އެމެރިކާގެ ޚާރިޖީ ވަޒީރު އެންތަނީ ބްލިންކަން ހުޅަނގު އައްސޭރިއަށް ވަޑައިގަންނަވައި ފަލަސްޠީނުގެ ރައީސް މަޙްމޫދު އައްބާހާ ބައްދަލު ކުރައްވައިފިއެވެ. ބްލިންކަން ރާމަاللهއަށް ވަޑައިގަންނަވާފައި ވަނީ ޔަހޫދީ ދަޢުލަތަށް ވަޑައިގަންނެވުމަށް ފަހު ފަލަސްޠީނުގެ މިނިވަން ދަޢުލަތެއް ގާއިމު ކުރުމަށް މަގުކޮށައިދިނުމާ ގުޅޭ ގޮތުން ޔަހޫދީންގެ ޖައްބާރު ސަރުކާރުގެ އިސްވެރިންނާ މަޝްވަރާ ކުރެއްވުމަށް ފަހުއެވެ.
ރާމަﷲގައި އައްބާހާ ބައްދަލު ކުރެއްވުމުގެ ކުރިން ނޫސްވެރިންނާ ވާހަކަފުޅު ދައްކަވަމުން ބްލިންކަން ވަނީ ހުޅަނގު އައްސޭރީގައި ވެރިކަން ކުރާ ޕަލަސްޓީނިޔަން އޮތޯރިޓީ (ޕީއޭ) އިސްލާޙު ކުރަން އައްބާހަށް ހުށަހަޅުއްވާނެ ކަމުގައި ވިދާޅުވެފައެވެ. އަދި ޕީއޭގެ ވެރިކަން ހަރުދަނާ ކުރުމަށް ކުރެވިދާނެ ކަންކަމާ ގުޅޭ ގޮތުން މަޝްވަރާ ކުރައްވާނެ ކަމުގައި ވެސް އޭނާ ވިދާޅުވިއެވެ.
ޣައްޒާގައި ޔަހޫދީން ހިންގަމުންދާ ލާއިންސާނީ ޢުދުވާން ނިމުމަކަށް ގެނައުމުން އެ ތަނުގައި ގާއިމު ކުރާ ވެރިކަމުގައި 88 އަހަރުގެ އައްބާސްގެ ޕީއޭން އިސް ދައުރެއް އަދާ ކުރަން ޖެހޭނެ ކަމަށް ވޮޝިންގްޓަނުން ގަބޫލު ކުރެއެވެ. ނަމަވެސް ޕީއޭގެ އަތްދަށުގައި އޮތީ ވެރިކަމުގެ މަދު ބާރުތަކެއް ކަން ފާހަގަ ކޮށްލަން ޖެހެއެވެ. އަދި ޕީއޭގެ ބާރު ހިނގަނީ ހުޅަނގު އައްސޭރީގެ ކުޑަ ސަރަޙައްދެއްގައެވެ. ޕީއޭ ވެސް އޮތީ ޔަހޫދީންގެ އިސްތިޢުމާރީ ފައުޖުގެ އަޅުވެތި ކަމުގެ ދަށުގައެވެ. ހުޅަނގު އައްސޭރީގައި ވެސް ނަމެއްގައި އަމަން ބަލަހައްޓަނީ ޔަހޫދީ ސިފައިންނެވެ. ނަމަވެސް ކުރިއަށް އޮތް ތަނުގައި ހުޅަނގު އައްސޭރިއާއި ޣައްޒާގައި ގާއިމު ކުރެވޭ ދަޢުލަތެއްގެ ވެރިކަން ކުރަން ޖެހޭނީ ޕީއޭން ކަމަށް ހުޅަނގުން ގަބޫލު ކުރެއެވެ.
ހުޅަނގު އައްސޭރިއަށް ވަޑައިގެންނެވުމުގެ ކުރިން ބްލިންކަން ވަނީ ޢަރަބި ބައެއް ޤައުމުތަކަށް ވަޑައިގަންނަވައި އެ ޤައުމުތަކުގެ އިސްވެރިންނާ މަޝްވަރާ ކުރައްވާފައެވެ. އަދި އޭނާ ޔަހޫދީންގެ ގާތަށް ވަޑައިގަންނަވާފައި ވަނީ ޢަރަބިންގެ ފަރާތުން ޚާއްޞަ މެސެޖެއް ހިއްޕަވައިގެންނެވެ. އެ މެސެޖަކީ، ޔަހޫދީންނާ އެކު އޮތް ގުޅުންތައް ޢަރަބިން ދަމަހައްޓާނީ ޝަރުޠުތަކެއްގެ މަތިން ކަމެވެ. އެ ޝަރުޠުތަކުގެ ތެރޭގައި ފަލަސްޠީނުގެ މިނިވަން ދަޢުލަތެއް ގާއިމު ކުރުމަށް މަގުކޮށައިދިނުން ހިމެނޭ ކަމުގައި ބްލިންކަން ވަނީ ޔަހޫދީންގެ ޖައްބާރު ބޮޑުވަޒީރު ބެންޖަމިން ނަތަންޔާހޫއަށް ދަންނަވާފައެވެ. އެ މެސެޖަށް ނަތަންޔާހޫގެ ފަރާތުން ލިބިފައިވާ ރައްދަކީ ކޮބައި ކަން ހާމަ ކުރައްވަން ބްލިންކަން ދެކޮޅު ހައްދަވައެވެ. ހަމައެކަނި ވިދާޅުވީ ޔަހޫދީންގެ ކުރިމަތީގައި އޮތީ ދަތި އަނދި އުނދަގޫ ނިންމުންތަކެއް ކަމުގައެވެ.
"އެއްވެސް އިންސާފެއް ނެތި ފަލަސްޠީނުގެ މުސްލިމުންނާ ދެކޮޅަށް ޔަހޫދީ ވަޒަންވެރިން ހިންގަމުންދާ ލާއިންސާނީ އަމަލުތަކާއި، ފަލަސްޠީނުގެ ބިންތަކުގައި ޔަހޫދީން ވަޒަންވެރި ކުރުވުމާއި، ފަލަސްޠީނުގެ ރައްޔިތުންގެ ގެދޮރު ސުންނާފަތި ކުރުމާއި، އެ މީހުން ގެދޮރުން އެ މީހުން ބޭރު ކުރުން ފަދަ އަމަލުތަކަކީ މެދުއިރުމަތީގައި ދާއިމީ ސުލްޙަ ގާއިމު ކުރަން އޮތް ގޮންޖެހުންތަކެއް،" ބްލިންކަން ވިދާޅުވިއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީން ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 23,357 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 59,410 އަށް އަރައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ.