ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް ހުއްޓައިލުމަށް ގޮވައިލާ ވިލާތުގެ އިއްތިހާދުގެ ޤާނޫނު ހަދާ މަޖިލީހުން ޤަރާރެއް ފާސްކޮށްފިއެވެ.
ފަލަސްޠީނުގެ ވީހާވެސް ގިނަ ޢަދަދެއްގެ މުސްލިމުން ޝަހީދު ކުރުމުގެ ނިޔަތުގައި ޔަހޫދީން ހިިންގަމުންދާ ޢުދުވާން ހުއްޓައިލަން ވިލާތުގެ ޤާނޫނު ހަދާ މަޖިލީހުން ގޮވައިލި ނަމަވެސް އެއާ އެކު ޝަރުޠުތަކެއް ވެސް ކޮށްފައިވާކަން ފާހަގަކޮށްލަން ޖެހެއެވެ. އޭގެ ތެރެއިން އެއް ޝަރުޠަކީ ޢައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ ޔަހޫދީ އަސީރުން މިނިވަން ކުރުމެވެ. އަދި ޙަމާސް ޖަމާޢަތް ރޫޅައިލުމަކީ ވެސް ވިލާތުގެ ޝަރުުޠުތަކުގެ ތެރޭގައި ހިމެނޭ ކަމެކެވެ. ވިލާތުގެ ޤާނޫނު ހަދާ މަޖިލީހަށް ޤަރާރެއް ހުށަހަޅާފައި ވަނީ، އެ މަޖިލީހުގެ މެންބަރުންގެ ތެރެއިން ތިން ގުރޫޕަކުން އިސްނަގައިގެންނެވެ. އެ ޤަރާރުގެ ބޭނުމަކީ ޔަހޫދީންގެ ޢުދުވާންތައް ހުއްޓުވައި އެ މައްސަލައަށް ސިޔާސީ ޙައްލެއް ހޯދުމަށް ބާރު އެޅުމެވެ.
މަޖިލީހަށް ހުށަހަޅާފައިވާ ޤަރާރުގެ ފުރަތަމަ ދެލިކޮޕީގައި ޙަމާސްގެ މައްޗަށް އެއްވެސް ޝަރުޠެއް ހުށަހަޅާފައި ނުވާކަން ފާހަގަކޮށްލަން ޖެހެއެވެ. އަދި އެއްވެސް ޝަރުޠަކާ ނުލައި ޢުދުވާންތައް ހުއްޓައިލަން ޔަހޫދީންގެ މައްޗަށް ގޮވައިލާފައިވެއެވެ. ނަމަވެސް މަޖިލީހުގެ އަޣުލަބިއްޔަތު އޮތް ޔޫރަޕިޔަން ޕީޕަލްސް ޕާޓީިން ވަނީ ޤަރާރުގެ ދެލިކޮޕީ ބަދަލުކުރުވައި ޙަމާސްގެ މައްޗަށް ޝަރުޠުތަކެއް ކަނޑައަޅާފައެވެ.
ފާސްކޮށްފައިވާ ޤަރާރުގައި ޙަމާސުން ރަހީނު ކޮށްފައިވާ އަސީރުން އެއްވެސް ޝަރުޠަކާ ނުލައި މިނިވަން ކުރުމާއި އެ ޖަމާޢަތް ރޫޅައިލުމަށް ވެސް ވަނީ ހިމަނާފައެވެ. އަދި މަޖިލީހުގެ އަޢުލަބިއްޔަތުން ޤަރާރު ފާސްވި ނަމަވެސް އެއީ ޢަމަލު ކުރުމަށް ޔަހޫދީންގެ މައްޗަށް ލާޒިމުވާ ޤަރާރެއް ނޫނެވެ. އެ ޤަރާރުން ހަމައެކަނި ދޭހަކޮަށްދެނީ ވިލާތުގެ ޤައުމުތަކުގެ ގިނަ ރައްޔިތުން ޔަހޫދީންގެ ޢުދުވާނާ ދެކޮޅު ކަމެވެ.
ވިލާތުގެ ޤާނޫނު ހަދާ މަޖިލީހުގެ ޤަރާރު އެ އިއްތިހާދުގެ މުވައްސަސާތަކާއި މެންބަރު ޤައުމުތަކުގެ އިތުރުން ޔަހޫދީންގެ ސަރުކާރާއި ފަލަސްޠީނުގެ އިދާރާތަކާއި އދއާއި މިޞްރުގެ ސަރުކާރާ ވެސް ޙިއްޞާ ކުރާނެއެވެ. ޔަހޫދީންގެ ލާއިންސާނީ ޤަތުލުޢާންމުތައް ހުއްޓުވަން ވިލާތުގެ ޤާނޫނު ހަދާ މަޖިލީހުން ޤަރާރެއް ފާސްކޮށްފައި ވަނީ އޮކްޓޫބަރު 7 ވަނަ ދުވަހު ޔަހޫދީން ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު 24,620އަށް އުފުލިފައިވާ ދަނޑިވަޅެއްގައެވެ. އަދި ޒަޚަމުކޮށްލާފައިވާ މީހުންގެ ޢަދަދު ވަނީ 61,830އަށް އުފުލިފައެވެ.