އެެމެރިކާގެ ޚާރިޖީ ވަަޒީރު އެންތަނީ ބްލިންކަން މެދުއިރުމަތީގެ ބައެއް ޤައުމުތަކަށް މިހާރު ކުރައްވަމުން ގެންދަވާ ދަތުރުފުޅުގައި ޣައްޒާގެ ވެރިކަމުން ޙަމާސް ޖަމާޢަތް ދުރު ކުރުމަށް ޢަރަބި ޤައުމުތަކަށް ބާރުއަޅުއްވައިފިއެވެ. އޭނާ މެދުއިރުމައްޗަށް ދަތުރުފުޅެއް ފައްޓަވާފައި ވަނީ ލުބްނާނުގެ ވެރިރަށް ބެއިރޫތަށް ޔަހޫދީ ފައުޖުން ދިން ޙަމަލައެއްގައި ޙަމާސް ޖަމާޢަތުގެ ދެވަނައަށް އެންމެ އިސްވެރިޔާ ޞާލިޙް އަލް-ޢާރޫރީ އަވަހާރަ ކޮށްލުމުން މެދުއިރުމަތީގެ މަސްރަޙު ހޫނުވެފައިވާ ދަނޑިވަޅެއްގައެވެ.
އެ ޙަމަލާގެ ބަދަލު ހިފުމުގެ ގޮތުން ލުބްނާނުގައި ޙަރަކާތްތެރިވާ ޙިޒްބުالله ޖަމާޢަތުން ދަނީ ޔަހޫދީންގެ ރަށްތަކަށް އަމާޒުކޮށް ވަރުގަދަ ޙަމަލަތަކެއް ދެމުންނެވެ. އަދި ޔަމަނުގައި ހަރަކާތްތެރިވާ ހޫޘީ ޖަމާޢަތުން ދަނީ ރަތް ކަނޑު ހުރަސްކޮށް ޔަހޫދީންގެ ރަށްތަކަށް މުދާ ގެންދާ އުޅަނދުފަހަރަށް ޙަމަލަ ދެމުންނެވެ.
މެދުއިރުމަތީގެ މަސްރަޙު ފިނި ކުރުމުގެ ނަމުގައި އެ ސަރަޙައްދަށް ބްލިންކަން ކުރައްވަމުން ގެންދަވާ ދަތުރުފުޅުގައި އޭނާ ފުރަތަމަ ވަޑައިގަންނަވާފައި ވަނީ އުރުދުނަށެވެ. އެ ޤައުމަށް ވަޑައިގަންނަވައި އޭނާ ވަނީ ރަސްގެފާނު ޢަބްދުالله ބިން އަލްޙުސައިން ދެވަނައާ ބައްދަލު ކުރައްވާފައެވެ. އެ ބައްދަލުވުމުގައި އޭނާ އެންމެ ބޮޑަށް ބާރުއަޅުއްވާފައި ވަނީ ޣައްޒާގެ ވެރިކަމުން ޙަމާސް ޖަމާޢަތް ދުރު ކުުރުމަށް ޢަރަބި ޤައުމުތަކުގެ އެހީތެރިކަން ހޯއްދެވުމަށެވެ.
އެ ބައްދަލުވުމުގައި ވާހަކަފުޅު ދައްކަވަމުން ޢަބްދުالله ރަސްގެފާނު ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާން ހުއްޓުވަން އިތުރު މަސައްކަތްތަކެއް ކުރުމަށް އެމެރިކާއަށް ބާރު އަޅުއްވާފައެވެ. އަދި ޢުދުވާންތައް ހުއްޓައިނުލައި ދެމިގެންދާ ނަމަ ޔަހޫދީންނަށް އިތުރު ނުރައްކާތަކަކާ ކުރިމަތިވާނެ ކަމުގެ އިންޒާރު އޭނާ ދެއްވިއެވެ.
ބްލިންކަން ވަނީ އުރުދުންގެ ޚާރިޖީ ވަޒީރު އައިމަން އަލް-ޞަފްދީއާ ވެސް ބައްދަލު ކުރައްވާފައެވެ. އެ ބައްދަލުވުމުގައި ވެސް ބްލިންކަން ވަނީ ޔަހޫދީން ބޭނުންވާ ގޮތަށް ޙަމާސް ޖަމާޢަތް ނައްތައިލުމަށް ފަހު ޣައްޒާގެ ވެރިކަން ބައްޓަން ކުރާނެ ގޮތަކާ މެދު އުރުދުންގެ ޚިޔާލު ހޯއްދަވާފައެވެ. އަދި ފަލަސްޠީނާއި ޔަހޫދީންގެ މިނިވަން ދެ ދަޢުލަތް ގާއިމު ކުރުމާ ގުޅޭ ގޮތުން ވެސް ދެ ބޭފުޅުން ވާހަކަފުޅު ދައްކަވާފައިވެއެވެ.
އޭނާގެ ދަތުރުފުޅާ ގުޅޭ ގޮތުން ވާހަކަ ދައްކަމުން ޣައްޒާގައި ގެދޮރުނެތިފައިވާ ރެފިއުޖީން ވަނީ ފަލަސްޠީނުގެ މިނިވަން ދަޢުލަތެއް ގާއިމު ކޮށްދިނުމަށް މަސައްކަތް ކުރަން އެމެރިކާއިން ވެފައިވާ ވަޢުދު ހަނދާން ނެތުނީތޯ ސުވާލު އުފައްދާފައެވެ. "އޭނާގެ ދަތުރުން ފައިދާތަކެއް ލިބޭނެ ކަމަށް އުންމީދު ކުރަން. އ.ދގެ ޤަރާރުތަކާ އެއްގޮތަށް ފަލަސްޠީނުގެ މިނިވަން ދަޢުލަތެއް ގާއިމު ކުރެވޭ ދުވަހެއް ދެކެން ބޭނުން. އެެމެރިކާއިން ވެސް އެ ކަމަށް ގޮވައިލަމުން ގޮސްފައިވޭ،" ނޫސްވެރިންނާ ވާހަކަަދެއްކި ޣައްޒާގެ ރައްޔިތެއް ކަމުގައިވާ މޫސާ އަލް-ޢަޠަވްނާ ބުންޏެވެ.
އުރުދުނަށް ބްލިންކަން ކުރެއްވި ދަތުރުފުޅުގައި އޭނާ ވަނީ ދުނިޔޭގެ ކާބޯތަކެއްޗާ ބެހޭ ޕުރޮގުރާމުގެ ގުދަނަކަށް ވެސް ވަޑައިގަންނަވާފައެވެ. އެއީ، ފަލަސްޠީނުގައި ހާލުގައި ޖެހިފައިވާ 2.3 މިލިޔަނެއްހާ މުސްލިމުންނަށް އެހީތެރިކަން ފޯރުކޮށްދިނުމަށް ޤައުމުތަކުން ފޮނުވާފައިވާ ކާބޯތަކެތި ރައްކާ ކޮށްފައިވާ ގުދަނެކެވެ. ނަމަވެސް، އެ ތަކެތި ޣައްޒާއަށް ވައްދަން ޔަހޫދީންް ދަނީ ހުރަސް އަޅަމުންނެވެ. އުރުދުންނަށް ފަހު ބްލިންކަން ދެން ވަޑައިގަންނަވާނީ ޤަޠަރާއި އެކުވެރި ޢަރަބި އިމާރާތަށެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 22,835 އަށް އުފުލިފައެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް ޔަހޫދީ ފައުޖުން ވަނީ އިތުރު 113 މީހުން ޝަހީދު ކޮށްލައި، 250 އަށްވުރެ ގިނަ މީހުން ޒަޚަމު ކޮށްލާފައެވެ. ޝަހީދު ކޮށްލާފައިވާ މީހުންގެ ތެރޭގައި ގިނައީ ކުޑަކުދިންނާއި އަންހެނުން ކަން ފާހަގަ ކޮށްލަން ޖެހެއެވެ.