އައްޑޫ ބްރިޖު ހަދަން ބޮޑެތި ކުންފުނިތަކުގެ ޝަޢުގުވެރިކަން، އެއްކުންފުނިން ޕްރޮޕޯސަލް ހުށައަޅައިފި

ރާއްޖޭގެ އެންމެ ދެކުނުން އައްޑޫ ސިޓީގައި ތަރައްޤީކުރެއްވުމަށް ސަރުކާރުން ނިންމަވާފައިވާ ބްރިޖު މަޝްރޫޢޫއު ކުރިއަށް ގެންދިއުމަށް ބޮޑެތި އިންވެސްޓަރުން ޝަޢުގުވެރިކަން ފާޅުކުރަމުންދާކަމަށް ޢުމްރާނީ ތަރައްޤީއާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު މިހެން ވިދާޅުވީ، ރާއްޖޭގެ ހުރި އިންވެސްޓުމަންޓުތަކުގެ ފުރުޞަތުތައް ޗައިނާގެ އިންވެސްޓަރުންނާ ހިއްސާކުރުމަށް ޗައިނާގެ ފޫ ޖޮއުގައި ކުރިއަށްގެންދިޔަ "އިންވެސްޓް މޯލްޑިވްސް ފޯރަމް"އަށްފަހު ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ވަޒީރު ވިދާޅުވީ އައްޑޫ ސިޓީގައި އެޅުމަށް ރައީސް ޑރ.މުހައްމަދު މުއިއްޒު ވައުދުވެވަޑައިގެންފައިވާ ބްރިޖުގެ މަޝްރޫޢު ކުރިއަށްގެންދިޔުމަށްވެސް އިންވެސްޓް މޯލްޑިވްސް ފޯރަމްގެ ތެރެއިންވެސް ކުންފުނިތަކުން ޝަޢުޤުވެރިކަން ފާޅުކޮށްފައިވާކަމަށެވެ. އެ މަޝޤރޫޢޫ ކުރިއަށް ގެންދިއުމަށް މިހާރުވެސް އެއް ކުންފުންޏަކުން ޕްރޮޕޯސަލް ހުށައަޅާފައިވާކަން ފާހަގަކުރައްވާ ވަޒީރު ވިދާޅުވީ އެ ޕްރޮޕޯސަލް ދިރާސާކުރަމުން ގެންދަވާކަމަށެވެ.

"މިހާރުވެސް ޕްރޮޕޯސަލެއް އެބަ އޮތް. މިހާރުވެސް އެ ޕްރޮޕޯސަލް އިވެލުއޭޓްކުރަމުން މިގެންދަނީ އަޅުގަނޑުމެންނަށް އެންމެ ރަނގަޅު އަދި ކުރިއަށްގެންދެވޭނެ ގޮތެއް ބަލަން. ހަމައެއާއެއު ޗައިނާގެ ބޮޑެތި ކުންފުނިތަކުންވެސް ޝައުގުވެރިކަން ފާޅުކޮށްފަ." ޢުމްރާނީ ތަރައްޤީއާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވިއެވެ.

އެހެންނަމަވެސް މިވަގުތު އެންމެ އިސްކަމެއް ދެއްވަނީ ބްރިޖުގެ ޑިޒައިނާއެކު ފީސިބިލިޓީ ސްޓަޑީއެއް ހެދުމަށްކަމަށް ވަޒީރު ވިދާޅުވިއެވެ. އަދި ސަރުކާރުގެ ހަފްތާ 14ގެ ތެރެއިން ދިރާސާތައް ކުރިއަށްގެންދާވާ ނިންމާޅެވޭނެކަމަށްވެސް ވަޒީރު ވިދާޅުވިއެވެ.

ބްރިޖްގެ ޢަމަލީ މަސައްކަތް ފެށުމަށްޓަކައި ފީޒިބިލިޓީއާއި ޑިޒައިންގެ މަސައްކަތް ކުރުމަށް ވަރަށް އަވަހަށް ބަޔަކާ ހަވާލުކުރެވޭނެކަމަށާއި އެކަމަށް ވާންޖެހޭ ތައްޔާރިތައް ވަމުން އަންނަކަމަށް ވަޒީރު ވަނީ ވިދާޅުފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެސް ވަނީ ބްރިޖް އެޅުމުގެ މަސައްކަތަށް ބޭނުންވާ ފަންނީ އަދި ތަފްސީލީ ފީޒިބިލިޓީއާއި ޑިޒައިން މަސައްކަތް ބަޔަކާ ވަރަށް އަވަހަށް ހަވާލުކުރައްވާނެކަން ހާމަކުރައްވާފައެވެ. ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢު ފެށުމަށް ބޭއްވި ރަސްމިއްޔާތުގައި ރައީސް ވިދާޅުވެފައިވަނީ އޭގެ ސަބަބުން ބްރިޖްގެ އަގު ކުރުމަށްޓަކައި ކޮންޓްރެކްޓަރެއް ހޯދައި، މަސައްކަތް ހަވާލުކުރުމަށްޓަކައި ނިންމަންޖެހޭ ހުރިހާ ލިޔެކިޔުމެއް އެ މަސައްކަތުން ފަހިވެގެންދާނެކަމަށެވެ.

އައްޑު އަތޮޅު އުފެދިފައި އޮތް ގޮތުން، ހިތަދޫ، ފޭދޫ، މަރަދޫފެދޫ އަދި ފޭދޫ އަކީ އެއްފަސްކޮށް އޮންނަ 4 ރަށެވެ. ހުޅުދޫ އަދި މީދޫ އޮންނަކީ ވަކިން ދުރުގައެވެ. ފުރިހަމަ މާނައިގައި އައްޑޫ "ސީޓީ"އެއްގެ ގޮތުގައި ތަރައްޤީކުރެވިގެން ދިއުމުގައި، އެ ސިޓީގެ ރައްޔިތުންގެ އުންމީދާއި ގުޅިފައިވާ އެންމެ މުހިންމު އެއް މަޝްރޫޢަކީ، ގުޅިފައިވާ ރަށްތަކާއި ހުޅުމީދޫ ބްރިޖަކުން ގުޅާލުމެވެ. އެއީ ރައީސްގެ ވަޢުދުފުޅެއްވެސްމެއެވެ.

އިންވެސްޓް ފޯރަމާ ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ، މިފޯރަމަކީ ދިވެހިރާއްޖޭގައި ކުރިއަށް ގެންދިޔުމަށް ނިންމާފައިވާ ތަރައްޤީގެ ބޮޑެތި ޕްރޮޖެކްޓުތަކަށް ފަހި ފުރުސަތަކަށް ވާނެކަމަށެވެ.

ޗައިނާގެ ބޮޑެތި އިންވެސްޓަރުންނާއި ވިޔަފާރިވެރިންނަށް އިންވެސްޓު މޯލްޑީވްސް ފޯރަމުގައި ހުށަހެޅި ޕްރެޒެންޓޭޝަނުގައި ފާހަގަކޮށްފައިވާ މަޝްރޫޢުތަކުގެ ތެރޭގައި ރާއްޖޭގެ އެންމެ ދެކުނުން އައްޑޫ ސިޓީގައި އަޅަން ނިންމާފައިވާ ހުޅުމީދޫ ބްރިޖު ހިމެނެއެވެ. އައްޑޫ ސިޓީގެ އެހެން ރަށްތަކާ ވަކިން އޮންނަ ހުޅުމީދޫ ބްރިޖަކުން ގުޅާލުމަކީ އިޤްތިޞާދީ ގޮތުން ގިނަ ފުރުސަތުތަކެއް އެސަރަހައްދުގައި އުފެދޭނެކަމެއްކަމުގައިވެސް ފާހަގަކޮށްފައިވެއެވެ.

އެގޮތުން ހުޅުމީދޫ ބްރިޖް ޤާއިމުކުރުމަކީ އައްޑޫ ސިޓީ ރާއްޖޭގެ އުތުރުގެ އިޤްތިޞާދީ ހަބަކަށް ވެގެންދާނެކަމެއްގެ ގޮތުގައި ފޯރަމުގައި ފާހަގަކޮށްފައިވެއެވެ. 14 ނުވަތަ 15 ކިލޯމީޓަރު ބްރިޖަކާ ކޯޒްވޭތަކަކުން ގުޅާލުމަކީ އިޤްތިޞާދީގޮތުން އެތައް ފައިދާތަކެއް ލިބޭނެ ކަމެއްގެ ގޮތުގައިވެސް މި ޕްރެޒެންޓޭޝަނުގައި ފާހަގަކޮށްފައިވެއެވެ. މިކަމުގެ ސަބަބުން އިދާރީ ގޮތުން ރަށްތައް ހިންގުމަށްވެސް ލުއިފަސޭހަކަން ލިބޭނެކަމަށްވެސް ފާހަގަކޮށްފައިވެއެވެ. މިއީ އިންވެސްޓަރުންނަށް ވަރަށް ފަހި ފުރުސަތަކަށްވާނެކަމަށްވެސް ޕްރެޒެންޓޭޝަންގައި އަލިއަޅުވާފައިވެއެވެ.

ވަޒީރު ވިދާޅުވީ ރާއްޖޭގައި ޢުމްރާނީ ބިޔަ މަޝްރޫޢޫތައް ކުރިއަށް ގެންދިއުމަށް ޤާބިލް ރަނގަޅު ކުންފުނިތައް ހޯދުމަށް މަގުފަހިވެގެންފާނެކަމަށެވެ.

"އަޅުގަނޑުމެން މި އުއްމީދުކުރާ ޕްރޮޖެކްޓުތަކަކީ މާލޭ ކޮމާޝަލް ޕޯޓު ބަދަލުކުރުމާއި، މިހާރު ބިން ހިއްކަމުންދާ ރަށްރަށުގައި ފެނާ ނަރުދަމާއާއި މަގުހެދުމާއި ބޭނުންވާ އެހެނިހެން އަސާސީ އިންފްރާސްޓްރަކްޗަރ ޤާއިމުކުރުންފަދަ ކަންތައްތަކަކީ ވަރަށް މުހިންމު ޕްރޮޖެކްޓުތަކެއް. އެހެންވީމަ މިތަނަށް އައި ބޮޑެތި އިންވެސްޓަރުންނާއި ކޮންޓްރެކްޓަރުންނާ އެއްކޮށް އަޅުގަނޑުމެންނަށް ރަނގަޅު ފައިނޭންސިން މޮޑެލްތަކާ އެއްކޮށް އެމަޝްރޫޢުތައް ހިންގަން ފަހިވެގެންދާނެކަމަށް އުންމީދުކުރެވެނީ." ވަޒީރު މުއްޠަލިބު ވިދާޅުވިއެވެ.

އިންވެސްޓް މޯލްޑިވްސް ފޯރަމަކީ ދިވެހިރާއްޖޭގައި ހުރި އިންވެސްޓުމެންޓު ފުރުސަތު ތަކާ ގުޅޭގޮތުން މައުލޫމާތު ހިއްސާކުރުމަށް ކުރިއަށްގެންދިޔަ ފޯރަމެކެވެ. މި ފޯރަމްގައި 300އަށްވުރެ ގިނަ އިންވެސްޓަރުން ބައިވެރިވިއެވެ.