ޗެމްޕިއަންސް ލީގު ސެމީފައިނަލްގައި ރެއާލްމެޑްރިޑާއި ސިޓީ އަދި ބަޔާން މިއުނިކާ އެތްލެޓިކޯ މެޑްރިޑް ވާދަކުރަން ޖެހިއްޖެއެވެ.
މިއަދު ނެގި ގުރުނެގުމުން މެންޗެސްޓަރ ސިޓީއާ ރެއާލްމެޑްރިޑް ސެމީފައިނަލް ފުރަތަމަ މެޗްގައި ވާދަކުރާނީ ސިޓީގެ އިއްތިހާދު ސްޓޭޑިއަމްގައި މިމަހުގެ 26 ވަނަ ދުވަހުއެވެ. މިއީ ސިޓީ ޗެމްޕިއަންސް ލީގުގެ ސެމީފައިނަލްގައި ކުޅޭ ފުރަތަމަ ފަހަރެވެ. އަނެއްކޮޅުން ސިޓީގެ ކޯޗް މެނުއަލް ޕެލެގްރީނީ އަކީ ރެއާލްމެޑްރިޑްގެ ތަރި ކްރިސްޓިއާނޯ ރޮނާލްޑޯއަށް މެޑްރިޑްގައި ފުރަތަމަ އިރުޝާދު ދިން ކޯޗެވެ. މިދެޓީމް މެޑްރިޑް ދަނޑުގައި ކުޅޭނީ އަންނަ މަހުގެ 4ވަނަ ދުވަހުއެވެ.
އެންމެ ފަހުގެ ޗެމްޕިއަން ބާސެލޯނާ ކަޓުވާލުމަށްފަހު ސެމީއިން ޖާގަ ހޯދި އެތްލެޓިކޯ މެޑްރިޑް ސެމީގައި ބަޔާން މިއުނިކާ ވާދަކުރަން ޖެހުނުއިރު މިދެޓީމް ޔޫރަޕްގެ މުބާރާތެއްގައި އެންމެ ފަހުން ވާދަކޮށްފައިވަނީ 1974ވަނަ އަހަރުގެ ފައިނަލްގައެވެ. އެފަހަރު ކުރިހޯދީ ބަޔާން މިއުނިކެވެ. މިދެޓީމްގެ ސެމީފައިނަލް ފުރަތަމަ މެޗްގައި މިމަހުގެ 27 ވަނަ ދުވަހު ކުޅޭނީ އެތްލެޓިކޯގެ ދަނޑުއެވެ. އަދި ބަޔާން މިއުނިކްގެ ދަނޑުގައި ދެވަނަ ލެގް ގުޅޭނީ އަންނަ މަހުގެ ތިންވަނަ ދުވަހުއެވެ. މިފަހަރުގެ ޗެމްޕިއަންސް ލީގު ފައިނަލް ކުޅޭނީ އަންނަ މަހުގެ 28 ވަނަ ދުވަހު މިލާންގައެވެ.
ޔޫރަޕާ ލީގުގެ ސެމީފައިނަލަށް ބަލާއިރު ލިވަޕޫލް ވާދަކުރަން ޖެހުނީ ވިޔަރެއާލްއާއެވެ. ރޭ ޑޯޓްމުންޑް ބަލިކޮށް ސެމީއިން ޖާގަ ހޯދި ލިވަޕޫލް ސެމީގެ ފުރަތަމަ މެޗްގައި މިމަހުގެ 28ގައި ނިކުންނާނީ ވިޔަރެއާލް ދަނޑުގައެވެ. އަދި އެންފީލްޑްގައި ދެވަނަ ލެގް ކުޅޭނީ އަންނަ މަހުގެ 5ވަނަ ދުވަހުއެވެ. އެންމެ ފަހުގެ ޗެމްޕިއަން ސެވިއްޔާ ސެމީގައި ވާދަކުރާނީ ޝަކްތަރ ޑޮނެސްކާއެވެ.
މިފަހަރުގެ ޔޫރަޕާ ލީގުގެ ފައިނަލް ކުޅޭނީ އަންނަ މަހުގެ 18ވަނަ ދުވަހު ސްވިޓްޒަލޭންޑްގައެވެ. މިއަހަރުގެ ޔޫރަޕާ ލީގު ޗެމްޕިއަންކަން ހޯދާ ޓީމަކަށް ޗެމްޕިއަންސް ލީގުން ޖާގަ ލިބޭނެއެވެ.