އެމެރިކާގެ ޚާރިޖީ ވަޒީރު އެންތަނީ ބްލިންކަން ތުރުކީވިލާތަށް ވަޑައިގަންނަވައި އެ ޤައުމުގެ ރައީސް ރަޖަބް ޠައްޔިބް އުރްދުޣާނާ ބައްދަލު ކުރައްވައިފިއެވެ. އޭނާ ތުރުކީވިލާތަށް ވަޑައިގަންނަވާފައި ވަނީ، ޔަހޫދީން ޣައްޒާގެ މުސްލިމުންނާ ދެކޮޅަށް ފަށާފައިވާ ޢުދުވާނާ ގުޅޭ ގޮތުން މަޝްވަރާ ކުރުމަށް ތުރުކީވިލާތުގެ އިތުރުން ޢަރަބި ޤައުމުތަކާއި ވިލާތުގެ ބައެއް ޤައުމުތަކަށް ކުރައްވާ ދަތުރުފުޅެއްގައެވެ.
ތުރުކީވިލާތަކީ ޔަހޫދީންގެ ޢުދުވާނާ ދެކޮޅަށް ފާޅުގައި އެންމެ އަޑުހަރުކޮށް ފާޑުކިޔަމުންދާ އެއް ޤައުމެވެ. އުރްދުޣާންގެ އިތުރުން ބްލިންކަންގެ ދަތުރުފުޅުގައި ތުރުކީވިލާތުގެ ޚާރިޖީ ވަޒީރު ހާކާން ދިފާންއާ ވެސް ބައްދަލު ކުރައްވާފައިވެއެވެ. އެ ބައްދަލުވުމުގައި މަޝްވަރާ ކުރައްވާފައިވާ ކަންތައްތަކުގެ ތެރޭގައި ޣައްޒާގެ މުސްލިމުންނަށް ޔަހޫދީން ކުރިމަތި ކުރުވާފައިވާ އިންސާނީ މުސީބާތާއި، ޣައްޒާއަށް އިންސާނީ އެހީގެ ސާމާނު އެތެރެ ކުރުން ހިމެނެއެވެ.
މީގެ އިތުރުން، ބްލިންކަން ވަނީ ސްވިޑްންނަށް ނޭޓޯގެ މެންބަރު ކަން ދިނުމަށް ކުރަމުންދާ މަސައްކަތްތަކަށް ތުރުކީވިލާތުގެ އެހީތެރިކަން ހޯދަން ވަކާލާތު ކުރައްވާފައެވެ. ސްވިޑްންނަށް ނޭޓޯގެ މެންބަރު ކަން ދިނުމަށް އިޢުތިރާޒެއް ނެތް ކަމަށް ތުރުކީވިލާތުގެ ޤާނޫނު ހަދާ މަޖިލީހުން ހުސްވި މަހު ނިންމާފައިވީ ނަމަވެސް، އެ ކަމުގައި ތުރުކީވިލާތުގެ ސަރުކާރުގެ ލަސްތަކެއް ހުރި ކަމަށް އެމެރިކާއިން ޤަބޫލު ކުރެއެވެ.
ބްލިންކަން ތުރުކީވިލާތަށް ކުރެއްވި ދަތުރުފުޅުން ފާހަގަވީ ކަމަކީ، ޣައްޒާގެ މުސްލިމުންނަށް ޔަހޫދީންގެ ފަރާތުން ކުރިމަތިވެފައިވާ ނިކަމެތި ހާލުން އެ މީހުން ސަލާމަތް ކުރުމަށްވުރެ، އެމެރިކާގެ ހަންފެތުރުން އިތުރު ކުރަން އެ ޤައުމުން އިސްކަންދޭ ކަމެވެ. އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާނަށް އެމެރިކާއިން އެހީތެރިކަން ފޯރުކޮށްދެމުންދާ ކަން މުޅި ދުނިޔެ ވެސް ގަބޫލު ކުރެއެވެ. ޣައްޒާގެ މުސްލިމުން ދިރިއުޅޭ ގެދޮރާއި ހަސްފަތާލުތަކަށް ޔަހޫދީން އަޅަމުންދާ ބޮންތަކާއި މިސައިލްތަކަކީ އެމެރިކާއިން ފޯރުކޮށްދީފައިވާ ތަކެއްޗެެވެ.
ތުރުކީވިލާތަށް ފަހު ބްލިންކަން ވަނީ ގްރީސްއަށް ވަޑައިގަންނަވާފައެވެ. އަދި، އެއަށްފަހު ޢަރަބި ބައެއް ޤައުމުތަކާއި ޔަހޫދީ ދަޢުލަތަށް ވެސް އޭނާ ވަޑައިގަންނަވާނެއެވެ. މި ދަތުރުފުޅުގައި އޭނާ ހުޅަނގު އައްސޭރިއަށް ވަޑައިގެންނެވުމަށް ހަމަޖެހިފައިވާ ކަމުގައި ވެސް ވައިޓް ހައުސުން ބުނެއެވެ. ބޭނުމަކީ، ހުޅަނގު އައްސޭރީގައި ޙަރަކާތްތެރިވާ މުޖާހިދުންގެ ޖަމާޢަތްތަކުން ޔަހޫދީންނާ ދެކޮޅަށް ތެދުވުން ހުއްޓުވަން ފަލަސްޠީނުގެ ސަރުކާރަށް ބާރު އެޅުމެވެ.
ޣައްޒާގައި ޔަހޫދީން ހިންގަމުންދާ ޢުދުވާނުގައި ސަރަޙައްދީ ބާރުތަކުން ބައިވެރިވެ، މެދުއިރުމަތީގައި ބޮޑު ހަނގުރާމައެއް ފެށުމަކީ އެމެރިކާއިން ކަންބޮޑުވާ ކަމެކެވެ. އެއީ، ޔަހޫދީންގެ ކުރިމަގަށް އޮތް ބޮޑު ނުރައްކަލެއްގެ ގޮތުގައި އެމެރިކާއިން ދެކެއެވެ. އެ ފަދަ ހަނގުރާމައެއް ފެށުމުގެ ކޮޅުމަތި މިހާރު ވެސް ފެންނަމުންދާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
ލުބްނާނުގައި ހަރަކާތްތެރިވާ ޙިޒްބުالله ޖަމާޢަތާއި، ޔަމަނުގައި ހަރަކާތްތެރިވާ ހޫޘީން މިހާރު ވެސް ވަނީ ޔަހޫދީންނާ ދެކޮޅަށް ހަތިޔާރު އުފުލާފައެވެ. މި ކަމުގައި އީރާނުން ވާގިވެރިވެދޭ އެހެން ޖަމާޢަތްތަކުން ބައިވެރިވެއްޖެ ނަމަ، ޔަހޫދީންނަށް އޮތް ނުރައްކާތެރި ކަން އިންތިހާއަށް އިތުރުވެގެން ދާނެ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނުގައި ޣައްޒާގައި ޝަހީދު ކޮށްލާފައިވާ މީހުންގެ ޢަދަދު ވަނީ 22,700 އަށް އުފުލިފައެވެ. މިއީ، އެމެެރިކާއަށް އަދި އެ ޤައުމުގެ ޖައްބާރު ރައީސް ޖޯ ބައިޑަނަށް ފެންނަ ޢަދަދެއް ނޫނެވެ. ފެންނަ މަންޒަރެއް ނޫނެވެ. އޭނާ ކަންބޮޑު ވަނީ ޔަހޫދީންގެ އިތުރު ބަޔަކު މަރުވެދާނެތީއެވެ.