ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ވީ އެންމެ އަވަހަކަށް ހުއްޓުވޭނެ ގޮތެއް ގްރޫޕް އޮފް ސެވަން (ޖީ7)ގެ މެންބަރު ޤައުމުތަކުން ހޯދުމަށް މަސައްކަތް ކުރަމުންދާ ކަމުގައި އިޓަލީވިލާތުން ބުނެފިއެވެ. ޖީ7ގެ ރިޔާސަތު ބަލަހައްޓާ އިޓަލީވިލާތުން އެ ގޮތަށް ބުނެފައި ވަނީ އެެމެރިކާ ވެސް ހިމެނޭ ގޮތުން ޖީ7ގެ ބައެއް މެންބަރު ޤައުމުތަކުގެ އިސްވެރިން މެދުއިރުމައްޗަށް ދަތުރުފުޅުތަކެއް ކުރައްވަމުން ގެންދަވާ ދަނޑިވަޅެއްގައެވެ.
"[ލާއިންސާނީ ޢުދުވާނުގެ] އަސްކަރީ ބައި ނިމުމަކަށް ގެނައުމާ ގުޅޭ ގޮތުން ޖީ7ގެ މެންބަރު ޤައުމުތަކުން ދަނީ [ޔަހޫދީ] އިސްރާޢީލުގެ ސަރުކާރާ މަޝްވަރާ ކުރަމުން،" އިޓަލީވިލާތުގެ ޚާރިޖީ ވަޒީރު އަންތޯނިޔޯ ތައްޔާނީ ވިދާޅުވެފައިވާ ކަމުގައި އެ ޤައުމުގެ ޚާރިޖީ ވުޒާރާއިން ބުންޏެވެ.
އެމެރިކާގެ ޚާރިޖީ ވަޒީރު އެންތޮނީ ބްލިންކަންއާއި ޖަރުމަނުވިލާތުގެ ޚާރިޖީ ވަޒީރު އަނަލިނާ ބެއަރބޮކް ގެންދަވަނީ މެދުއިރުމަތީގެ ބައެއް ޤައުމުތަކަށް ޒިޔާރަތް ކުރައްވަމުންނެވެ. ބްލިންކަން އެންމެ ފަހުން ވަޑައިގަންނަވާފައި ވަނީ އެކުވެރި ޢަރަބި އިމާރާތް (ޔޫއޭއީ)އާއި ސަޢޫދީ ޢަރަބިއްޔާއަށެވެ. އޭގެ ކުރިން އޭނާ ވަނީ އުރުދުންނާއި ޤަޠަރުގެ އިތުރުން ތުރުކީވިލާތަށް ވެސް ވަޑައިގަންނަވާފައެވެ. ބެއަރބޮކާ އެކު ވިލާތުގެ އިއްތިހާދުގެ ޚާރިޖީ ސިޔާސަތާ ބެހޭ މުޝީރު ޖޮސެޕް ބޮރެއި މިހާރު ހުންނެވީ ޔަހޫދީ ދަޢުލަތުގައެވެ.
ޔަހޫދީންގެ ސަރުކާރާ އެކު ބޭއްވި މަޝްވަރާތަކުގައި ބެއަރބޮކް ވަނީ ޣައްޒާގެ ޢާންމު ރައްޔިތުންގެ ފުރާނައަށް ނުރައްކާ ނުވާނެ ގޮތަށް ޢަމަލުތައް ބައްޓަން ކުރުމަކީ ޔަހޫދީންގެ ކޮނޑުގައި އެޅިފައިވާ ޒިންމާއެއް ކަމުގައި ވިދާޅުވެފައެވެ. ޔަހޫދީންގެ ޢުދުވާނާ ގުޅިގެން ބްލިންކަން ވަނީ އެއީ ސަރަޙައްދީ ހަމަނުޖެހުމަކަށް ބަދަލުވެދާނެ ކަމުގެ އިންޒާރު ދެއްވާފައެވެ. "މިއީ ފަޅައިގެން ގޮސްދާނެ ފަދަ ހަމަނުޖެހުމެއް،" ބްލިންކަން ވިދާޅުވިއެވެ.
ނަމަވެސް، ޔަހޫދީންގެ އިސްތިޢުމާރީ ފައުޖުން ދެނީ ބީރު ކަންފަތެކެވެ. އަދި، އެ މީހުންގެ ޢުދުވާންތައް ހުއްޓައިލަފާނެ ކަމުގެ ކޮޅުމަތި ވެސް ފެންނަން ނެތް ކަން ފާހަގަ ކޮށްލަން ޖެހެއެވެ. ފާއިތުވި 24 ވަރަކަށް ގަޑިއިރުގެ ތެރޭގައި ވެސް ޔަހޫދީ ފައުޖުން ވަނީ ފަލަސްޠީނުގެ 249 މީހުން ޝަހީދު ކޮށްލާފައެވެ. ޙަމަލަތައް އަމާޒު ކޮށްފައި ވަނީ ޣައްޒާގެ ދެކުނުގައި އޮންނަ ޚާން ޔޫނިސްގެ އިތުރުން މެދުތެރޭގައި އޮންނަ ރަށްތަކަށެވެ. މީގެ ތެރެއިން ދީރް އަލް-ބަލަޙްގައި އާންމުން ދިރިއުޅޭ ޢިމާރާތަކަށް ބޮންއަލައި 18 މީހުން ޝަހީދު ކޮށްލާފައިވާ ކަން ފާހަގަ ކޮށްލަން ޖެހެއެވެ.
އާންމުން ދިރިއުޅޭ ޢިމާރާތްތަކުގެ އިތުރުން ހޮސްޕިޓަލްތަކާއި އ.ދގެ އޮފީސްތަކާއި މަރުކަޒުތަކަށް ވެސް ޔަހޫދީ ފައުޖުން ދަނީ ބޮންއަަޅަމުންނެވެ. ފަލަސްޠީނުގެ ރެފިއުޖީންނާ ބެހޭ އދގެ އިދާރާއިން ބުނީ އެ އިދާރާގެ 63 މަރުކަޒަކަށް ޔަހޫދީ ފައުޖުން ބޮންއަޅައި ސުންނާފަތި ކޮށްލާފައިވާ ކަމުގައެވެ. އަދި، އެ އިދާރާއިން ހިންގާ 22 ޞިއްޙީ މަރުކަޒަކަށް ޙަމަލަދީ އެ ތަންތަން ވެސް ބިމާ ހަމަކޮށްލާފައިވާ ކަމުގައެވެ.
ޣައްޒާގެ މުސްލިމުންނާ ދެކޮޅަށް އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 23,084 އަށް އުފުލިފައެވެ. އޭގެ ތެރޭގައި ގިނައީ މައުސޫމް ކުޑަކުދިންނާއި އަންހެނުންނެވެ. އަދި، އުމުރުން ދުވަސްވީ މީހުންނާއި ޒުވާން އުމުރުފުރައިގެ ކުދިންނެވެ.