ޔަހޫދީ ފައުޖުން ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ތެރޭގައި ގިނައީ މައުސޫމު ކުޑަކުދިންނާއި އަންހެނުން ކަން އދން ބުނެފިއެވެ. މިިންތީގެ ހަމަހަމަކަން ގާއިމު ކުރުމަށް މަސައްކަތް ކުރާ އދގެ އިދާރާއިން ބުނީ ޔަހޫދީންގެ ޢުދުވާނުގައި ޝަހީދުކޮށްލާފައިވާ ކުޑަކުދިންނާއި އަންހެނުންގެ ޢަދަދު 16,000އަށް އުފުލިފައިވާ ކަމުގައެވެ.
ޔަހޫދީ ފައުޖުން ކޮންމެ އެއްގަޑިއިރެއްގެ ތެރޭގައި ދެ އަންހެނުން ޝަހީދު ކުރަމުންދާކަން ފާހަގަކޮށް އދން ބުނީ ފާއިތުވި 100 ވަރަކަށް ދުވަހުގެ ތެރޭގައި ޣައްޒާގެ 3,000އަށްވުރެ ގިނަ އަންހެނުން ހުވަފަތްވެފައިވާ ކަމުގައެވެ. އަދި ޝަހީދުކޮށްލާފައިވާ ކުޑަކުދިންގެ ޢަދަދު 9,000އަށް އަރާއިރު، 10,000އަށްވުރެ ގިނަ ޢަދަދެއްގެ ކުޑަކުދިން ޔަތީމު ކޮށްލާފައިވާ ކަމުގައެވެ.
ޣައްޒާއަކީ 2.3 މިލިޔަން މީހުން އާބާދީއެއް ދިރިއުޅޭ ސަހަރެކެވެ. އޭގެ ތެރެއިން 1.9 މިލިޔަން މީހުންގެ ގެދޮރު ވަނީ ސުންނާފަތި ކޮށްލާފައެވެ. އދން ބުނީ އޭގެ ތެރޭގައި ގިނައީ އަންހެނުންނާއި އަންހެން ކުދިން ކަމުގައެވެ. އަދި އެ މީހުން މިހާރު ވަޤުތީ ހިޔާތަކާއި ޓެންޓުތަކުގައި ދިރިއުޅެމުން ދަނީ ވަރަށް ނިިކަމެތި ހާލުގައި ކަމަށް އެ އިދާރާއިން ބުންޏެވެ.
މިިންތީގެ ހަމަހަމަކަން ގާއިމު ކުރުމަށް މަސައްކަތް ކުރާ އދގެ އިދާރާގެ އެގްޒެކެޓިކް ޑިރެކްޓަރ ސީމާ ބާޙޫސް ވިދާޅުވީ މީގެ 15 ވަރަކަށް އަހަރު ކުރިން ޔަހޫދީންގެ ޢުދުވާންތަކުގައި ޝަހީދުކޮށްލާފައިވާ މީހުންގެ ތެރެއިން 67 އިންސައްތައަކީ ފިރިހެނުން ކަމުގައެވެ. އަދި އަންހެނުންގެ ނިސްބަތަކީ 14 އިންސައްތަ ކަމަށާއި މިއަދު އެ ޙާލަތު ބަދަލު ކޮށްލާފައިވާ ކަމުގައެވެ.
"ޣައްޒާގެ އަންހެނުންނާއި އަންހެން ކުދިން މިއަދު ތަޙައްމުލު ކުރަމުން އެދާ ހާލަތާ މެދު ހިތާމަ ކުރަން. ނަމަވެސް، ކުރިއަށް އޮތީ މާ ހިތާމަވެރި ދުވަސްތަކެއް ކަން ވިސްނުމަށް ގެންނަން ޖެހޭ. ޣައްޒާއަށް އިންސާނީ އެހީގެ ސާމާނު އެތެރެ ކުރަން ޔަހޫދީން ހުރަސް އަޅަމުންދާ ކޮންމެ ދުވަހަކު، ޣައްޒާގެ އަންހެނުންނާއި އަންހެން ކުދިންނަށް އިތުރު ނިކަމެތިކަމާ ކުރިމަތިލާން ޖެހޭނެ،" ޔަހޫދީންގެ ލާއިންސާނީ ޢުދުވާން މެދުކަނޑައިލަން ގޮވައިލައްވަމުން އޭނާ ވިދާޅުވިއެވެ.
"ޣައްޒާގެ އަންހެނުންނާއި އަންހެން ކުދިންނަށް އެއްވެސް ރައްކާތެރި ކަމެއް ނެތް. ބޭހެއް ނެތް. ޞިއްޙީ ފަރުވާއެއް ނުލިބޭ. ހިޔާވަހި ކަމެއް ނެތް. އެ މީހުންނަށް ވަނީ ހައިހޫނު ކަމާ ކުރިމަތިލާން ޖެހިފައި. އެއްވެސް އުންމީދެއް ނެތް. އިންސާފެއް ނެތް،" ބާޙޫސް ވިދާޅުވިއެވެ.
ޙަމާސްއިން އޮކްޓޫބަރު 7 ވަނަ ދުވަހު ޒަޔަނިސްޓު އިސްރާއީލަށް ދިން ޙަމަލާތަކުގެ އަގު ޣައްޒާގެ އަންހެނުންނާއި ކުޑަކުދިން ދައްކަން ނުޖެހޭ ކަމުގައި ވެސް އޭނާ ވިދާޅުވިއެވެ. ޔަހޫދީ ފައުޖުން ޣައްޒާގައި ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 24,762އަށް އުފުލިފައެވެ. އަދި ޒަޚަމު ކޮށްލާފައިވާ މީހުންގެ ޢަދަދު 62,108އަށް އަރައެވެ.