ޔަހޫދީ ފައުޖުން ޣައްޒާގެ ދެކުނުގައި އޮންނަ ޚާން ޔޫނިސްގައި ހުންނަ މައި ހަސްފަތާލަށް ވަރުގަދަ ޑްރޯން ޙަމަލާތަކެއް ދީފައިވާ ކަމަށް ރެޑް ކްރެސެންޓުން ބުނެފިއެވެ.
ޣައްޒާގެ ދެކުނުގައި އޮންނަ ސަރަޙައްދުތަކަށް ޔަހޫދީ ފައުޖުން ދެމުންދާ ޙަމަލާތައް ފަހަކަށް އައިސް ވަނީ އިތުރުކޮށް ވަރުގަދަ ކޮށްފައެވެ. އެ ޙަމަލާތަކާ ގުޅިގެން އެ ސަރަޙައްދުގައި ދިރިއުޅޭ ހާލުގައި ޖެހިފައިވާ އެތަކެއް ސަތޭކަ ހާސް ބަޔެއްގެ ފުރާނައަށް ވަނީ ނުރައްކާވެފައެވެ.
އަލް-އަމަލް ހަސްފަތާލަކީ ޚާން ޔޫނިސްގައި ހުންނަ މައި އެއް ހަސްފަތާލެވެ. އަދި އެއީ މިހާރު ޞިއްޙީ ފަރުވާގެ ޚިދުމަތް ދެމުންދާ މަދު ހަސްފަތާލުތަކުގެ ތެރެއިން އެއް މަރުކަޒެވެ. އެ ތަނުގައި ގިނަ ޢަދަދެއްގެ ބަލިމީހުންގެ އިތުރުން ޔަހޫދީންގެ ޙަމަލާތަކުގައި ގެދޮރު ނެތިފައިވާ އެތަކެއް ސަތޭކަ ބަޔަކު ދަނީ އެ ތަނުގައި ރައްކާތެރިކަން ހޯދަމުންނެވެ. އެ ހަސްފަތާލަށް ޔަހޫދީން ދީފައިވާ ޑްރޯން ޙަމަލާތަކުގައި ގިނަ ޢަދަދެއްގެ ބަޔަކު ޒަޚަމުވި ކަމުގައި ރެޑް ކްރެސެންޓުން ބުނެއެވެ.
ޔަހޫދީ ފައުޖުގެ ޙަމަލާތައް ރެޑް ކްރެސެންޓުގެ އޮފީހަށް ވެސް އަމާޒު ކޮށްފައިވާ ކަމުގައި އެ ޖަމުޢިއްޔާއިން ބުނެއެވެ. މީގެ އިތުރުން ޚާން ޔޫނިސްގައި ހުންނަ އަލް-ނާޞިރު ހަސްފަތާލު ކައިރީގައި ވެސް ޔަހޫދީ ފައުޖުން ދަނީ ބަރުހަތިޔާރާ އެކު ޙަރަކާތްތެރިވަމުންނެވެ. އެއީ ވެސް މިހާރު ޞިއްޙީ ފަރުވާ ފޯރުކޮށްދެމުންދާ މަދު ހަސްފަތާލުގެ ތެރެއިން އެއް މަރުކަޒެވެ. އެ ތަނަށް ޔަހޫދީންގެ އަސްކަރީ ޓޭންކުފަހަރުން ޙަމަލާ ދެމުންދާ ކަމުގައި ރެޑް ކްރެސެންޓުން ބުނެއެވެ.
ދުނިޔޭގެ ޞިއްޙަތު ޖަމުޢިއްޔާއިން ބުނީ ޣައްޒާގައި ހުންނަ 36 ހަސްފަތާލުގެ ތެރެއިން ގިނަ ހަސްފަތާލުތަކަށް ޔަހޫދީ ފައުޖުން ބޮންއަޅައި އެ ތަންތަން ސުންނާފަތި ކޮށްލާފައިވާ ކަމުގައެވެ. މިހާރު ޞިއްޙީ ފަރުވާގެ ޚިދުމަތް ފޯރުކޮށްދެމުން ދަނީ އެންމެ 15 ހަސްފަތާލުގައެވެ. އެ ތަންތަނަށް ވެސް ޔަހޫދީ ފައުޖުން މިހާރު ދަނީ ރަޙުމު ކުޑަ ޙަމަލާތަކެއް އަމާޒު ކުރަމުންނެވެ.
ފަލަސްޠީނުގެ ރެފިއުޖީންނާ ބެހޭ އދގެ އިދާރާއިން ބުނީ ޣައްޒާގެ އާބާދީގެ ބޮޑު ބައެއްގެ ގެދޮރު ނެތިފައިވާ ކަމުގައެވެ. އެ ގޮތުން 2.3 މިލިޔަން މީހުން އާބާދީއެއް އޮތް ޣައްޒާގައި 1.7 މިލިޔަން މީހުންގެ ގެދޮރު ސުންނާފަތި ކޮށްލާފައިވާ ކަމަށާއި އެ މީހުން ހާލުގައި ޖެހިފައިވާ ކަމުގައި އެ އިދާރާއިން ބުނެއެވެ. އެއީ ޣައްޒާގެ އާބާދީ 75 އިންސައްތައެވެ. އެ މީހުން މިހާރު ދިރިއުޅެމުން ދަނީ ވަޤުތީ ހިޔާތަކާއި ޓެންޓުތަކުގައެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ދީފައިވާ ޙަމަލާތަކުގައި 142 މީހުން ޝަހީދު ކޮށްލާފައިވާ ކަމަށާއި އިތުރު 278 މީހުން ޒަޚަމު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ހާމަ ކުރެއެވެ. އޮކްޓޫބަރު 7 ވަނަ ދުވަހު ފެށި ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 24,762އަށް އުފުލިފައެވެ. އަދި ޒަޚަމު ކޮށްލާފައިވާ މީހުންގެ ޢަދަދު 62,108އަށް އަރައެވެ.