ޔޫކްރޭންގެ އިރުމަތީގައި އޮންނަ ޕޮކްރޮވްސްކްއާއި އެ ސިޓީގެ ވަށައިގެންވާ ސަރަޙައްދުތަކަށް ރަޝިޔާއިން ދިން މިސައިލް ޙަމަލާއެއްގައި 11 މީހުން މަރުވެ 10 މީހުން ޒަޚަމްވެއްޖެއެވެ. މަރުވި މީހުންގެ ތެރެއިން ފަސް މީހުންނަކީ ކުޑަކުދިންނެވެ.
އެ ޙަމަލާގެ ސަބަބުން ސުންނާފަތިވެފައިވާ ޢިމާރާތްތަކާއި އަނދާ ހުލިވެފައިވާ އުޅަނދުތައް ނަގައި ސާފުކުރުމުގެ މަސައްކަތް ޔޫކްރޭންގެ ކަމާ ބެހޭ ފަރާތްތަކުން އަންނަނީ ކުރަމުންނެވެ. ޕޮކްރޮވްސްކް ސިޓީއަކީ ރަޝިޔާގެ ދޮންޔެސްކާ ގާތްގަނޑަކަށް 80 ކިލޯމީޓަރު ދުރުގައި އޮންނަ ސިޓީއެކެވެ.
އެ ޙަމަލާއާ ގުޅިގެން ޔޫކްރޭންގެ ރައީސް ވޮލިޑީމިއަރ ޒެލެންސްކީ ދެއްވި ވީޑިއޯ ޚިޠާބުގައި ވިދާޅުވީ އެ ޙަމަލާ އަމާޒުކޮށްފައިވަނީ ޢާންމުންގެ ގެތަކަށް ކަމަށާއި އެ ޙަމަލާގެ ރައްދަކާ ރަޝިޔާއިން ކުރިމަތިލާން ޖެހޭނެ ކަމަށެވެ. އެ ޙަމަލާއާ ގުޅިގެން ރަޝިޔާގެ ސަލާމަތީ ބާރުތަކުން މިހާތަނަށް އެއްވެސް އެއްޗެއް ބުނެފައެއް ނުވެއެވެ.
2022 ވަނަ އަހަރުގެ ފެބްރުއަރީ މަހު ރަޝިޔާއިން ޔޫކްރެއިނާ ދެކޮޅަށް ފެށި ހަނގުރާމައިގައި ޙަމަލާތައް އަމާޒުކުރަނީ ޔޫކްރެއިނުގެ އަސްކަރީ މަޤާމުތަކަށް ކަމަށް ރަޝިޔާއިން ބުނެއެވެ. ފާއިތުވި ދެ ހަފުތާގެ ތެރޭގައި ޔޫކްރޭނަށް ދިން ޙަމަލާތައް ރަޝިޔާ ސިފައިން ވަނީ ވަރުގަދަކޮށްފައެވެ. ރައްދުގައި ރަޝިޔާގެ ދެކުނުގައި ޔޫކްރެއިންގެ ސަރަޙައްދީ ރޮނގު ކައިރީގައި އޮންނަ ބިޔެލްގޮރޮދަށް ޔޫކްރެއިނުން ވަނީ ވަރުގަދަ ޙަމަލާތަކެއް ދީފައެވެ.