ބަންގްލަދޭޝްގެ ޢާންމު އިންތިޚާބު ކާމިޔާބު ކުރައްވައި ބޮޑުވަޒީރު ޝައިޚް ހަސީނާ ވިދިވިދިގެން ހަތަރު ވަނަ ދައުރަކަށް އިންތިޚާބުވެ ވަޑައިގަންނަވައިފިއެވެ. އިންތިޚާބުގެ ވަޤުތީ ނަތީޖާ ދައްކާ ގޮތުގައި ހަސީނާގެ އަވާމީ ލީގުން ވަނީ ޤާނޫނު ހަދާ މަޖިލީހުގެ 298 ގޮނޑީގެ 75 އިންސައްތަ ކާމިޔާބު ކޮށްފައެވެ. ހަސީނާއަށް އިންތިޚާބުގައި ކުރި ލިބިވަޑައިގަންނަވާފައި ވަނީ އިދިކޮޅު ބަންގްލަދޭޝް ނޭޝަނަލިސްޓް ޕާޓީ (ބީއެންޕީ)ން އިންތިޚާބު ބޮއިކޮޓްފައިވާ ވަނިކޮށެވެ.
ކުރީގެ ބޮޑުވަޒީރު ޚާލިދާ ޒިޔާގެ ބީއެންޕީން އިންތިޚާބު ބޮއިކޮޓް ކޮށްފައި ވަނީ އިސްތިޢުފާ ދިނުމަށް ހަސީނާއަށް ގޮވައިލާފައިވާ ގޮވައިލުމަށް އޭނާ އިޖާބަ ނުދެއްވުމުންނެވެ. އިސްތިޢުފާ ދެއްވަން ދެކޮޅު ހައްދަވަމުން ހަސީނާ ވިިދާޅުވީ އޭނާގެ އަމާޒަކީ އިތުރު ދައުރެއް ކާމިޔާބު ކުރައްވައި ބަންގްލަދޭޝްގެ އިޤުތިޞާދު އިތުރަށް ކުރިއެރުވުން ކަމުގައެވެ.
"ކޮންމެ ޕާޓީއަކަށް ވެސް ޙައްޤުތަކެއް ލިބިގެންވޭ. އެއް ޕާޓީން އިންތިޚާބު ބޮއިކޮޓްކޮށް ބައިވެރި ނުވުމަކީ، ޑިމޮކްރެސީ ނެތުން ކަމަށް ގަބޫލު ކުރަން ޖެހޭ ސަބަބެއް ނޫން،" އުމުރުން 76 އަހަރުގެ ހަސީނާ ވިދާޅުވިއެވެ. ހަސީނާއަކީ ބަންގްލަދޭޝްގެ ބާނީގެ ގޮތުގައި ބެލެވޭ ޝައިޚް މުޖީބުއް ރަޙްމާންގެ ދަރިކަނބަލުންނެވެ. ބަންގްލަދޭޝްގެ ބޮޑުވަޒީރު ކަމުގެ މަޤާމާ އޭނާ އެންމެ ފުރަތަމަ ޙަވާލުވެވަޑައިގަތީ 1996 ވަނަ އަހަރުއެވެ. އަދި، ކުރިއަށް އޮތީ އޭނާ މަޤާމު ފުރުއްވާ ފަސް ވަނަ ދައުރެވެ.
ފާއިތުވި 15 އަހަރުގެ ތެރޭގައި ހަސީނާ ވަނީ ބަންގްލަދޭޝްގެ އިޤުތިޞާދަށް ބޮޑެތި ކުރިއެރުންތަކެއް ހޯއްދަވައި ދެއްވާފައެވެ. އޭގެ ތެރޭގައި އެ ޤައުމުގެ އަންނައުނު އުފައްދާ ސިނާއަތް ކޮޅަށް ޖަހައިދިނުން ހިމެނެއެވެ. މީގެ އިތުރުން މިޔަންމާގެ އަސްކަރީ ވެރިކަމުގެ ވަކިތަކުން ސަލާމަތް ވާން ބަންގްލަދޭޝަށް ހިޖުރަކުރި މިލިޔަނެއްހާ ރޮހިންޔާ ދަރިކޮޅުގެ މުސްލިމުންނަށް އޭނާ ވަނީ ހިމާޔަތާއި ރައްކާތެރިކަން ދެއްވާފައެވެ. އެއީ ބައިނަލްއަޤުވާމީ މުޖުތަމަޢުގެ ތާރީފު އޭނާއަށް އަމާޒުވި ޢަމަލެކެވެ. ނަމަވެސް، އިންސާނީ ޙައްޤުތަކަށް ވަކާލާތުކުރާ ފަރާތްތަކުން ދަނީ އޭނާގެ ސަރުކާރަށް ބޮޑެތި ތުހުމަތުތަކެއް އަމާޒު ކުރަމުންނެވެ. އޭގެ ތެރޭގައި އިންސާނީ ޙައްޤުތަކަށް އަރައިގަތުމާއި ޚުދުމުހުތާރު ވެރިކަމެއް ކުރެއްވުމާއި އިދިކޮޅު ޙަރަކާތް ހިންގުމާއި ޚިޔާލު ފާޅު ކުރުމުގެ މިނިވަން ކަމަށް ހުރަސް އެޅުމުގެ ތުހުމަތުތައް ފާހަގަ ކޮށްލެވެއެވެ.
ރަޝިޔާއިން ޔޫކްރެއިންގައި ކުރަމުންދާ ހަނގުރާމައާ ގުޅިގެން ބަންގްލަދޭޝްގެ އިޤުތިޞާދަށް ލޮޅުންތަކެއް އަރާފައިވެއެވެ. އިންޓަރނޭޝަނަލް މަނިޓަރީ ފަންޑު (އައިއެމްއެފް)ން ހުސްވި އަހަރު ވަނީ އެ ޤައުމަށް 4.7 ބިލިޔަން އެމެރިކާ ޑޮލަރުގެ ލޯނެއް ދޫކޮށްފައެވެ. އަދި އެ ޤައުމުގެ ބާޒާރުގައި ތަކެތީގެ އަގުތައް ވެސް 9.5 އިންސައްތައަށް އުފުލިފައިވާކަން ފާހަގަ ކޮށްލަން ޖެހެއެވެ.
ބަންގްލަދޭޝްގެ ޢާންމު އިންތިޚާބާ ދިމާކޮށް ބޮޑެތި ހަމަނުޖެހުންތަކެއް ހިނގާފައިވާކަން ވެސް ފާހަގަ ކޮށްލަން ޖެހެއެވެ. އޭގެ ތެރޭގައި ވޯޓުފޮށި ބަހައްޓާފައިވާ މަރުކަޒުތަކުގައި ހުޅުޖެހުން ފަދަ ޢަމަލުތައް ހިމެނެއެވެ. އަދި ރޭލެއްގައި ރޯކޮށްލުމުން ހަތަރު މީހުން ފިހިގެން މަރުވެފައިވެއެވެ. އޭގެ ތެރޭގައި ކުޑަ ދެ ކުދިން ވެސް ހިމެނެއެވެ.
އިންތިޚާބުގައި ވޯޓުލާފައި ވަނީ ވޯޓުލުމުގެ ޙައްޤު ލިބިގެންވާ 120 މިލިޔަން މީހުންގެ ތެރެެއިން 42 އިންސައްތަ ކަމުގައި ބަންގްލަދޭޝްގެ އިންތިޚާބީ ކޮމިޝަނުގެ އިސްވެރިޔާ ކާޒީ ހަބީބުލް އައްވަލް ވިދާޅުވިއެވެ. އިންތިޚާބުގެ ވަޤުތި ނަތީޖާ ދައްކާ ގޮތުގައި ހަސީނާގެ އަވާމީ ލީގުން ވަނީ ޤާނޫނު ހަދާ މަޖިލީހުގެ 298 ގޮނޑީގެ ތެރެއިން 222 ގޮނޑި ކާމިޔާބު ކޮށްފައެވެ.
ހަސީނާއަށް ވެސް އޭނާ ވާދަކުރެއްވި ގޯޕާލްގޮންޖުން 249,962 ވޯޓު ލިބުނެއެވެ. އޭނާއާ ވާދަކުރެއްވި ކެނޑިޑޭޓަށް ކާމިޔާބު ކުރެވުނީ އެންމެ 496 ވޯޓެވެ. އިންތިޚާބު ކާމިޔާބު ކުރެއްވުމާ އެކު ދުނިޔޭގެ އެކި ކަންކޮޅުތަކުން ދަނީ ހަސީނާއަށް މަރުޙަބާ ކިޔަމުންނެވެ. އޭގެ ތެރޭގައި އިންޑިޔާއާއި ރަޝިޔާގެ އިތުރުން ޗައިނާ ވެސް ފާހަގަ ކޮށްލެވެއެވެ.