ޖަނަވަރީ 1 ވަނަ ދުވަހު ޖަޕާނުގެ މެދުތެރޭގައި އޮންނަ އިޝިކަވާ ޕުރޮވިންސަށް އައި ބާރުގަދަ ބިންހެލުމުގައި މަރުވި މީހުންގެ ޢަދަދު 110އަށް އަރާފައިވާއިރު، ހާލުގައި ޖެހިފައިވާ އެތަކެއް ހާސް ބަޔަކަށް އިންސާނީ އެހީތެރިކަން ފޯރުކޮށްދޭން ކުރަމުުންދާ މަސައްކަތްތައް ފުޅާ ކުރަން މަސައްކަތް ފަށައިފިއެވެ. ރިކްޓަރ މިންގަންޑުން 7.6ގެ ބާރުމިނުގައި އައި ބިންހެލުމުގައި އެންމެ ބޮޑަށް ގެއްލުން ލިބިފައި ވަނީ އިޝިކަވާގެ ހޮކްރީކޫ ސަރަޙައްދަށެވެ.
އެ ސަރަޙައްދުގެ ގިނަ ޢިމާރާތްތައް ވެއްޓި، އިތުރު ޢިމާރާތްތަކަށް ބޮޑެތި ގެއްލުންތައް ލިބިފައިވާއިރު 22,000 ގެއަކުން ވަނީ ކަރަންޓުގެ ޚިދުމަތް ކެނޑިފައެވެ. މި ބިންހެލުމާ ގުޅިގެން ހާލުގައި ޖެހިފައިވާ މީހުންގެ ޢަދަދު 30,000 އަށް އަރާއިރު، އެ މީހުންނަށް އިންސާނީ އެހީތެރިކަން ފޯރުކޮށްދޭން ކުރަމުންދާ މަސައްކަތްތައް އެންމެ އެކަށީގެންވާ ދުވެއްޔެއްގައި ކުރެވެމުން ނުދާ ކަމުގައި ރިޕޯޓުތައް ބުނެއެވެ.
ބިންހެލުމުގައި ވެއްޓިފައިވާ ޢިމާރާތްތަކުގެ ދަށުގައި އަދިވެސް އިތުރު 200 އެއްހާ މީހުން ތާށިވެފައިވާ ކަމަށް ބެލެވޭއިރު، އެ މީހުން ދިރިތިއްބާ ސަލާމަތް ކުރަން ދަނީ މަސައްކަތް ކުރަމުންނެވެ. ނަމަވެސް، ބިންހެލުމުގައި މަގުތައް ސުންނާފަތިވުމާއި، އެ ސަރަޙައްދަށް ބޯކޮށް ވާރޭ ވެހެމުން ދިޔުމާ ގުޅިގެން އެ މަސައްކަތަށް ވަނީ ހުރަސް އެޅިފައެވެ. އަދި ބައެއް ސަރަޙައްދުތަކުގައި ކިސަޑު ފޭބުމުގެ ހާދިސާތައް ހިނގާފައިވެއެވެ.
ބިންހެލުމާ ގުޅިގެން ގެއްލިފައިވާ ކަމަށް ބެލެވޭ 200 މީހުން ހޯދުމަށް ޖަޕާނުގެ ސެލްފް-ޑިފެންސް ފޯސްގެ 5,000 އެއްހާ އޮފިސަރުން މަސައްކަތް ކުރަމުންދާއިރު، އެ ސަރަޙައްދަށް އިތުރު 400 އޮފިސަރުން ފޮނުވަން ޖަޕާނުގެ ސަރުކާރުން ދަނީ މަސައްކަތް ކުރަމުންނެވެ. ރަށްތަކުގައި ތާށިވެފައިވާ މީހުން ސަލާމަތް ކުރުމަށް ހެލިކޮޕްޓަރުތައް ވެސް ދަަނީ ބޭނުން ކުރަމުންނެވެ.
ބިންހެލުމުގައި ހާލުގައި ޖެހިފައިވާ ގިނަ ޢަދަދެއްގެ ބަޔަކަށް ކާބޯތަކެއްޗާއި ފެނާއި އިންސާނީ އެހީގެ ސާމާނު ފޯރުކޮށްދިނުމަށް ވަޖިމާގައި މަރުކަޒުތަކެއް ގާއިމު ކޮށްފައިވާއިރު، ގިނަ ޢަދަދެއްގެ ބަޔަކު އަދިވެސް ނިދަނީ މަގުތަކުގައި ޖަހާފައިވާ ޓެންޓުތަކާއި އެ މީހުންގެ ކާރުތަކުގައެވެ.
ޢިމާރާތްތަކުގެ ދަށުގައި ތާށިވެފައިވާ މީހުން ސަލާމަތް ކުރަމުންދާ މަސައްކަތްތަކަށް ކުރިއަށް އޮތް ހަފުތާގައި އިތުރު ގޮންޖެހުންތަކާ ކުރިމަތިވާނެ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އެ އިދާރާއިން ބުނީ، ޖަނަވަރީ 7 އާއި 8 ވަނަ ދުވަހު އެ ސަރަޙައްދަށް ބޯކޮށް ސްނޯ ފައިބާނެ ކަމަށް ބެލެވޭ ކަމަށާއި، އެއާއެކު ބިންގަނޑު ކެނޑުމުގެ ހާދިސާތައް ހިނގުމަކީ އެކަށީގެންވާ ކަމެއް ކަމުގައެވެ. ޖަނަވަރީ 1 ވަނަ ދުވަހު އައި ބިންހެލުމާ ގުޅިގެން އެ ސަރަޙައްދަށް އަދިވެސް އިތުރު ލޮޅުންތައް އަންނަމުންދެއެވެ.
ޖަޕާނަށް އެ ފަދަ ބާރުގަދަ ބިންހެލުމެއް އެންމެ ފަހުން އައިސްފައި ވަނީ 2011 ވަނަ އަހަރުއެވެ. އެ ބިންހެލުމުގެ ސަބަބުން އުފެދުނު ސުނާމީގައި 20,000އެއްހާ މީހުން މަރުވިއެވެ. އަދި، ގިނަ ޢަދަދެއްެގެ ގެދޮރާއި ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބުނެވެ. އެ ބިންހެލުމާ ގުޅިގެން ފުކުޝިމާގައި ހުންނަ ނިއުކްލިޔަރ ހަކަތަ އުފައްދާ ޕްލާންޓަކަށް ބޮޑެތި ގެއްލުންތަކެއް ލިބި، ނިއުކްލިޔަރ ކާރިސާއެއް ހިނގުމުގެ ބިރު ހީވިއެވެ.