ރަތް ކަނޑުން ކުރަމުންދިޔަ ދަތުރުތައް ދެކުނު އެފްރިކާގެ ކޭޕް އޮފް ގުޑް ހޯޕް ވަށާލައިގެން ކުރަން ނިންމުމުން ކަސްޓަމަރުންނަށް އިތުރު ގެއްލުންތަކެއް ލިބިދާނެ ކަމަށް ދުނިޔޭގެ ދެވަނައަށް އެންމެ ބޮޑު ޝިޕިން ކުންފުނި ކަމުގައިވާ މާސްކުން ބުނެފިއެވެ.
ޑެންމާކުގައި ހިންގާ މާސްކު ކުންފުނީގެ ބޯޓަކަށް ޔަމަނުގެ ޙޫޘީ ޖަމާޢަތުން ދިން ޙަމަލާއަކާ ގުޅިގެން ރަތް ކަނޑުން ދަތުރުކުރުން މަޑުޖައްސާލާނެ ކަމަށް މާސްކުން މީގެ ކުރިން ބުނެފައިވެއެވެ. އަދި ރަތް ކަނޑުގެ ބަދަލުގައި ދެކުނު އެފްރިކާގެ ކޭޕް އޮފް ގުޑް ހޯޕް ވަށަާލައިގެން ދަތުރުތައް ކުރުމަށް މާސްކުން ވަނީ ނިންމައިފައެވެ.
ދެކުނު އެފްރިކާ ވަށާލައިގެން ކުރާ ދަތުރުތަކަށް ގާތްގަނޑަކަށް އިތުރު 10 ދުވަސް ހޭދަވެއެވެ. އެއާއެކު ތެޔޮ ބޭނުންކުރަންޖެހޭ މިންވަރު އިތުރުވެ، އެހެނިހެން ޚަރަދުތައް ބޮޑުވާނެއެވެ. އެކަމާ ގުޅިގެން މާސްކުން ނެރެފައިވާ ބަޔާނެއްގައި ބުނެފައިވާ ގޮތުގައި ކޭޕް އޮފް ގުޑް ހޯޕް ވަށާލައިގެން ދަތުރުތައް ކުރަން ނިންމުމުން މުދާ ލިބުން ވެސް ލަސްވެގެންދާނެއެވެ.
ޙޫޘީ ހަނގުރާމަވެރިން ވަނީ ޖެނުއަރީ މަހުގެ އެއްވަނަ ދުވަހު ރަތް ކަނޑުގައި މާސްކްގެ ކޮންޓެއިނަރު އުޅަނދަކަށް ޙަމަލާ ދީފައެވެ. އެ ޙަމަލާ ދިން ހަނގުރާމަވެރިން ވަނީ ބޯޓަށް އަރަން ވެސް މަސައްކަތް ކޮށްފައެވެ.
ރަތް ކަނޑުން ދަތުކުރަމުންދާ އާގުބޯޓުތަކަށް ޙޫޘީން ދެމުންގެންދާ ޙަމަލާތަކާ ގުޅިގެން ދުނިޔޭގެ ގިނަ ޝިޕިން ކުންފުނިތަކުން އަންނަނީ ރަތް ކަނޑުން ދަތުރުކުރުން ހުއްޓައިލަމުންނެވެ. ހޫޘީންގެ ޙަމަލާތައް އަމާޒުކުރަނީ ރަތް ކަނޑުން ޔަހޫދީންގެ ރަށްތަކަށް ދަތުރުކުރަމުންދާ ބޯޓުތަކަށެވެ. ޙޫޘީން އެ ގޮތަށް ޢަމަލުކުރަނީ ޔަހޫދީ ފައުޖުތަކުން ފަލަސްޠީނުގެ ޣައްޒާގައި ހިންގަމުންދާ ޢުދުވާނީ ޙަމަލާތައް ހުއްޓާލުމަށް ބާރުއެޅުމުގެ ގޮތުންނެވެ.
ރަތް ކަނޑުގައި ދަތުރުކުރަމުންދާ ބޯޓުތައް ރައްކާތެރިކުރުމުގެ ގޮތުން އެމެރިކާ އިސްވެ ޑިސެމްބަރު 19 ވަނަ ދުވަހު އަސްކަރީ ޙަރަކާތްތަކެއް ފެށި ނަމަވެސް ގިނަ ޝިޕިން ކުންފުނިތަކުން އަދިވެސް ދަނީ ރަތް ކަނޑުގެ ބަދަލުގައި ކޭޕް އޮފް ގުޑް ހޯޕް ވަށާލައިގެން ދަތުރުތައް ކުރަމުންނެވެ. އަދި އެމެރިކާއިން އެކުލަވާލި އަސްކަރީ އިއްތިޙާދަށް އެހެން ޤައުމުތަކުން ލިބިފައިވަނީ ފިނި ތަރުހީބެކެވެ.