ފަލަސްޠީނުގެ ޣައްޒާގެ އުތުރުގައިވާ ރަށްތަކަށް ބޭހާއި ޞިއްޙީ ފަރުވާގެ ސާމާނު ފޯރުކޮށްދިނުމަށް ދުނިޔޭގެ ޞިއްޙަތު ޖަމުޢިއްޔާއިން ކުރަމުންދިޔަ މަސައްކަތްތައް މެދުކަނޑައިލަން މަޖުބޫރުވެފައިވާ ކަން އެ ޖަމުޢިއްޔާއިން ހާމަކޮށްފިއެވެ. އެ ޖަމުޢިއްޔާއިން ބުނީ އެ މަސައްކަތްތައް ހުއްޓުމަކަށް އައިސްފައި ވަނީ އެ ސަރަޙައްދަށް އެހީގެ ސާމާނު ފޯރުކޮށްދޭން ޙަރަކާތްތެރިވާ ޓީމުތަކާއި އުޅަނދުތަކަށް އެއްވެސް ރައްކާތެރި ކަމެއް ނެތުމުން ކަމުގައެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ އިސްތިޢުމާރީ ފައުޖުން ފެށި ލާއިންސާނީ ޢުދުވާނުގެ ދަށުން ޣައްޒާގެ އުތުރުގައިވާ ގިނަ ސަރަޙައްދުތައް ވަނީ ސުންނާފަތި ކޮށްލާފައެވެ. އަދި ޣައްޒާއަށް އެއްގަމު މަގުން އަރައި، ޔަހޫދީ ފައުޖުގެ ސިފައިން ދަނީ އެ ސަރަޙައްދަށް ވަރުގަދަ ޙަމަލަތަކެއް ދެމުންނެވެ. ލާއިންސާނީ ޢުދުވާންތަކެއް ޔަހޫދީން ހިންގަމުންދާ ދަނޑިވަޅެއްގައި އެ ސަރަޙައްދަށް ޞިއްޙަތު ޖަމުޢިއްޔާގެ ޓީމުތައް ފޮނުވުމަކީ ރައްކާތެރި ކަމެއް ނޫން ކަމުގައި އެ ޖަމުޢިއްޔާއިން ދެކެއެވެ.
ޣައްޒާގެ އުތުރުގައި ހުންނަ މައި ފަސް ހޮސްޕިޓަލްގެ ތެރެއިން އަލް-ޢަވްދާ ހޮސްޕިޓަލުން ބޭހާއި، ޞިއްޙީ ފަރުވާއަށް ބޭނުންވާ ހުރިހާ ސާމާނެއް ވަނީ ހުސްވެފައެވެ. އެ ހޮސްޕިޓަލަށް ބޭނުންވާ ސާމާނު ފޯރުކޮށްދޭން ޞިއްޙަތު ޖަމުޢިއްޔާއިން މަސައްކަތް ކުރި ނަމަވެސް، އެ ކަން ކާމިޔާބު ކުރެވިފައެއް ނުވެއެވެ. އަދި އެއީ އެ ސަރަޙައްދަށް ފޮނުވަން ހަމަޖެހިފައިވާ ބޭހުގެ ޝިޕްމަންޓް ފޮނުވުން ފަސް ކުރި ހަތަރު ވަނަ ފަހަރު ކަން ވެސް ފާހަގަ ކޮށްލަން ޖެހެއެވެ. އެ ކަމަށް ހުރަސް އަޅަމުން ދަނީ ޔަހޫދީންގެ ޖައްބާރު ފައުޖުންނެވެ.
"ޔަހޫދީ ފައުޖުން ދަނީ މެދުކެނޑުމެއް ނެތި އުތުރު ޣައްޒާއަށް ބޮން އަޅަމުން. ޙަމަލަ ދެމުން. އެ ސަރަޙައްދަށް ދަތުރު ކުރެވޭ މަގުތައް އޮތީ ބަންދުވެފައި. މުވާސަލާތު ކުރެވޭނެ ގޮތެއް ނެތް. އެ ކަންކަމާ ގުޅިގެން، އެ ސަރަޙައްދަށް ބޭސް ފޮނުވަން ވަނީ ހުރަސް އެޅިފައި،" ފަލަސްޠީނުގައި ހުންނަ ދުނިޔޭގެ ޞިއްޙަތު ޖަމުޢިއްޔާގެ އޮފީހުން ބުންޏެވެ.
"ޣައްޒާގެ ރައްޔިތުންގެ ޞިއްޙީ ފަރުވާގެ ހާލަތާ މެދު ކަންބޮޑުވޭ. ޣައްޒާގެ އުތުރަށް ބޭސްފަރުވާގެ ސާމާނު ފޮނުވުން އިތުރަށް ލަސް ކުރަން ޖެހިއްޖެ ނަމަ، އިތުރު ބަޔެއްގެ ފުރާނަ ގެއްލިގެންދާނެ. އިތުރު ބަޔަކަށް ނިކަމެތި ކަން ތަޙައްމުލު ކުރަން ޖެހޭނެ،" ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސުސް ވިދާޅުވިއެވެ.
ޣައްޒާގެ އުތުރާއި މެދުތެރޭގައިވާ ސަރަޙައްދުތަކަށް ޔަހޫދީން ދެމުންދާ ޙަމަލަތަކާ މެދު އެހީދޭ އެހެން ޖަމުޢިއްޔާއެއް ކަމުގައިވާ އިންޓަރނޭޝަނަލް ރެސްކިޔު ކޮމިޓީން ވެސް ވަނީ ކަންބޮޑުވުން ފާޅު ކޮށްފައެވެ. އެ ޖަމާޢަތުގެ އިތުރުން މެޑިކަލް އެއިޑް ފޯ ޕަލަސްޓީނިޔަންސް ޖަމުޢިއްޔާއިން ޣައްޒާގެ އުތުރުގެ ސަރަޙައްދުތަކުގައި ހިންގަމުންދާ ޙަރަކާތްތައް މެދުކަނޑައިލަން މަޖުބޫރު ކުރުވާފައިވާ ކަމުގައި އެ ޖަމުޢިއްޔާއިން ބުންޏެވެ. އަދި، ޣައްޒާގެ މެދުތެރޭގައި އޮންނަ އަލް-އަޤްޞާ ހޮސްޕިޓަލުގައި ދެމުން ދިޔަ ޞިއްޙީ ޚިދުމަތްތައް ހުއްޓައިލަން މަޖުބޫރު ވެފައިވާ ކަމުގައި ވެސް އެ ޖަމުޢިއްޔާއިން ބުންޏެވެ.
ޣައްޒާގެ މުސްލިމުންނާ ދެކޮޅަށް އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 23,084 އަށް އުފުލިފައެވެ. އޭގެ ތެރޭގައި 9,000 އަށްވުރެ ގިނަ ކުޑަކުދިން ހިމެނެއެވެ. ޔަހޫދީންގެ މި ޢުދުވާން ހިންގަމުން ދަނީ އެމެރިކާގެ އެހީތެރިކަމާއި އެއްބާރުލުމާ އެކުގައި ކަން ވެސް ފާހަގަ ކޮށްލަން ޖެހެއެވެ. ޣައްޒާގެ ޢާންމުންނާ ދެކޮޅަށް ޙަމަލަދީ ޤަތުލުޢާންމު ހިންގަން ޔަހޫދީ ފައުޖުން ބޭނުން ކުރަމުން ދަނީ އެމެރިކާއިން ފޯރުކޮށްދެމުންދާ ނުރައްކާތެރި ހަތިޔާރެވެ.