އަސްކަރީ ތަމްރީނުތަކާ ގުޅިގެން އެއްވެސް ރައްދެއް ދީފިނަމަ ދެކުނު ކޮރެޔާއަށް އަސްކަރީ ޙަމަލާއެއް ދީފާނެ ކަމުގެ އިންޒާރު އުތުރު ކޮރެޔާގެ އެންމެ އިސްވެރިޔާ ކިމް ޖޮންގް އުންގެ ދައްތަ ކިމް ޔޯ ޖޮންގް ދީފިއެވެ. ޔޯ އެ ގޮތަށް ވިދާޅުވެފައިވަނީ ދެ ކޮރެޔާ ގުޅޭ ސަރަޙައްދީ ރޮނގު ކައިރީގައި އުތުރު ކޮރެޔާއިން ބޮން ގޮއްވާތާ ވިދިވިދިގެން ތިން ދުވަސް ފާއިތުވެފައިވަނިކޮށެވެ.
އަސްކަރީ ޙަމަލާއެއް ދީފާނެ ކަމުގެ އިންޒާރު އުތުރު ކޮރެޔާއިން ދިނީ ދެ ޤައުމުގެ ދެމެދުގައި މައްސަލަ ބޮޑުވެފައިވާ ކަނޑުގެ ސަރަޙައްދުގައި ޖަނަވަރީ މަހުގެ 6 ވަނަ ދުވަހު އުތުރު ކޮރެޔާއިން 60 ބޮން ގޮއްވައިލައިފައިވާ ކަމަށް ދެކުނު ކޮރެއާގެ އަސްކަރިއްޔާއިން ބުނުމުންނެވެ. އޭގެ ކުރިން ޖަނަވަރީ މަހުގެ 5 ވަނަ ދުވަހު އުތުރު ކޮރެޔާއިން ވަނީ އެ ސަރަޙައްދުގައި 200އަށްވުރެ ބޮން ގޮއްވައިލައިފައެވެ. އެ ދުވަހު ދިން ބޮމުގެ ޙަމަލާތައް ދިނީ އުތުރު ކޮރެޔާގެ ސަރަޙައްދީ ރޮނގު ކައިރީގައި އޮންނަ ދެކުނު ކޮރެޔާގެ ޔެއޮންޕިއޮންގުން މީހުން ހުސްކުރަން އަންގައިފައިވަނިކޮށެވެ. ޖަނަވަރީ މަހުގެ 7 ވަނަ ދުވަހު ވެސް އުތުރު ކޮރެޔާއިން ވަނީ އެ ސަރަޙައްދުގައި ގާތްގަޑަކަށް 90 ބޮން ގޮއްވާލައިފައެވެ.
ސަރަޙައްދީ ރޮނގު ކައިރީގައި ހަމަނުޖެހުން އުފެދޭ އަސްކަރީ ތަމްރީނުތައް ކުރިއަށް ނުގެންދިއުމަށް ދެކުނު ކޮރެޔާއިން ވަނީ އުތުރު ކޮރެޔާއަށް އިލްތިމާސްކޮށްފައެވެ. ދެ ޤައުމުގެ އަސްކަރީ ތަމްރީނުތައް ކުރިއަށް ގެންދާ ކޮންމެ ފަހަރަކު ދެ ޤައުމުގެ ދެމެދުގައި ހަނގުރާމަ ފަށައިފާނެ ކަމުގެ ބިރު ހީވެއެވެ.
1950ގެ އަހަރުތަކުގައި ކުރި ކޮރެޔާ ހަނގުރާމަ ނިމުނު ނަމަވެސް ހަނގުރާމަ ނިމުނުކަން އިޢުލާނުކޮށް ޞުލްޙައިގެ އެއްބަސްވުމެއް ދެ ޤައުމުން މިހާތަނަށް ވެސް އެކުލަވައިލައިފައެއް ނުވެއެވެ.