ރަތް ކަނޑު ހުރަސްކޮށް ދަތުރުކުރާ އުޅަނދުފަހަރަށް ޔަމަނުގައި ހަރަކާތްތެރިވާ ހޫޘީ ޖަމާޢަތުން ދެމުންދާ ޙަމަލާތައް ގުޅިފައި އޮތީ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ކަމަށް ވިދާޅުވެ، އެ ޤަތުލުޢާންމު ހުއްޓައިލުމަށް ސަޢޫދީ ޢަރަބިއްޔާގެ ޚާރިޖީ ވަޒީރު ފައިޞަލް ބިން ފަރްޙާން އަލް-ސަޢުދު ގޮވައިލައްވައިފިއެވެ. އޭނާ ޔަހޫދީންގެ ޢުދުވާންތައް ހުއްޓައިލުމަށް ގޮވައިލައްވާފައި ވަނީ ސްވިޓްޒަލެންޑުގެ ޑާވޯސްގައި ކުރިއަށްދާ ދުނިޔޭގެ އިޤުތިޞާދީ ފޯރަމްގައި ވާހަކަފުޅު ދައްކަވަމުންނެވެ.
ޔަހޫދީންގެ ޢުދުވާނާ ގުޅޭ ގޮތުން ވާހަކަފުޅު ދައްކަަމުން ފައިޞަލް ވިދާޅުވީ ސަޢޫދީ ޢަރަބިއްޔާގެ އެންމެ މުހިންމު އަމާޒަކީ ވީ އެންމެ އަވަހަކަށް ޔަހޫދީންގެ ޤަތުލުޢާންމަށް ނިމުމެއް ގެނައުން ކަމުގައެވެ. އަދި، ފަލަސްޠީނުގެ މިނިވަން ދަޢުލަތެއް ޤާއިމުކޮށްދިނުމަށް ޔަހޫދީން އެއްބަސްވެއްޖެނަމަ ޔަހޫދީން އިސްތިޢުމާރުކޮށްފައިވާ ބިންތަކުގައި ޤާއިމުކޮށްފައިވާ ދަޢުލަތަކީ މިނިވަން ދަޢުލަތެއްގެ ގޮތުގައި ބަލައިގަންނަން ސަޢޫދީ ޢަރަބިއްޔާއިން ތައްޔާރަށް އޮތް ކަމުގައި ވެސް އޭނާ ވިދާޅުވިއެވެ.
"އަޅުގަނޑުމެން ޤަބޫލު ކުރަނީ، ސަރަޙައްދީ ޞުލްޙަ ޤާއިމު ކުރެވޭނީ ޔަހޫދީން ވެސް ޞުލްޙަވާން ބޭނުންވުމުން ކަން. އެ ކަން ކުރެވެން އޮތް ހަމަ އެކަނި ގޮތަކީ، ފަލަސްޠީނުގައި ޞުލްޙަ ޤާއިމުކުރުން. ފަލަސްޠީނުގައި ޞުލްޙަ ޤާއިމު ކުރެވޭނީ ފަލަސްޠީނުގެ މިނިވަން ދަޢުލަތެއް ޤާއިމު ކޮށްގެން،" ފައިޞަލް ވިދާޅުވިއެވެ.
ޔަހޫދީންގެ މިނިވަން ދަޢުލަތް ސަޢޫދީ ޢަރަބިއްޔާއިން ގަބޫލު ކުރާނެތޯ ސުވާލު ކުރުމުން ފައިޞަލް ވިދާޅުވީ ސަޢޫދީން ހުށަހަޅާފައިވާ ޝަރުޠުތަކާ އެކު އެއީ ކުރެވިދާނެ ކަމެއް ކަމަށް ގަބޫލު ކުރައްވާ ކަމުގައެވެ. އަދި ފަލަސްޠީނުގެ މިނިވަން ދަޢުލަތެއް ޤާއިމުކޮށް ސަރަޙައްދީ ހަމަޖެހުމަށް މަގުފަހި ކުރުމަކީ ސަޢޫދީ ޢަރަބިއްޔާއިން މިހާރު ވެސް އެމެރިކާއާ ގުޅިގެން ކުރަމުންދާ މަސައްކަތްތަކެއް ކަމުގައި ފައިޞަލް ވިދާޅުވިއެވެ.
ފަލަސްޠީނުގެ ޣައްޒާގައި ދިރިއުޅޭ 2.3 މިލިޔަން މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޢުދުވާނެއް ފަށާފައި ވަނީ އޮކްޓޫބަރު 7 ވަނަ ދުވަހުއެވެ. އެ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 24,285 އަށް އުފުލިފައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި ޒަޚަމުކޮށްލާފައިވާ މީހުންގެ ޢަދަދު ވަނީ 61,154 އަށް އަރާފައެވެ.