިވާ ކަންކަމުގެ ތެރެއިން އަޅުގަނޑުމެން އެންމެ މަދުވެގެންވެސް ހާސިލްކުރާނެ މިންވަރު. އެއީ އެއްގޮތަކަށްވެސް ހަމައެކަނި ކުރާނެ ކަންކަމެއް ނޫން. އަޅުގަނޑުމެންގެ ވުޒާރާތަކާއި ކުންފުނިތަކުން އެއަށްވުރެ މާގިނަ ކަންކަންވެސް ހާސިލްކުރާނެ." އިންތިޚާބީ ރައީސް ވިދާޅުވިއެވެ.

މި ހަފްލާގައި ވަނީ އިންތިޚާބީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ކެމްޕޭންގެ ތެރޭގައި ދެއްކެވި ވާހަކަފުޅުތައް ހިމެނޭ ޚާއްސަ ފޮތެއް ނެރެދެއްވާފައެވެ. މި ފޮތް ނެރެދެއްވާފައިވަނީ ޑިރެކްޓަރ ޖެނެރަލް އޮފް ޓްރާންސިޝަން އަދި ޕީއެންސީގެ ޗެއަރޕާރސަން ޢަބްދުއްރަހީމް ޢަބްދުﷲ އެވެ.

މި ފޮތުގައި ވަނީ މި އަހަރުގެ އޮގަސްޓް 7 އިން ފެށިގެން ސެޕްޓެމްބަރު 29 ވަނަ ދުވަހާ ހަމައަށް ޑރ. މުޢިއްޒު ދެއްކެވި ހުރިހާ ވާހަކަފުޅެއް ހިމަނާފައެވެ. ޖުމްލަ 900 ސޮފުހާ ހިމެނޭ މި ފޮތުގައި އިންތިޚާބީ ރައީސްގެ ވާހަކަފުޅުތަކުގެ ކެމްޕެއިންގެ ތެރެއިން އެމަނިކުފާނު ވަޑައިގެންނެވި ކޮންމެ ރަށަކާ ގުޅޭ ހަނދާނީ ފޮޓޯތަކާއި، އެ ރަށަކަށާއި، އަތޮޅާއި ޤައުމަށް ވެވަޑައިގެންނެވި ވައުދުތައް ވަކިން ފެންނާނެހެން ހިމަނާފައިވެއެވެ.

ރިޔާސީ އިންތިޚާބުގެ ކެމްޕޭންގެ ތެރެއިން އިންތިޚާބީ ރައީސް ޑރ. މުޙައްމަދު މުޢިއްޒު ވަނީ ރާއްޖޭގެ މީހުން ދިރިއުޅޭ 153 ރަށަކަށާއި، 5 ސިޓީއަށް ވަޑައިގެން 205 ފަހަރު ރައްޔިތުންނާއި މުޚާތަބުކުރައްވާ ވާހަކަފުޅުދައްކަވާފައެވެ.