ސަރަޙައްދީ ހަނގުރާމައެއް ކުރުމުގެ ފުރުޞަތު ބައިނަލްއަޤުވާމީ މުޖުތަމަޢުން ޔަހޫދީ ދަޢުލަތުގެ ބޮޑުވަޒީރު ބުންޔާމީން ނަތަންޔާހޫއަށް ދިނުމަކީ ބަލައިގަނެވޭނެ ކަމެއް ނޫން ކަމަށް އުރުދުންގެ ޚާރިޖީ ވަޒީރު އައިމަން ޞަފްދީ ވިދާޅުވެއްޖެއެވެ. އޭނާ އެ ގޮތަށް ވިދާޅުވެފައި ވަނީ ފަލަސްޠީނުގެ ޣައްޒާ ހަނގުރާމައިގައި ނުރައްކާތެރިކަން ދުވަހެއް ދުވަހަކަށް އިތުރުވަމުންދާ ކަމަށް ވިދާޅުވެ، ފަރަންސޭސިވިލާތުގެ ޚާރިޖީ ވަޒީރު ކެތަރިން ކޮލޮނާއާ ދެއްކެވި ވާހަކަފުޅުގައެވެ.
ޞަފްދީ އިތުރަށް ވިދާޅުވީ ނަތަންޔާހޫގެ ކަނާތުފިޔައިގެ ވެރިކަންކުރާ އިއްތިހާދުން މަސައްކަތް ކުރަނީ ސީދާ ސަރަޙައްދީ ހަނގުރާމައަކަށް ދިއުމަށް ކަމަށެވެ. އެއާއެކު މިހާރު އުފެދިފައިވާ ސަރަޙައްދީ ހަމަނުޖެހުން އިތުރަށް ބޮޑުވެގެންދާނެ ކަމަށް ޞަފްދީ ވިދާޅުވިއެވެ.
ހަނގުރާމަ ނިމުމަކަށް ގެނައުމަށް އދން ޤަރާރެއް ފާސްކުރުމަށް ހުރަސް އެޅޭ އެއްވެސް ސަބަބެއްވެސް ނެތް ކަމަށްވެސް ޞަފްދީ ވިދާޅުވިއެވެ. ޣައްޒާގައި ޔަހޫދީން ކުރަމުންދާ ހަނގުރާމަ މިހާރުން މިހާރަށް ނިމުމަކަށް ގެނައުމަށް އދގެ ސަލާމާތީ މަޖީލީހުން ދެ ފަހަރެއްގެ މަތިން ހުށަހެޅި ޤަރާރު ވެސް ވަނީ ފާސްނުވެ ފޭލްވެފައެވެ.
އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާގައި ހިންގަމުންދާ ޖަރީމާތަކުގައި މިހާތަނަށް 23،084 މީހުން ވަނީ ޝަހީދުކޮށްލައިފައެވެ. އެ ޙަމަލާތަކުގައި ޒަޚަމްވި މީހުންގެ ޢަދަދު ވަނީ 58،929 އިތުރުވެފައެވެ.