ޔަމަނުގެ ހުޅަނގު އައްސޭރި ފަށުން ދަތުރުކުރި ބޯޓަކަށް ދިން ވައިގެ ޙަމަލާތަކެއް އެމެރިކާއިން އެކުލަވާލީ އަސްކަރީ އިއްތިހާދުން ދިފާޢުކޮށްފިއެވެ.
ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް (ޔޫކޭއެމްޓީއޯ)ން ބުނީ އެ ޙަމާލާ ޔަމަނުގެ ހުދައިދާ ބަނދަރުގެ ހުޅަނގުން ގާތްގަނޑަކަށް 50 ނޯޓިކަލް މޭލު ބޭރުންނެވެ. އެ ޙަމަލާ ދީފައި ވަނީ ޔަމަނުގެ ޙޫޘީ ޖަމާޢަތުންނެވެ.
އެމެރިކާ އިސްވެ އެކުލަވާލި އަސްކަރީ އިއްތިހާދަކީ ރަތް ކަނޑުގައި ދަތުރުކުރަމުންދާ ޔަހޫދީންނާ ގުޅުންހުރި އާގުބޯޓުތައް ޙޫޘީން ދެމުންދާ ޙަމަލާތަކުން ރައްކާތެރިކުރުމުގެ ގޮތުން ޑިސެމްބަރު މަހުގެ 19 ވަނަ ދުވަހު އެކުލަވާލީ އިއްތިހާދެކެވެ.
އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކާއި ޣައްޒާގެ ވެރިކަންކުރާ ޙަމާސް ޖަމާޢަތާއި ދެމެދު ހަނގުރާމަ ފެށިފަހުން ޙޫޘީން އަންނަނީ ރަތް ކަނޑުން ޔަހޫދީންގެ ރަށްތަކަށް ދަތުރުކުރާ އާގުބޯޓުތަކަށް ޙަމަލާ ދެމުންނެވެ. އެ ގޮތުން ޔަހޫދީންގެ ރަށްތަކަށާއި އެ ރަށްތަކަށް ރަތް ކަނޑުން ދަތުރުކުރާ ބޯޓުތަކަށް އަމާޒުކޮށް 100އަށްވުރެ ގިނަ ވައިގެ ޙަމަލާ ޙޫޘީން ވަނީ ދީފައެވެ. އެއާއެކު މުދާ ހިފައިގެން ޤައުމުތަކަށް ދަތުރުކުރާ މައިގަނޑު ވިޔަފާރީގެ މަގުގެ ދަތުރުތަކަށް ވަނީ ވަރަށް ބޮޑަށް ބުރޫއަރައިފައެވެ.
ޙޫޘީން އެ ގޮތަށް ޢަމަލުކުރަނީ ޔަހޫދީ ފައުޖުތަކުން ޣައްޒާގައި ކުރަމުންދާ ހަނގުރާމައިގައި ފަލަސްޠީނަށް ތާއީދުކުރުމުގެ ގޮތުންނެވެ. ޣައްޒާގައި ވެރިކަން ކުރަމުންދާ ޙަމާސް ޖަމާޢަތް ނައްތާލުމުގެ މަޤްޞަދުގައި ޔަހޫދީން ފައުޖުތަކުން ޣައްޒާގެ އާންމުންނަށް ދެމުންދާ ޙަމަލާތަކުގައި މިހާތަނަށް 23،210 ފަލަސްޠީނު މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ.