ލުބުނާންގެ ވެރި ރަށް ބެއިރޫތަށް މި މަހުގެ ތިން ވަނަ ދުވަހު ދިން ޙަމަލާގައި ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތުގެ ދެވަނައަށް އެންމެ އިސްވެރިޔާ ޞާލިޙް އަލް ޢަރޫރީ ޝަހީދުކޮށްލި މައްސަލައިގައި ރައްދު ނުދީފިނަމަ، ޔަހޫދީންގެ އިތުރު ޙަމަލާތައް ލުބުނާނަށް އަމާޒުވާނެ ކަމަށް ލުބުނާނުގައި ޙަރަކާތްތެރިވާ ޙިޒްބުالله ޖަމާޢަތުގެ އިސްވެރިޔާ ޙަސަން ނަޞްރުﷲ ވިދާޅުވެއްޖެއެވެ. ނަޞްރުﷲ އެ ގޮތަށް ވިދާޅުވީ ޓީވީ މެދުވެރުކުރައްވައި ދެއްވި ޙިޠާބެއްގައެވެ.
ޞާލިޙް އަލް ޢަރޫރީ ޝަހީދުކޮށްލީ ބެއިރޫތުގެ ދެކުނަށް ޔަހޫދީން ދިން ވައިގެ ޙަމަލާއެއްގައެވެ. އެއީ ޔަހޫދީ އަސްކަރިއްޔާއާއި ޙިޒްބުاللهއާ ދެމެދު ތިން މަސް ދުވަސް ވަންދެން ޙަމަލާތައް ބަދަލުކުރުމަށްފަހު ބެއިރޫތަށް ދިން ފުރަތަމަ ޙަމަލާއެވެ.
އޮކްޓޫބަރު މަހުގެ ހަތް ވަނަ ދުވަހު ޔަހޫދީ ފައުޖުތަކާއި ޙަމާސް ޖަމާޢަތާއި ދެމެދު ކުރަމުންދާ ހަނގުރާމަ ފެށިތާ ދެ ދުވަސް ފަހުން އޮކްޓޫބަރު އަށް ވަނަ ދުވަހު ހިޒްބުﷲން ވަނީ ޔަހޫދީންނަށް އަމާޒުކޮށް ޗަރުގަދަ ޙަމަލާތަކެއް ދޭން ފަށައިފައެވެ. ނަޞްރުﷲ ވިދާޅުވި ގޮތުގައި ފަލަސްޠީނުގެ ދިފާޢުގައި ޔަހޫދީންނާ ދެކޮޅަށް 670އަށްވުރެ ގިނަ ޙަމަލާ އެ މުއްދަތުގެ ތެރޭގައި ޙިޒްބުﷲން ދިފައިވާނެއެވެ. އެ ޙަމަލާތަކުގައި ޔަހޫދީންގެ ގިނަ ޢަދަދެއްގެ އަސްކަރީ އުޅަނދުތަކާއި ޓޭންކުތައް ނައްތައިލައިފާނެ ކަމަށް ނަޞްރުالله ވިދާޅުވިއެވެ. އަދި އެ ޙަމަލާތަކުގައި ޒަޚަމުވި 2،000އަށްވުރެ ގިނަ ޔަހޫދީ ސިފައިންނަށް ހަސްފަތާލުން ފަރުވާދީފައިވާ ކަމަށާއި ޔަހޫދީންނަށް ލިބެމުންދާ ގެއްލުންތައް ސިއްރުކުރަމުންދާ ކަމަށް ވެސް އޭނާ ފާހަގަކުރެއްވިއެވެ.
ލުބުނާނާ ދެކޮޅަށް ހަނގުރާމައެއް ފަށައިފިނަމަ އެއީ ޔަހޫދީން ހަދާނެ ބޮޑު ގޯހެއް ކަމަށާއި އެ ކަމުގެ އަސަރު އެންމެ ފުރަތަމަ ކުރާނީ ޔަހޫދީންނަށް ކަމަށް ވެސް ނަޞްރުﷲ ވިދާޅުވިއެވެ. ޔަހޫދީން ލުބުނާނަށް ޙަމަލާދީ އެ ޤައުމާ ދެކޮޅަށް ހަނގުރާމައެއް ކުރަން އުޅެފިނަމަ ހިޒްބުﷲން އެއްވެސް ހައްދެއް ނެތި ޔަހޫދީންނާ ދެކޮޅަށް ޙަމަލާތައް ދޭނެ ކަމުގެ އިންޒާރު ނަޞްރުﷲ ވަނީ ދެއްވައިފައެވެ.