ފަލަސްޠީނުގެ ޣައްޒާގެ ދެކުނުގައި އޮންނަ ޚާން ޔޫނިސްގައި 2019 ވަނަ އަހަރު ޤާއިމުކޮށްފައިވާ ވަޤުތީ ހަސްފަތާލަކަށް ހަތް ޓަނުގެ އިންސާނީ އަދި ޞީއްޚީ ފަރުވާއަށް ބޭނުންވާ ސާމާނު ވައިގެ މަގުން ފަރަންސޭސިވިލާތާއި އުރުދުންގެ އަަސްކަރިއްޔާއިން ފޯރުކޮށްދީފިއެވެ.
ފަލަސްޠީނާ ސަރަޙައްދީ ރޮނގު ޙިއްޞާކުރާ އުރުދުނުން މީގެ ކުރިން ވެސް ޣައްޒާއަށް ވައިގެ މަގުން އެހީތެރިކަން ފޯރުކޮށްދީފައިވެއެވެ. ނަމަވެސް މިއީ ފަރަންސޭސިވިލާތުން ވައިގެ މަގުން ޣައްޒާއަށް އެހީތެރިކަން ފޯރުކޮށްދިން ފުރަތަމަ ފަހަރެވެ. ފަރަންސޭސިވިލާތުން މިހާތަނަށް 1،000 ޓަނުގެ އެހީގެ ސާމާނު ޣައްޒާއަށް ފޯރުކޮށްދީފައިވެއެވެ. ވައިގެ މަގުން ޣައްޒާއަށް އެހީތެރިކަން ފޯރުކޮށްދިނުމުގައި ޙަރަކާތްތެރިވީ ފަރަންސޭސިވިލާތުގެ މަތިންދާބޯޓަކާއި ޢުރުދުންގެ މަތިންދާބޯޓެކެވެ.
ފަލަސްޠީނުގައި ޔަހޫދީ ފައުޖުތަކުން ހިންގަމުންދާ ޢުދުވާނީ ޙަމަލާތަކާ ދެކޮޅު ހެދުމުގެ ގޮތުން އުރުދުނުން ޔަހޫދީ ދަޢުލަތަށް ކަނޑައަޅައިފައިވާ ސަފީރު އަނބުރާ ޤައުމަށް ވަނީ ގެނެސްފައެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް ދެމުންގެންދާ ޢުދުވާނީ ޙަމަލާތަކުގައި މިހާތަނަށް ފަލަސްޠީނުގެ 22،600 މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ހަނގުރާމައިގެ ސަބަބުން ޣައްޒާއަށް ބޭނުންވާ އިންސާނީ އެހީތެރިކަން ލިބުން ދަތިވެ، އެތައް ހާސް ބަޔަކު ވަނީ ޙާލުގައި ޖެހިފައެވެ. ފެނާއި ކާނާއާއި ބޭސްފަރުވާއަށް ބޭނުންވާ ސާމާނާއި ތެޔޮ ނުލިބި ޣައްޒާގެ ޢާންމުންނަށް ވަނީ ބޮޑެތި އުނދަގޫތަކަކާ ކުރިމަތިލާން ޖެހިފައެވެ.