އޮކްޓޫބަރު 7 ވަނަ ދުވަހު ޙަމާސުން ރަހީނު ކުރި ޔަހޫދީންގެ ތެރެއިން ތިން މީހަކު ފެންނަ ވީޑިޔޯއެއް އެ ޖަމާޢަތުން އާންމު ކޮށްފިއެވެ. އެ ވީޑިޔޯއާ އެކު ޙަމާސުން ވަނީ ޔަހޫދީންނަށް ސުވާލެއް ހުށަހަޅާފައެވެ: އެ ތިން މީހުންނަށް ވާނީ ކިހިނެއްތޯއެވެ؟ އެ ތިން މީހުން މަރުވާނީތޯއެވެ؟ ނުވަތަ އޭގެ ތެރެެއިން ބަޔަކު މަރުވެ އަނެއްބައި މީހުން ޒަޚަމުވާނީތޯއެވެ؟ ނުވަތަ އެ އެންމެން މިނިވަންކަމާ އެކު އެނބުރި އެ މީހުންގެ ޢާއިލާތަކުގެ ގާތަށް ދާނީތޯއެވެ؟
ފަލަސްޠީނުގެ ޣައްޒާގައި ވެރިކަން ކުރާ ޙަމާސުން އެ ވީޑިޔޯ ޢާންމު ކޮށްފައި ވަނީ ޖަނަވަރީ 14 ވަނަ ދުވަހުއެވެ. އަދި، އެ މީހުންނަށް ވީ ގޮތެއް އެއް ދުވަސް ފަހުން ހާމަ ކުރާނެ ކަމުގައި ވެސް އެ ވީޑިޔޯގައި ޙަމާސުން ބުނެއެވެ.
އޮކްޓޫބަރު 7 ވަނަ ދުވަހު ޙަމާސުން ހިންގި އަސްކަރީ ޙަރަކާތުގައި ޔަހޫދީންގެ 240 މީހުން ރަހީނު ކުރިއެވެ. ނަމަވެސް، ޔަހޫދީންނާ އެކު ހެދި އެއްބަސްވުމެއްގެ ދަށުން އޭގެ ތެރެއިން 80 އަށްވުރެ ގިނަ އަސީރުން ވަނީ މިނިވަން ކޮށްފައެވެ. އަދި ޔަހޫދީންގެ އަމިއްލަ ޙަމަލާތަކުގައި އަސީރުންގެ ތެރެއިން 25 މީހުން މަރުވެފައިވާ ކަމުގައި ޙަމާސުން ބުނެއެވެ. އެ ޖަމާޢަތުގެ ބެލުމުގެ ދަށުގައި މިހާރު ތިބީ 132 ވަރަކަށް އަސީރުން ކަމަށް ބެލެވެއެވެ.
އަސީރުންގެ ވީޑިޔޯ ޢާންމު ކުރުމާ އެކު ޔަހޫދީ ފައުޖުން ވަނީ ޣައްޒާގައި ހިންގަމުންދާ ޢުދުވާން އިތުރަށް ވަރުގަދަ ކުރަން ފަށާފައެވެ. ބޮންއެޅުން އިތުރު ކޮށްފައެވެ. އަސްކަރީ ޓޭންކުފަހަރާއި ބަރުހަތިޔާރު ބޭނުން ކޮށްގެން ދެމުންދާ ޙަމަލަތައް އިތުރު ކޮށްފައެވެ.
މީގެ ތެރެއިން އެއް ޙަމަލަ އަމާޒު ކޮށްފައި ވަނީ ޣައްޒާގެ އުތުރުގައި ޢައްޒާ ސިޓީގައި އޮންނަ ޢާންމުން ދިރިއުޅޭ ގެއަކަށެވެ. އެ ޙަމަލާގައި އެ ގޭގައި ދިރިއުޅޭ 12 މީހުން ވަނީ ޝަހީދު ކޮށްލާފައެވެ. މީގެ އިތުރުން ދެކުުނުގައި އޮންނަ ޚާން ޔޫނިސަށް ވެސް ޔަހޫދީ ފައުޖުން ވަނީ ވަރުގަދަ ޙަމަލަތަކެއް ދީފައެވެ.
ފަލަސްޠީނުގެ ޞަފާ މީޑިޔާއިން ބުނީ ޚާން ޔޫނިސްގައި ޔަހޫދީންގެ އަސްކަރީ ޓޭންކުތަކުން ޙަރަކާތްތެރިވަމުންދާ ކަމުގައެވެ. އަދި އަލް-ބުރަޔިޖާއި އަލް-މަޣާޒީ ރެފިއުޖީން ކޭމްޕަށް ވަރުގަދަ ޙަމަލާތަކެއް ދީފައިވާ ކަމުގައެވެ. ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ޤަތުލުޢާންމުގެ މަންޒަރުތަކަށް ދުނިޔެއަށް ހާމަކުރުމަށް ހުރަސް އެޅުމުގެ ގޮތުން އެ މީހުން ވަނީ ޣައްޒާއިން މުވާސަލާތީ ޚިދުމަތްތަކާއި އިންޓަނެޓުގެ ޚިދުމަތް ވެސް ކަނޑައިލާފައެވެ. އެއީ އެ ޚިދުމަތްތައް ކަނޑައިލާފައި އޮންނަތާ ހަތަރު ވަނަ ދުވަހެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނަށް 100 ދުވަސް ފުރުނު ދުވަހު ޔަހޫދީ ފައުޖުން ވަނީ ފަލަސްޠީނުގެ 132 މީހުން ޝަހީދު ކޮށްލާފައެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 24,100 އުފުލިފައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 61,000 އަށް އަރާފައެވެ.
ޔަހޫދީންގެ ޙަމަލާތަކުގައި ޣައްޒާ އޮތީ ސުންނާފަތި ކޮށްލާފައެވެ. އަދި ގެދޮރު ނެތިފައިވާ 2 މިލިޔަނެއްހާ މީހުން މި ވަޤުތު ދިރުއުޅެމުން ދަނީ ޣައްޒާގެ ދެކުނުގައި އޮތް ސަރަޙައްދުތަކުގައެވެ. ޓެންޓުތަކާއި ވަގުތީ ހިޔާތަކުގައެވެ. ޣައްޒާގެ ފުރަބަންދު ހަރުކަށިކޮށް، އެ ސަހަރަށް ކާބޯތަކެތި އެތެރެ ކުރަން ހުރަސް އެޅުމާއެކު، ޣައްޒާގެ ގިނަ ރައްޔިތުން މިހާރު ދަނީ ހައިހޫނުކަމާ ހަނގުރާމަ ކުރަމުންނެވެ. އެ ކަމަށް ނިމުމެއް ގެންނަން އދން އަނެއްކާ ވެސް ވަނީ ގޮވައިލާފައެވެ.
"މި ވަގުތު އޮތް އެންމެ މުހިންމު ކަމަކީ ޣައްޒާއަށް އިންސާނީ އެހީ ވައްދަން ހުރަސްޅުން ހުއްޓައިލުން. އިތުރު ބަޔެއްގެ ފުރާނަ ސަލާމަތް ކުރެވޭނީ އެ ކަން ކޮށްގެން،" ދުނިޔޭގެ ޞިއްޙަތު ޖަމުޢިއްޔާގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވިދާޅުވިއެވެ. ހައިހޫނު ކަމުގެ ސަބަބުން ޣައްޒާގެ އިތުރު ރައްޔިތުންތަކެއް މަރާ ކުރިމަތިލާން ޖެހިފައިވާ ކަމުގައި ވެސް އޭނާ ވިދާޅުވިއެވެ.