އީރާނުގެ އިރުދެކުނުގައި އޮންނަ ކަރްމާންގައި ދެ ބޮން ގޮއްވައިލައިގެން މި މަހުގެ ތިން ވަނަ ދުވަހު ދިން ޙަމަލާގެ ފަހަތުގައިވަނީ އައިއެސްގެ އަފްޣާނިސްތާން ގޮފި ކަމަށް އެމެރިކާއިން ބުނެފިއެވެ. އެ ޙަމަލާގައި 100އަށްވުރެ ގިނަ މީހުން މަރުވިއެވެ.
އީރާނުގައި ދިން ޙަމަލާތައް އަމާޒު ކޮށްފައި ވަނީ އަވަހާރަ ކޮށްލާފައިވާ އިސްލާމީ އިންޤިލާބީ ލަޝްކަރުގެ ކުރީގެ އިސްވެރިޔާ ޤާސިމް ސުލައިމާނީގެ މަޤުބަރާ ކައިރީގައެވެ. ބޮންތައް ގޮއްވައިލާފައި ވަނީ ސުލައިމާނީގެ މަރަށް ހަތަރު އަހަރު ފުރުން ފާހަގަ ކުރުމަށް އޭނާއަށް އިޙުތިރާމު އަދާ ކުރުމުގެ ގޮތުން ގިނަ ޢަދަދެއްގެ ބަޔަކު މަޤުބަރާ ކައިރިއަށް ޖަމާވެފައިވާ ވަޤުތެއްގައެވެ.
އެމެރިކާގެ ޖާސޫސީ އިދާރާއިން ވަނީ އެ ޙަމަލާއާ ގުޅޭ އެކި މަޢުލޫމާތުތައް ތަފާތު މަސްދަރުތައް ބޭނުންކޮށްގެން ޖަމާކޮށްފައެވެ. ނަމަވެސް އެ ކަމުގެ އިތުރު ތަފްޞީލުތަކެއް ޢާންމުކޮށްފައެއް ނުވެއެވެ. އެ ޙަމަލާގެ ޒިންމާ އައިއެސްސުން ވަނީ އުފުލައިފައެވެ. އަދި އެ ޙަމަލާ ދިނުމުގައި ބައިވެރިވި ކަމަށް ތުޙުމަތުކުރެވޭ 11 މީހެއް އީރާނުގެ ސަލާމަތީ ބާރުތަކުން ވަނީ ހައްޔަރުކޮށްފައެވެ.
މި މަހުގެ ތިން ވަނަ ދުވަހު އީރަނަށް ދިން ބޮމުގެ ޙަމަލާއަކީ 1979 ވަނަ އަހަރަށްފަހު އެ ޤައުމުގައި ދިން އެންމެ ވަރުގަދަ ޙަމަލާއެވެ. މީގެ ކުރިން ވެސް އައިއެސްސުން ވަނީ އީރާނުގައި ބޮމުގެ ޙަމަލާތަކެއް ދީފައެވެ. އެ ގޮތުން އީރާނުގެ ޝީއީންގެ ޒިޔާރަތަކަށް 2022 ވަނަ އަހަރު ދިން ޙަމަލާއާއި 2017 ވަނަ އަހަރު އެ ޤައުމުގެ އިސްލާމީ ޖުމްހޫރިއްޔާގެ ބާނީ އާޔަތުالله ރޫޙުالله ހާމަނާއީގެ މަޤްބަރާއަށް ދިން ބޮމުގެ ޙަމަލާގެ ޒިންމާ ވެސް އައިއެސްސުން ވަނީ އުފުލައިފައެވެ.
އީރާނަށް ދިން ޙަމަލާގެ އިތުރުން ފަލަސްޠީނުގެ ޣައްޒާގައި ޔަހޫދީން ކުރަމުންދާ ހަނގުރާމައާއި ރަތް ކަނޑުގައި ދަތުރުކުރާ ޔަހޫދީންގެ އާގުބޯޓުތަކަށް ޔަމަނުގެ ޙޫޘީ ޖަމާޢަތުން ދެމުންދާ ޙަމަލާތަކާއި ލުބުނާނުގެ ޙިޒްބުﷲ ޖަމާޢަތާއި ޔަހޫދީ ފައުޖުތަކާ ދެމެދު ބަދަލުކުރަމުންދާ ޙަމަލާތަކުގެ ސަބަބުން ސަރަޙައްދީ ހަމަނުޖެހުން ވަނީ އިތުރުވެފައެވެ.