ޣައްޒާގެ ދެކުނުގައި އޮންނަ ޚާން ޔޫނިސްގެ އަލް-ނާޞިރު ހޮސްޕިޓަލް ކައިރީގައި ޔަހުދީ ފައުޖުން ނުރައްކާތެރި ޢުދުވާންތަކެއް ހިންގަމުންދާ ކަމުގައި އެ ހޮސްޕިޓަލުގައި ހަރަކާތްތެރިވާ ޞިއްޙީ ޚިދުމަތްތެރިން ބުނެފިއެވެ. އަލް-ނާޞިރު ހޮސްޕިޓަލަކީ ޣައްޒާގެ ދެކުނުގައި މިހާރު ޚިދުމަތްދެމުންދާ މަދު ހޮސްޕިޓަލްތަކުގެ ތެރެއިން އެންމެ ބޮޑު މަރުކަޒެވެ. ޔަހޫދީ ސިފައިން ދަނީ އެ ތަން ވަށައިލާ އެ ސަރަޙައްދަށް ވަރުގަދަ ޙަމަލާތަކެއް އަމާޒު ކުރަމުންނެވެ.
އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނާ ގުޅިގެން ޣައްޒާގެ އުތުރުގެ ސަރަޙައްދުތަކުގައި ދިރިއުޅޭ ގިނަ ރައްޔިތުން ވަނީ އެ ސަހަރުގެ ދެކުނަށް ދަތުރު ކޮށްފައެވެ. އޭގެ ތެރެއިން ގިނަ ޢަދަދެއްގެ ބަޔަކު މިހާރު ތިބީ ޚާން ޔޫނިސްގައެވެ. އަދި އެ ރަށުގައި ހުރި އަލް-ނާޞިރު ހޮސްޕިޓަލުގައި ވެސް އެ ތަކެއް ސަތޭކަ މީހުން ދަނީ ރައްކާތެރިކަން ހޯދަމުންނެވެ. އެ ހޮސްޕިޓަލް ހުންނަ ސަރަޙައްދަށް ޔަހޫދީ ފައުޖުން ޙަމަލާ ދޭން ފެށުމުން ހޮސްޕިޓަލް ހުސްކުރުމުގެ މަސައްކަތް ވަނީ ފަށައިފައެވެ.
އެ ކަމާ ގުޅިގެން ބައިނަލްއަޤުވާމީ ޖަމުޢިއްޔާއެއް ކަމުގައިވާ ޑޮކްޓަރސް ވިތްއައުޓް ބޯޑަރސް (އެމްއެސްއެފު)ން ވަނީ ކަންބޮޑުވުން ފާޅު ކޮށްފައެވެ. އަލް-ނާޞިރު ހޮސްޕިޓަލުގައި ޙަރަކާތްތެރިވަމުންދާ އެ ޖަމުޢިއްޔާގެ ޞިއްޙީ ޚިދުމަތްތެރިން ބުނީ އެ ތަނުގައި ތިބި ބަލި މީހުންނާއި ޢާންމުންގެ ފުރާނައަށް ނުރައްކާވެފައިވާ ކަމުގައެވެ.
"އަލް-ނާޞިރު ހޮސްޕިޓަލުގައި ހުރި އެމްއެސްއެފްގެ އިސް ސަރޖަން ވިދާޅުވީ ޔަހޫދީ ފައުޖުން އެ ހޮސްޕިޓަލް ހުރި ސަރަޙައްދަށް ޙަމަލާދޭން ފެށުމުން އެ ތަނުގައި ތިބި ގިނަ ޢަދަދެއްގެ ބަލި މީހުންނާއި ޢާންމުން އެ ތަން ދޫކޮށް ރައްކާތެރިކަން ހޯދަން މަސައްކަތް ކޮށްފައިވާ ކަމުގައި،" އެމްއެސްއެފުން ނެރުނު ބަޔާނެއްގައި ބުނެފައިވެއެވެ.
ޚާން ޔޫނިސްގެ އިތުރުން ޣައްޒާގެ އެންމެ ދެކުނަށް އޮންނަ ރަފަޙަށް ވެސް ޔަހުދީ ފައުޖުން ވަނީ ގިނަ ޢަދަދެއްގެ ޙަމަލާތަކެއް އަމާޒު ކޮށްފައެވެ. މީގެ ތެރެއިން އެއް ޙަމަލާގައި އަލް-ޛާމިލީ ޢާއިލާގެ 16 މެންބަރުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުންޏެވެ. ޔަހޫދީ ފައުޖުން ބޮން އަޅާފައި ވަނީ އެ ޢާއިލާގެ މެންބަރުން ދިރިއުޅޭ ގެއަށެވެ. ޝަހީދު ކޮށްލާފައިވާ މީހުންގެ ތެރޭގައި ގިނައީ ތުއްތު ކުދިންނެވެ.
އޮކްޓޫބަރު 7 ވަނަ ދުވަހު ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ފަށާފައިވާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 24,620 އަށް އަރައެވެ. އޭގެ ތެރޭގައި 9,000 އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު ވަނީ 61,830 އަށް އުފުލިފައެވެ.