ސޯމާލިޔާއަށް ދަތުރުކުރި އދގެ ހެލިކޮޕްޓަރެއް އެ ޤައުމުގައި ޙަރަކާތްތެރިވާ އަލް ޝަބާބު ޖަމާޢަތުން އަތުލައިގެންފިއެވެ. ހެލިކޮޕްޓަރު އަތުލައިގެންފައި ވަނީ އެ ޖަމާޢަތުގެ ބާރުގެ ދަށުގައި އޮންނަ ސަރަޙައްދަކަށް ކުއްލި ޙާލަތުގައި ޖެއްސުމުންނެވެ.
ހެލިކޮޕްޓަރު ޖައްސަން ޖެހުނީ އެއަށް ކުރިމަތިވި ޓެކްނިކަލް މައްސަލައަކާ ގުޅިގެންނެވެ. އަލް ޝަބާބުން ހެލިކޮޕްޓަރު އަތުލައިގެންފައިވާކަން ސޯމާލިޔާއަށް އެހީ ފޯރުކޮށްދިނުމަށް އދން ކަނޑައަޅާފައިވާ މިޝަނުންވެސް ވަނީ ކަށަވަރުކޮށްދީފައެވެ. ބޭސް ފަރުވާއަށް ބޭނުންވާ ސާމާނު ހިފައިގެން ދަތުރުކުރި ހެލިކޮޕްޓަރުގައި ތިބި މީހުންގެ ތެރޭގައި ސޯމާލިޔާގެ ދެ މީހުންނާއި އެހެން ޤައުމުތަކުގެ ބަޔަކު ވެސް ހިމެނެއެވެ. އެ މީހުން ވެސް ތިބީ އަލް ޝަބާބުގެ ބެލުމުގެ ދަށުގައެވެ.
އަމިއްލަ ވެރިކަމެއް ޤާއިމު ކުރުމަށް 2006 ވަނަ އަހަރުން ފެށިގެން އަލްޤައިދާއާ ގުޅުން އޮންނަ އަލް ޝަބާބުން ދަނީ ސޯމާލިޔާގެ ސަރުކާރާ ދެކޮޅަށް ހަނގުރާމަކުރަމުންނެވެ. 2010 ވަނަ އަހަރުގެ ތެރޭގައި އަލް ޝަބާބަށް ނާކާމިޔާބީތަކަކާ ކުރިމަތިލާން ޖެހުނު ނަމަވެސް އެ ޖަމާޢަތުގެ ބާރުގެ ދަށުގައި ސޯމާލިޔާގެ ދެކުނާއި މެދުތެރޭގެ ބޮޑެތި ސަރަޙައްދުތަކެއް އެބައޮތެވެ.