ބަންގްލަދޭޝްގެ ޢާންމު އިންތިޚާބުގެ ވޯޓުލުން ޖަނަވަރީ 7 ވަނަ ދުވަހު ނިމިފައިވާއިރު، މި އިންތިޚާބުގައި ވޯޓުލާފައި ވަނީ ވޯޓުލުމުގެ ޙައްޤު ލިބިފައިވާ މީހުންގެ ތެރެއިން އެންމެ 40 އިންސައްތަ މީހުން ކަން އެ ޤައުމުގެ އިންތިޚާބީ އިދާރާއިން ބުނެފިއެވެ. ވޯޓުލުމުގެ ޙައްޤު ލިބިފައިވާ މީހުންގެ ޢަދަދު 120 މިލިޔަނަށް އެރި ނަމަވެސް، މަދު ޢަދަދެއްގެ ބަޔަކު އިންތިޚާބުގައި ބައިވެރިވެފައި ވަނީ ބަންގްލަދޭޝްގެ އިދިކޮޅު ޕާޓީން އިންތިޚާބު ބޮއިކޮޓް ކުރުމާ ގުޅިގެންނެވެ.
މަދު ޢަދަދެއްގެ ބަޔަކު ވޯޓުގައި ބައިވެރިވެފައިވީ ނަމަވެސް، ވެރިކަން ކުރާ އަވާމީ ލީގްގެ ބޮޑުވަަޒީރު ޝައިޚް ހަސީނާ ހަތަރު ވަނަ ދައުރެއް ކާމިޔާބު ކުރުމުގެ ފުރުޞަތު ބޮޑު ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އިންސާނީ ޙައްޤުތަކަށް ވަކާލާތު ކުރާ ޖަމުޢިއްޔާތަކުން ވަނީ، އެންމެ ޕާޓީއަކުން ވެރިކަން ކުރާ ސަގާފަތެއް އަވާމީ ލީގުން ގާއިމުކޮށްފައިވާ ކަމަށް ބުނެ، ހަސީނާގެ ސަރުކާރަށް ފާޑުކިޔުންތައް އަމާޒުކޮށްފައެވެ.
ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިޔާގެ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ން އިންތިޚާބު ބޮއިކޮޓް ކޮށްފައިވާއިރު، ވޯޓުގެ ކުރިން ބަންގްލަދޭޝްގެ އެކި ކަންކޮޅުތަކުގައި ހަމަނުޖެހުންތަކެއް ހިނގާފައިވެއެވެ. ވޯޓުލާ ބައެއް މަރުކަޒުތަކުގައި ހުޅުޖަހައި ޙަމަލަދީފައިވާއިރު، ރޭލެއްގައި ވެސް ރޯކޮށްލާފައިވެއެވެ. އެ ހާދިސާގައި ހަތަރު މީހަކު ފިހިގެން މަރުވިވެފައިވާއިރު، އޭގެ ތެރޭގައި ކުޑަ ދެ ކުދިން ވެސް ހިމެނެއެވެ.
ވޯޓުލާ ހަތް މަރުކަޒެއްގައި ވޯޓުލުން ހުއްޓައިލަން ޖެހުނު ކަމުގައި ވެސް ރިޕޯޓުތައް ބުނެއެވެ. އަދި، މަސްލަޙަތު ނަގައިލާ އަމަން ބަލަހައްޓާ އޮފިސަރަކަށް ބިރުދެއްކުމާ ގުޅިގެން ވެރިކަން ކުރާ އަވާމީ ލީގުގެ ކެނޑިޑޭޓެއްގެ ކެނޑިޑެސީ ބާޠިލު ކުރަން ޖެހުނު ކަމުގައި ވެސް އެ ޤައުމުގެ އިންތިޚާބީ އިދާރާއިން ހާމަކުރިއެވެ.
މިއީ، 1971 ވަނަ އަހަރު ބަންގްލަދޭޝަށް މިނިވަން ކަން ލިބުނު ފަހުން އެ ޤައުމުގައި އާންމު އިންތިޚާބެއް ބާއްވާފައިވާ 12 ވަނަ ފަހަރެވެ. އެ ޤައުމުގެ އިންތިޚާބާ ބެހޭ އިދާރާގެ ރައީސް ކާޖީ ހަބީބުލް އައްވަލް ވިދާޅުވީ އިންތިޚާބުގައި ވޯޓުލާފައި ވަނީ އެންމެ 40 އިންސައްތަ މީހުން ކަމުގައެވެ. މިއީ، 2018 ވަނަ އަހަރު އެ ޤައުމުގައި ބޭއްވި އާންމު އިންތިޚާބާ އަޅައިބަލާއިރު ދެބައިކުޅަ އެއްބައި މަދު ޢަދަދެކެވެ. ޖަނަވަރީ 8 ވަނަ ދުވަހު އިންތިޚާބުގެ ވަގުތީ ނަތީޖާ އިޢުލާނު ކުރެވޭނެ ކަމަށް ބެލެވޭ ކަމުގައި ވެސް އޭނާ ވިދާޅުވިއެވެ.
ފާއިތުވި 15 އަހަރު ބަންގްލަދޭޝްގައި ވެރިކަން ކުރައްވާފައިވާ ހަސީނާ ވަނީ އެ ޤައުމުގެ އަންނައުނު އުފައްދާ ސިނާއަތް ފުޅާކޮށް، އިޤުތިޞާދަށް ބޮޑެތި ކުރިއެރުންތަކެއް ހޯއްދަވައިދެއްވާފައެވެ. ނަމަވެސް، އޭނާގެ ސަރުކާރުން އިންސާނީ ޙައްޤުތަކަށް އަރައިގަންނަމުންދާ ކަމާއި، ޚިޔާލު ފާޅު ކުރުމާއި އިދިކޮޅު ހަރަކާތްތަކަށް ހުރަސް އަޅަމުންދާ ކަމުގައި އިންސާނީ ޙައްޤުތަކަށް ވަކާލާތު ކުރާ ޖަމުޢިއްޔާތަކުން ބުނެއެވެ.
170 މިލިޔަން މީހުންގެ އާބާދީއެއް އޮންނަ ބަންގްލަދޭޝްގެ އާންމު އިންތިޚާބުގައި 2,000 އެއްހާ ކެނޑިޑޭޓުން ވާދަ ކުރެއްވިއެވެ. ބަންގްލަދޭޝްގެ ޤާނޫނު ހަދާ މަޖިލީހުގެ 300 ގޮނޑިއަށް ވާދަކުރައްވާ މި އިންތިޚާބަށް ކުރިމަތިލާފައިވާ ކެނޑިޑޭޓުންގެ ތެރެއިން 5 އިންސައްތައަކީ އަންހެނުންނެވެ. މި އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ޢަދަދު 120 މިލިޔަނަށް އަރާއިރު އޭގެ ތެރެއިން 15 މިލިޔަނަކީ އަލަށް ވޯޓުލާ މީހުންނެވެ.