އިހަވަންދިއްޕޮޅު މަޝްރޫޢާއެކު ތަރައްޤީގެ މުހިންމު މަސައްކަތްތަކެއް ވަރަށް އަވަހަށް އިއުލާނުކުރަނީ

އިހަވަންދިއްޕޮޅުގެ އިންޓަގްރޭޓެޑް ޑިވެލޮޕްމަންޓް ޕްރޮޖެކުޓާއި، މާލޭ ކޮމާޝަލް ބަނދަރުގެ މަސައްކަތް ވަރަށް އަވަހަށް އިއުލާނުކުރައްވާނެ ކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

މި މަޝްރޫޢުތަކަކީ ރައީސުލްޖުމްހުރިއްޔާ ޑރ. މުޙައްމަދު މުޢިއްޒުގެ ހަފްތާ 14 ޕްލޭންގައިވެސް ހިމަނުއްވާފައިވާ މަޝްރޫޢުތަކެކެވެ.

މިމަޝްރޫޢުތަކާއި ގުޅޭގޮތުން އެކްސްގައި ހިއްސާކުރެއްވި ޕޯސްޓެއްގައި އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވީ ލ.ގާދޫ ކައިރީގައި ތަރައްގީކުރާ ކޮމާޝަލް ޕޯޓާއި، ޕޯޓުގެ ލޮޖިސްޓިކް ހިމެނޭގޮތަށް އިހަވަންދިއްޕޮޅުގެ އިންޓަގްރޭޓެޑް ޑިވެލޮޕްމަންޓް ޕްރޮޖެކްޓް އަދި މާލޭ ކޮމާޝަލް ޕޯޓުގެ މަސައްކަތްތައް ވަރަށް އަވަހަށް އިޢުލާން ކުރައްވާނެކަމަށެވެ.

ރައީސް ޑރ މުއިއްޒުގެ ހަފްތާ14ގެ ހިމެނޭ ބައެއް މަސައްކަތުގެތެރެއިން، ލ ގާދޫކައިރީތަރައްގީކުރާ ކޮމާޝަލްޕޯޓާއި،ޕޯޓާއިލޮޖިސްޓިކްސް ހިމެނޭގޮތައް އިހަވަންދިއްޕޮޅުގެ އިންޓަގްރޭޓެޑް ޑިވެލޮޕްމަންޓް ޕްރޮޖެކުޓް އަދިމާލޭ ކޮމާޝަލްޕޯޓުގެ މަސައްކަތްތައް ކުރިއަށްދާނެ.ވ އަވަހަށްއިއުލާނުކުރާނަން pic.twitter.com/F6fPqiyB4M

— Mohamed Saeed (@em_saeed) November 27, 2023

ރައީސުލްޖުމްހުރިއްޔާ ޑރ. މުޙައްމަދު މުޢިއްޒުގެ ހަފްތާ 14ގެ ޕްލޭގައި، 'ބަންްކަރިން' ޚިދުމަތްދެވޭ ގޮތަށް ގާދޫގައި ތަރައްޤީކުރާ ވިޔަފާރި ބަނދަރުގެ މަޝްރޫޢަށް ބޭނުންވާ މަސައްކަތްތައް ފެށުން ހިމެނެއެވެ. އަދި މިމަސައްކަތް ވަރަށް އަވަހަށް ފެށޭނެ ކަމަށް ސައީދުވަނީ ވިދާޅުވެފައެވެ.

އިހަވަންދިއްޕޮޅު މަޝްރޫޢަކީ މީގެކުރިން ވަޒީރު ސައީދު އިޤްތިސާދީ ވުޒާރާއާ ހަވާލުވެވަޑައިގެން ހުންނެވިއިރު ފެއްޓެވި މަޝްރޫޢެކެވެ. އޭރު މިމަޝްރޫޢުގެ ގިނަ މަސައްކަތްތަކެއް ކުރިއަށް ގެންގޮސްފައިވެއެވެ. އެހެންނަމަވެސް ނިމިދިޔަ ސަރުކާރުގައި މިމަޝްރޫޢު އޮތީ ހުއްޓާލާފައެވެ.

އިހަވަންދިއްޕޮޅު މަޝްރޫޢާއި ގުޅޭގޮތުން ކުރިން ޕްލޭންކޮށްފައި އޮތީ، ބޮޑު ޓްރާންސްޝިޕްމަންޓް ބަނދަރެއްގެ އިތުރުން އެއަރޕޯޓަކާއި ޔޮޓް މެރީނާއަކާއި ކްރޫޒް ހަބަކާއި ޑޮކްޔާޑް އަދި ބަންކަރިން ފެސިލިޓީއާއެކު ތަރައްޤީ ކުރެއްވުމެވެ.