ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ އިސްތިޢުމާރީ ފައުޖުން ހިންގަމުންދާ ލާއިންސާނީ ޢުދުވާންތައް އެއް މަސް ދުވަހުގެ މުއްދަތަކަށް މެދުކަނޑައިލުމާ ގުޅޭ ގޮތުން ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީ ދަޢުލަތާ ދެމެދު މަޝްވަރާ ކުރަމުން އެބަދެއެވެ.
ޔަހޫދީން ވަނީ އެއް މަސް ދުވަހުގެ މުއްދަތަކަށް ޢުދުވާންތައް މެދުކަނޑައިލަން އެއްބަސްވެފައެވެ. އަދި ޙަމާސުން ވަނީ އެ މުއްދަތުގެ ތެެރޭގައި އެ ޖަމާޢަތުގެ ބެލުމުގެ ދަށުގައި ތިބި އަސީރުންގެ ތެރެއިން ބައެއް މީހުން މިނިވަން ކުރަން އެއްބަސްވެފައެވެ. ނަމަވެސް ދެ ފަރާތުގެ ދެމެދުގައި އޮތް ޚިޔާލު ތަފާތުވުންތަކުގެ ސަބަބުން އެއްބަސްވުމެއް އެކުލަވައިލާ ޢަމަލު ކުރަން ފެށިފައި ނުވާ ކަމުގައި ދެ ފަރާތުގެ މެދުގައި މަޝްވަރާތައް ވިލަރެސް ކުރާ ޤައުމުތަކުން ބުނެއެވެ. އެ މަޝްވަރާތަކުގައި މެދުވެރިއެއްގެ ދައުރު އަދާ ކުރަނީ ޤަޠަރާއި މިޞްރާއި އެމެރިކާއިންނެވެ.
ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ޢުދުވާން ދާއިމީ ގޮތުން ހުއްޓައިލުމާ ގުޅޭ ގޮތުން ދެ ފަރާތުގެ މެދުގައި އަދިވެސް ދަނީ މަޝްވަރާ ކުރަމުންނެވެ. އަދި އެއް މަސް ދުވަހަަށް ޢުދުވާން ވަޤުތީ ގޮތުން މެދުކަނޑައިލުމާ ގުޅޭ ގޮތުން އެއްބަސްވުމެއްގައި ސޮއި ކުރެވިފައި ނުވަނީ އެ މައްސަލައަށް ދާޢިމީ ހައްލެއް ހޯދުމާ ގުޅޭ ގޮތުން ދެ ފަރާތުގެ މެދުގައި ހުރި ޚިޔާލުތަފާތުވުންތަކުގެ ސަބަބުންނެވެ.
ޙަމާސުން ބުނީ އަސީރުން މިނިވަން ކުރާނީ ބައިބަޔަށް ބަހާލައިގެން ކަމުގައެވެ. އެ ގޮތުން އެންމެ ފުރަތަމަ މިނިވަން ކުރާނީ އަސީރުންގެ ތެރެއިން ޢާންމު ރައްޔިތުން ކަމުގައި އެ ޖަމާޢަތުން ބުންޏެވެ. އަދި ޔަހޫދީ ސިފައިން ދޫކޮށްލާނީ އެންމެ ފަހުން ކަމުގައި ވެސް އެ ޖަމާޢަތުން ބުނެއެވެ. އެ މީހުން މިިނިވަން ކުރުމުގެ ބަދަލުގައި ޔަހޫދީންގެ ޖަލުތަކުގައި ހައްޔަރު ކޮށްފައިވާ ފަލަސްޠީނުގެ ރައްޔިތުން ދޫކޮށްލަން ޖެހޭނެއެވެ. އަދި ޣައްޒާއަށް އިންސާނީ އެހީގެ ސާމާނު ވެއްދުމުގެ ފުރުޞަތު ދޭން ޖެހޭނެއެވެ.
މަޝްވަރާތަކާ ގުޅޭ ގޮތުން ޙަމާސްގެ އިސްވެރިއެއް ކަމުގައިވާ ސާމީ އަބޫ ޛަހްރީ ވިދާޅުވީ އެއްބަސްވުމެއް އެކުލަވައިލެވިފައި ނުވި ނަމަވެސް، އެކި ޚިޔާލުތަކަށް އެ ޖަމާޢަތުން ފުރުޞަތު ދޭނެ ކަމުގައެވެ. ނަމަވެސް އެއް މަސް ދުވަހަށް ޢުދުވާން ވަޤުތީ ގޮތުން މެދުކަނޑައިލަން ހުށަހަޅާފައިވާ ހުށަހެޅުމަށް އެއްބަސްވެވޭނީ އެ މުއްދަތު ހަމަވުމުން ޔަހޫދީންގެ ޢުދުވާން ނިމުމަކަށް ގެންނާނެ ކަމުގެ ފުރިހަމަ ޔަގީީންކަން ދިނުމުން ކަމުގައި އޭނާ ވިދާޅުވިއެވެ. އަދި އެ މުއްދަތުގެ ތެރޭގައި ޔަހޫދީ ފައުޖުން ޣައްޒާއިން ފައިބަން ޖެހޭނެ ކަމުގައި ވެސް އޭނާ ވިދާޅުވިއެވެ.
އެއްބަސްވުމަށް ޔަހޫދީން ހުށަހަޅާފައިވާ ޝަރުޠުތަކުގެ ތެރޭގައި ޣައްޒާގައި ދިރިއުޅޭ ޙަމާސްގެ އިސް ހަ މީހަކު ޣައްޒާ ދޫކޮށް ދިޔުން ހިމެނެއެވެ. އޭގެ ތެރޭގައި އޮކްޓޫބަރު 7 ވަނަ ދުވަހު ޔަހޫދީންނަށް ދީފައިވާ ޙަމަލާތައް ރޭވުމުގައި އިސްކޮށް ޙަރަކާތްތެރިވި ކަމަށް ޔަހޫދީން ތުހުމަތު ކުރާ ޔަޙްޔާ ސިންވާރާއި މުޙައްމަދު އަލް-ޟައިފު ހިމެނެއެވެ. އެ ދެ މީހުން ޝަހީދުކޮށްލަން ޔަހޫދީ ފައުޖުން ދަނީ މަސައްކަތް ކުރަމުންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ހިންގަމުންދާ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 25,700އަށް އުފުލިފައެވެ. އޭގެ ތެރޭގައި 16,000 ކުޑަކުދިންނާއި އަންހެނުން ހިމެނެއެވެ. އަދި ޒަޚަމުކޮށްލާފައިވާ މީހުންގެ ޢަދަދު ވަނީ 63,000އަށް އުފުލިފައެވެ.