ރަޝިޔާއިން ޔޫކްރެއިންގެ މައި ރަށްތަކަށް އަމާޒުކޮށް ވަރުގަދަ މިސައިލް ޙަމަލަތަކެއް ދީފިއެވެ. ރަޝިޔާއިން 37 މިސައިލާއާއި ތިން ޑްރޯން ބޭނުން ކޮށްގެން ދީފައިވާ ޙަމަލާތައް އަމާޒު ކޮށްފައި ވަނީ ޔޫކްރެއިންގެ މައި ރަށްތަކަށެވެ. މީގެ ކުރިން ރަޝިޔާއިން ދީފައިވާ އެ ފަދަ ގިނަ ޙަމަލަތައް ޔޫކްރެއިންގެ ފައުޖުން ދިފާޢުކުރި ނަމަވެސް އެންމެ ފަހުން ދިން ޙަމަލާތަކުގެ ތެރެެއިން ދިފާޢު ކުރެވިފައި ވަނީ ނިސްބަތުން މަދު ޢަދަދެއްގެ މިސައިލްތަކެކެވެ.
ޔޫކްރެއިންގެ ވައިގެ ސިފައިން ބުނީ ރަޝިޔާގެ ޙަމަލާތަކުގެ ތެރެއިން ދިފާޢު ކޮށް ވައްޓައިލެވިފައި ވަނީ އެންމެ އަށް މިސައިލް ކަމުގައެވެ. އެ ކަމުގެ ސަބަބެއް ކަމަށް ޔޫކްރެއިންގެ އަސްކަރިއްޔާއިން ބުނީ އެ ޤައުމުގެ ވައިގެ ދިފާޢީ ނިޒާމުގައި ބޭނުން ކުރާ މިސައިލްތަކުގެ ޢަދަދު މަދުވަމުން ދިޔުމެވެ. އަދި ރަޝިޔާގެ ޙަމަލާތަކުގައި ބޭނުން ކޮށްފައި ވަނީ ވަރަށް ދުވެލި ބާރު ބެލިސްޓިކް މިސައިލްތަކެއް ކަމަށާއި އެ ފަދަ މިސައިލްތަކަކީ ދިފާޢު ކުރަން ފަސޭހަ ހަތިޔާރެއް ނޫން ކަމުގައި ވެސް ޔޫކްރެއިނުން ބުނެއެވެ.
ނަމަވެސް، ރަޝިޔާއިން ޙަމަލަދޭން ބޭނުންވި އަމާޒުތަކަށް 20 މިސައިލެއް ވާސިލުވެފައި ނުވާ ކަމުގައި ޔޫކްރެއިންގެ އަސްކަރިއްޔާއިން ބުނެއެވެ. ރަޝިޔާއިން ޙަމަލާ ދޭން މަސައްކަތް ކޮށްފައި ވަނީ ކޮން އަމާޒުތަކަކަށް ކަމެއް ސާފެއް ނޫނެވެ. ނަމަވެސް، ޔޫކްރެއިންގެ ފަސް ސަރަޙައްދަކަށް ދީފައިވާ ޙަމަލާތައް ދިފާޢު ކޮށްފައިވާ ކަމުގައި ޔޫކްރެއިންގެ އަސްކަރިއްޔާއިން ހާމަކުރިއެވެ.
ރަޝިޔާގެ ޙަމަލާތައް އަމާޒު ކޮށްފައިވާ ރަށްތަކުގެ ތެރޭގައި ޔޫކްރެއިންގެ އިރުދެކުނުގައިވާ ދްނީޕްރޯއާއި އުތުރުގައި އޮންނަ ޗަރްނިހިވް ހިމެނޭ ކަމުގައި އެ ސަރަޙައްދުތަކުގެ ގަވަރުނަރުން ކަށަވަރު ކޮށްދެއެވެ. ޗަރްނިހިވްގެ ފުލުހުން ބުނީ ރަޝިޔާއިން ދިން މިސައިލް ޙަމަލާއެއްގައި އެ ރަށުގައި ޢާންމުން ދިރިއުޅޭ ގެއަކާއި އޮފީސް ޢިމާރާތަކަށް ބޮޑެތި ގެއްލުންތަކެއް ލިބުނު ކަމުގައެވެ. އޭގެ ތެރެއިން އެއް ޢިމާރާތް ސުންނާފަތިވެފައިވާ ކަމުގައި ވެސް ފުލުހުން ބުންޏެވެ.