އުއްމީދަކީ ސްކޫލު ކިޔެވުން ފެށުމުގެ ކުރިން އަމީނީމަގު ނިންމައި ބޭނުންކުރަން ފެށުން: ޑރ. މުއްޠަލިބު

ކުރިއަށް އޮތް ސްކޫލް ދެވަނަ ޓަރމްގެ ކިޔެވުން ފެށެންވާއިރަށް އަމީނީ މަގުގެ މަސައްކަތް ނިންމާ މަގު ބޭނުންކުރަން ފެށުމަށް މަސައްކަތްކުރައްވަމުން ގެންދަވާކަމަށް ޢިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

އަމީނީ މަގު ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން ނުނިމިއޮތް ބައިގެ މަސައްކަތް ފެށީ މިމަހުގެ 9 ވަނަ ދުވަހުއެވެ. 13 ސެގްމެންޓަކަށް ބަހާލައިގެން ކުރިއަށްގެންދާ އަމީނީ މަގު ތަރައްޤީކުރުމުގެ މަސައްކަތުގެ ދަށުން ސަރުކާރު ބަދަލުވިއިރު ނުނިމި އޮތީ ފަހު ދެ ސެގްމެންޓުގެ މަސައްކަތެވެ. އެއީ ޢިއްޒުއްދީން މަގު ދިވެހިރާއްޖޭގެ އަޑުން ފެށިގެން މާފަންނާވީ ސަރަހައްދެވެ.

އައު ސަރުކާރާއެކު އަމީނީ މަގުގެ މަަސައްކަތް އަންނަނީ ބާރު ދުވެލީގައި ކުރަމުންނެވެ. ރޯޑް ޑިވެލޮޕްމަންޓް ކޯޕަރޭޝަން، އާރުޑީސީއާ ހަވާލުކޮށްގެން ކުރިއަށްގެންދާ އެ މަސައްކަތް ވަޒީރު ވަނީ ބައްލަވާލައްވާފައެވެ.

އެއަށްފަހު ވިދާޅުވީ، އަމީނީ މަގަކީ ބޮޑެތި ބަސްތައް ދުއްވާ މަގަކަށްވުމާއެކު، އެ މަގުގެ ފަހު ދެ ސެގްމެންޓުގެ މަސައްކަތް ކުރަނީ، ކުރީގެ ބައިތަކާއި ޚިލާފަށް މަގު ފުޅާކޮށްކަމަށެވެ. އަދި އުންމީދަކީ ކުރިއަށް އޮތް ސްކޫލް ޓާމް ފެށުމުގެ ކުރިން މަގުގައި ތާރުއަޅާ މަގު ބޭނުން ކުރަން ފެށުންކަމަށްވެސް މުއްޠަލިބު ވިދާޅުވިއެވެ.

އަމީނީ މަގުގެ މިހާރު ހެދެމުންދާ ބަޔަކީ ބޮޑެތި ބަސް ދެކޮޅަށް ދުއްވާ ބަޔަކަށްވުމާއެކު މަގު ހެދިގެން ދަނީ އިތުރަށް ފުޅާކުރެވިގެންނެވެ. އުއްމީދަކީ ކުރިއަށް އޮތް ސްކޫލް ޓާރމް ފެށުމުގެ ކުރިން ތާރުއަޅާ މަގު ބޭނުންކުރަން ފެށުމެވެ. https://t.co/x5jJVCxoEN

— Abdulla Muththalib (@muththo) December 23, 2023

އަމީނީ މަގުގެ ފަހު ދެ ސެގްމެންޓުގެ މަސައްކަތް ފެށިތާ ވިއްސަކަށް ދުވަސް ފާއިތުވެދިޔައިރު، އެ މަސައްކަތުގެ ފަސްދޮޅަސް އިންސައްތައަށްވުރެ ގިނަ މަސައްކަތް މިހާރު ވަނީ ނިންމާލާފައެވެ. އެ މަސައްކަތް ޝެޑިއުލާ އެއްގޮތަށް ކުރިއަށްދާކަމަށް އާރްޑީސީން ވަނީ ފާހަގަކޮށްފައެވެ.

އާރްޑީސީން ބުނީ އެސަރަހައްދުގެ މަސައްކަތް އެހާ ހަލުވިކަމާއި އެކު ކުރިއަށް ގެންދެވެނީ އެސަރަހައްދުގައި ދިރިއުޅޭ މީހުން މަދުވުމުން ކަމަށެވެ. އަދި އެސަރަހައްދުގެ މަސައްކަތް އެއްކޮށް ނިމިގެންދާއިރު ލޭން ފުޅާވުމުގެ ސަބަބުން ބަސްރޫޓްތަކާއި މަގުބޭނުންކުރާ ފަރާތްކަށް ބޮޑު ލުއިފަސޭއެއް ލިބިގެންދާނެކަމަށްވެސް އާރުޑީސީން ބުންޏެވެ.

އާރްޑީސީން ބުނީ މިހާރު ކުރިއަށްދަނީ މަގުގެ ޕަންޕް ސްޓޭޝަންތައް ހެދުމުގެ މަސައްކަތް ކަމަށާއި، ބައެއް ޕަންޕް ސްޓޭޝަންތައް މިހާރު ޤާއިމްކޮށް ނިމިފައިވާކަމަށެވެ. އަދި އިތުރު 4 ޕަނަޕް ސްޓޭޝަން ހަދަން ޖެހޭކަމަށް އާރުޑީސީން ބުންޏެވެ.

މިހަފްތާގެ ތެރޭގައި އިއްޒުއްދީން މަގާއި އަމީނީ މަގު ގުޅޭ ކަންމަތީގައި މަގު ކޮނެގެން ކުރަންޖެހޭ ހުރިހާ މަސައްކަތެއްކޮށް މިހާރު ވަނީ ނިންމާލާފައެވެ. އާރުޑީސީން ބުނީ ކުރިއަށް އޮތް ހަފްތާގެ ތެރޭގައި މަގުގައި ތާރު އެޅުމުގެ މަސައްކަތް ކުރިއަށް ގެންދެވޭނެކަމަށެވެ.

އާރްޑީސީން ވިދާޅުވީ ބުނީ، މަގުގައި ކަނޑާ ކޮންމެ ގަހަކަށް އިތުރު ގަހެއް އެ މަގުގައި އިންދަމުން އަންނަކަމަށެވެ. އަދި މުސްތަގްބަލުގައި އެމަގުގައި އިންދޭ ގަސްތަކަކީ ރީތި ހިޔާދޭ ގަސްތަކަކަށް ވެގެން ދާނެކަމަށާއި، މަގުގައި އިންދަނީ ވަކި ވައްތަރެއްގެ ގަސްތަކެއް ކަމުން މާއަޅާ ދުވަސް ކޮޅެއްގައި ނަމަ ހިތްގައިމު ރީތި ހިތްފަސޭހަ މަގަކަށް އެމަގު ވާނެކަމަށްވެސް އާރުޑީސީން ބުންޏެވެ.

މިމަގުގެ މަސައްކަތް މިދިޔަ ސެޕްޓެމްބަރު މަހު މެދުކަނޑާލިއިރު މަސައްކަތް ނިމިފައި އޮތީ، އިއްޒުއްދީންމަގާއި ހަމައަށެވެ. އަމީނީ މަގުގެ މަސައްކަތް ކުރީ ސަރުކާރުގައި ލަހުން ކުރިއަށްދާތީ ގިނަ ބައެއްގެ ފާޑުކިޔުންވެސް އޭރު ޢަމާޒުވިއެވެ. ނަމަވެސް މިހާރު އެ މަގުގެ މަސައްކަތް ދަނީ ވަރަށް ހަލުވި ދުވެލީގައެވެ.

ސަރުކާރުން 84.4 މިލިއަން ރުފިޔާ ޚަރަދުކުރައްވައިގެން ކުރިއަށްގެންދާ އަމީނީ މަގު ތަރައްޤީކުރުމުގެ މަޝްރޫޢުގެ ދަށުން ޖުމްލަ 1.79 ކިލޯމީޓަރުގެ ސަރަހައްދެއް ތާރު އަޅައިގެން ޒަމާނީ ފެންވަރަށް ތަރައްޤީކުރެއެވެ.