ލުބުނާނުގެ އަސްކަރިއްޔާ ވަރުގަދަކުރުމަށް 16 މިލިއަން ޑޮލަރުގެ އެހީއެއް ދޭން ޖަރުމަނުވިލާތުން ނިންމައިފިއެވެ. އެ ނިންމުން ހާމަކުރެއްވީ ލުބުނާނަށް ކުރެއްވި ދަތުރުފުޅެއްގައި ޖަރުމަނުވިލާތުގެ ޚާރިޖީ ވަޒީރު އަނާލީނާ ބާބޮކްއާއި ލުބުނާނުގެ ބޮޑުވަޒީރު ނަޖީބް މީޤާޠީއާއި ބައްދަލުރެއްވައި ދެއްކެވި ވާހަކަފުޅުގައެވެ.
ޖަރުމަނުވިލާތުން އެ ގޮތަށް ނިންމާފައި ވަނީ އޮކްޓޫބަރުގެ މަހުގެ ހަތް ވަނަ ދުވަހުން ފެށިގެން ފަލަސްޠީނުގެ ޣައްޒާގައި ކުރަމުންދާ ހަނގުރާމަ ފުޅާވެ ސަރަޙައްދީ ހަނގުރާމައަކަށް ބަދަލުވެދާނެ ކަމުގެ ބިރުހީވެފައިވާ ދަނޑިވަޅެއްގައެވެ. އެ އެހީގެ ސަބަބުން ލުބުނާނުގެ ދެކުނުގައި އޮންނަ ޔަހޫދީ ރަށްތަކާ ގުޅިފައިވާ ސަރަޙައްދީ ރޮނގު މިހާރަށްވުރެ ބޮޑަށް ވަރުގަދަކުރުމަށް އެހީތެރިވެދޭނެއެވެ. އޭގެ އިތުރުން ލުބުނާނު ސިފައިންނަށް ތަމްރީނު ދިނުމާ ސަރަޙައްދީ ރޮނގު ހިމާޔަތްކުރުމާ ބެހޭ ތަމްރީނުތައް ދިނުމުގެ ފުރުޞަތު ވެސް އެހީގެ ސަބަބުން ހުޅުވިގެންދާނެ ކަމަށް ބާބޮކް ވިދާޅުވިއެވެ.
އޮކްޓޫބަރު މަހުގެ ހަތް ވަނަ ދުވަހު ޔަހޫދީ ފައުތަކާއި ޣައްޒާގެ ވެރިކަންކުރާ ޙަމާސް ޖަމާޢަތާ ދެމެދު ހަނގުރާމަ ފެށިފަހުން ލުބުނާނުގެ ހިޒްބުﷲ ޖަމާއަތާއި ޔަހޫދީންނާއި ދެމެދު ކޮންމެ ދުވަހަކު ވެސް ވަރުގަދަ ޙަމަލާތަކެއް ބަދަލުކުރެއެވެ. ސަރަޙައްދީ ރޮނގު ހުރަސްކޮށް ދެ ފަރާތުގެ ދެމެދުގައި ހިނގާ ހަމަނުޖެހުންތަކުގެ ސަބަބުން ސަރަޙައްދީ ހަމަނުޖެހުމެއް އުފެދިދާނެ ކަމުގެ ބިރު ވަނީ ހީވެފައެވެ. އެއާއެކު އެ ކަމަށް އޮތް ސިޔާސީ ޙައްލުތަކާ ބެހޭ ގޮތުން މަޝްވަރާކުރުމަށް ހުޅަނގުގެ ސިޔާސީވެރިން އެކި ފަހަރު މަތިން ވަނީ ލުބުނާނަށް ދަތުރުކޮށްފައެވެ.
ލުބުނާނުގެ ސަރަޙައްދީ ރޮނގު ބެލެހެއްޓުން ހަވާލުކޮށްފައިވާ އދގެ ޞުލްޙަ ބަލަހައްޓާ ފައުޖުގައި ޖަރުމަންވިލާތުގެ ސިފައިން ޙަރަކާތްތެރިވެއެވެ.