ނުކުޅެދުންތެރިކަން ހުންނަ މީހުންނާއި ދޮށީ ޢުމުރުގެ މީހުންގެ ޤައުމީ ދަފްތަރެއް އެކުލަވާލަނީ
-
ދިރާސާކުރުމަށް ޚާއްޞަ ޕްލޭނެއް އެކުލަބާލާނެ
-
1000 މީހުނަށްވުރެ މަދު އާބާދީގައި ދިރާސާކުރާނީ ކަައުންސިލް އެހީގައި
-
1000އަށްވުރެ ބޮޑު އާބާދީގެ ދިރާސާގައި ވޮލެންޓިއަރުންގެ އެހީ ހޯދާނެ
ނުކުޅެދުންތެރިކަން ހުންނަ މީހުންނާއި ދޮށީ ޢުމުރުގެ މީހުންގެ ޤައުމީ ދަފްތަރެއް އެކުލަވާލުމަށް ޚާއްޞަ ދިރާސާއެއް ކުރިއަށް ގެންދިއުމަށް ސަރުކާރުން ނިންމަވައިފިއެވެ. މިގޮތަށް ނިންމެވީ މިއަދު ބޭއްވެވި ކެބިނެޓު ނިންމެވުމުގައެވެ.
ކެބިނެޓުގެ ނިންމެވުންތަކާއި ގުޅޭގޮތުން މަޢުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވީ، އެ ދިރާސާތައް ކުރިއަށް ގެންދިއުމަށް ކެބިނެޓުން ނިންމެވީ ސިޓީތަކާއި އިދާރާ ދާއިރާތައް ހިންގުމާއި، ޢާންމު މަސައްކަތްތަކާއި ބެހޭ ވުޒާރާއާއި، އިޖުތިމަޢީ އަދި އާއިލީ ތަރައްޤީއާއި ބެހޭ ވުޒާރާ ގުޅިގެންކަމަށެވެ.
ނާޒިމް ވިދާޅުވީ ދޮށީ ޢުމުރުގެ މީހުންނާއި، ނުކުޅެދުންތެރިކަން ހުންނަ މީހުންނަކީ ޤައުމުގެ ތަރައްޤީގައި މުހިންމު ބައެއްކަމަށާއި ސަމާލުކަން ދޭންޖެހޭ ބައެއްކަމަށެވެ. އެގޮތުން މި ދާއިރާތަކުން އިތުރު މަޢުލޫމާތު ހޯދުމަށް ކެބިނެޓުން ނިންމެވިކަމަށް ނާޒިމް ވިދާޅުވިއެވެ. އެ ދިރާސާތަކުގެ ޕްލޭން ކުރުމަށް ކަމާ ގުޅުންހުރި އިދާރާއް ހިމެނޭ ޓެކްނިލް ޓީމެއް އެކުލަވާލާނެކަމަށްވެސް ނާޒިމް ވިދާޅުވިއެވެ.
އެ ދިރާސާތައް ކުރިއަށް ގެންދާއިރު 1000 މީހުންނަށްވުރެ ކުދި އާބާދީތަކުގައި ދިރާސާތައް ކުރިއަށް ގެންދާނީ އެރަށެއްގެ ކައުންސިލްގެ އެހީތެރިކަމާއެކުކަމަށެވެ. ނަމަވެސް އެއަށްވުރެ ބޮޑެތި އާބާދީތަކުގައި ދިރާސާތައް ކުރިއަށް ގެންދިއުމުގައި ވޮލެންޓިއަރުގެ އެހީ ބޭނުންކުރުމަށް އުސޫލެއް އެކުލަވާލުމަށް ނިންމާފައިވާކަމަށްވެސް ނާޒިމް ވިދާޅުވިއެވެ.
"މި ސަރވޭގެ އަލީގައި އެއްކުރެވޭ މަޢުލޫމާތުގެ އަލީގައި ދައުލަތުގެ ނިޒާމުގެ ތެރެއަށް ނުވަދެހުރި ހަވާސާވެފައިތިބި ދޮށީ އުމުރުގެ މީހުންނާއި ޚާއްޞަކޮށް އަޅާލަންޖެހޭ ޙާލަތެއްގައި ތިބި ފަރާތްތައް އަދި ނުކުޅެދުންތެރިކަން ހުންނަ ފަރާތްތައް ދެނެގަނެ އެމީހުންނަށް އެންމެ ފުރަތަމަ މަރުހަލާގައިވެސް ދޭންޖެހޭ އެހީތެރިކަން ދެނެގަނެވި އެމީހުންނަށް ދޭންޖެހޭ އެހީތެރިކަން މިނިސްޓްރީ އޮފް ސޯޝަލް އެންޑް ފެމިލީ ޑެވެލޮޕްމަންޓުން ފޯރުކޮށްދޭނެ ނިޒާމެއް ޤާއިމްކުރުމަށް ނިންމުނު." ޢަބްދުﷲ ނާޒިމް އިބްރާހީމް ވިދާޅުވިއެވެ.
މީގެ އިތުރުން ނުކުޅެދުންތެރިކަން ހުންނަ މީހުންނާއި ދޮށީ ޢުމުރުގެ މީހުންގެ މަޢުލޫމާތު އެއްތަނަކުން ބަލައި ޓްރެކްކުރެވޭނެ ސޮފްޓުވެއަރއެއް އަދާހަމަކުރުމުގެ ކަންކަން ސިޓީތަކާއި އިދާރާ ދާއިރާތައް ހިންގުމާއި، ޢާންމު މަސައްކަތްތަކާއި ބެހޭ ވުޒާރާއާއި، އިޖުތިމަޢީ އަދި އާއިލީ ތަރައްޤީއާއި ބެހޭ ވުޒާރާ ގުޅިގެން ކުރިއަށް ގެންދިއުމަށް ނިންމާފައިވާކަމަށްވެސް ނާޒިމް ވިދާޅުވިއެވެ. އެމީހުންގެ ކަންކަން މޮނީޓަރ ކުރުމަށް އެކުލަވާލާފައިވާ އިބަމަ ނިޒާމް ހަރުދަނާކޮށް އިތުރު ޚިދުމަތްތައް ޤާއިމްކުރުމަށް ނިންމަވާފައިވާކަމަށްވެސް ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޒިމް އިބްރާހީމް ވިދާޅުވިއެވެ.